ស្ថានភាពជំងឺ របស់អ្នកទោសនយោបាយចិន លីវ ស៊ែវប៉ូ កាន់តែដុនដាបខ្លាំង
អ្នកទោសនយោបាយចិន ឈ្មោះ លីវ ស៊ែវប៉ូ និងដែលជាម្ចាស់ពានរង្វាន់ណូបែលសន្តិភាពនោះ កំពុងទទួលការព្យាបាលនៅក្នុងមន្ទីរពេទ្យចិន។ ដោយស្ថានភាពជំងឺកាន់តែដុនដាបខ្លាំង អាជ្ញាធរចិន បានអនុញ្ញាតឲ្យមានគ្រូពេទ្យអាមេរិក និងគ្រូពេទ្យអាល្លឺម៉ង់ ចូលទៅពិនិត្យ។ តែយ៉ាងណា មន្ទីរពេទ្យចិន បានបដិសេធចំពោះសំណូមពរដែលចង់ដឹកយកលោក លីវ ស៊ែវប៉ូ ទៅព្យាបាលនៅបរទេស ដោយលើកឡើងថា ការធ្វើដំណើរនឹងបង្កគ្រោះថ្នាក់ ដល់អ្នកជំងឺ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បន្ទាប់ពីរងការរិះគន់អស់ជាច្រើនថ្ងៃ អាជ្ញាធរចិន បានអញ្ជើញគ្រូពេទ្យជំនាញ ផ្នែកជំងឺមហារីក ជនជាតិអាល្លឺម៉ង់ ម្នាក់ និងជនជាតិអាមេរិកម្នាក់ ឲ្យចូលទៅពិនិត្យស្ថានភាពជំងឺ របស់លោក លីវ ស៊ែវប៉ូ ជ័យលាភីពានរង្វាន់ណូបែលសន្តិភាព។ បច្ចុប្បន្ន គ្រូពេទ្យទាំងពីរ បានទៅដល់ មន្ទីរពេទ្យសកលវិទ្យាល័យវិជ្ជសាស្ត្រលេខមួយ នៅក្រុង ហ្សិនយ៉ាង ជាទីដែលលោក លីវ ស៊ែវប៉ូ កំពុងទទួលការព្យាបាល។ គ្រូពេទ្យជំនាញបរទេសទាំងពីរ សុទ្ធតែបានទទួលស្គាល់ថា វិធីសាស្ត្រព្យាបាលរបស់គ្រូពេទ្យចិន ពិតជាការត្រឹមត្រូវ ទៅតាមអ្វីដែលត្រូវធ្វើ។ នេះបើតាមលិខិត ដែលចេញផ្សាយ ដោយមន្ទីរពេទ្យចិន។
គួរកត់សំគាល់ថា តាមការប៉ាន់ស្មាន ការសម្រេចអនុញ្ញាត ឲ្យគ្រូពេទ្យបរទេសចូលទៅមើលលោក លីវ ស៊ែវប៉ូ ក៏ដោយសាររដ្ឋាភិបាលចិន ចង់លាងមុខមាត់ ស្របពេលដែលលោក ស៊ី ជីនពីង កំពុងតែចូលរួមជំនួបកំពូលនៃប្រទេសសេដ្ឋកិច្ចនាំមុខទាំង២០ នៅឯក្រុងហំបួរ ប្រទេសអាល្លឺម៉ង់។
តែយ៉ាងណា ក៏ដោយ គ្រូពេទ្យទាំងអស់ បានសន្មត់ថា ស្ថានភាពជំងឺមហារីកថ្លើម របស់លោក លីវ ស៊ែវប៉ូ បានមកដល់ដំណាក់កាលចុងក្រោយហើយ។ ទាក់ទិនទៅនឹងសំណូមពរ ឲ្យបញ្ជូនយកលោក លីវ ស៊ែវប៉ូ ទៅព្យាបាលនៅបរទេស អាជ្ញាធរមន្ទីរពេទ្យចិន បានប្រកាសនៅថ្ងៃសៅរ៍ ទី៨កក្កដាថា អាការៈរបស់អ្នកជំងឺមានសភាពធ្ងន់ធ្ងរខ្លាំង ដែលមិនអាចអនុញ្ញាត ឲ្យធ្វើដំណើរផ្លូវឆ្ងាយបានទេ។
សូមបញ្ជាក់ថា លោក លីវ ស៊ែវប៉ូ ដែលមានអាយុ៦២ឆ្នាំ បានទទួលពានរង្វាន់ណូបែលសន្តិភាព នៅឆ្នាំ២០១០។ លោកមិនបានទៅទទួលពានរង្វាន់ទេ ដោយសារលោកត្រូវជាប់ក្នុងឃុំ នៅឯប្រទេសចិន។ លោក ស៊ែវប៉ូ គឺជាសកម្មជនសិទ្ធិមនុស្ស និងប្រជាធិបតេយ្យ ដែលបានចូលរួមសរសេរអត្ថបទ សំដៅ ជំរុញឲ្យមានការផ្លាស់ប្តូរក្នុងរបបនយោបាយចិន មានជាអាថទិ៍ ដូចជាការរៀបចំឲ្យមានការបោះឆ្នោតដោយសេរី និងជាសកលនៅចិន ជាដើម។ តុលាការចិន បានកាត់ទោសលោក នៅឆ្នាំ២០០៩ ឲ្យជាប់គុក១១ឆ្នាំ ពីបទធ្វើសកម្មភាពប៉ុនប៉ងផ្តួលរំលំរបបដឹកនាំ។
ក្រុមគ្រួសារ លោក លីវ ស៊ែវប៉ូ ក៏ដូចជាអង្គការក្រៅរដ្ឋាភិបាលជាច្រើន បានបន្ទោសរដ្ឋាភិបាលចិន ថាបានបណ្តែតបណ្តោយ ទុកលោកចោលក្នុងមន្ទីរឃុំឃាំង មិនព្រមយកមកព្យាបាល ឲ្យទាន់ពេលវេលា។ ឆ្លៀតពេលនេះដែរ អង្គការសហប្រជាជាតិ បានទាមទារទៅកាន់រដ្ឋាភិបាលចិន ថាត្រូវបើកឲ្យគេអាចទាក់ទង ឬបានជួបជាមួយ អ្នកទោសនយោបាយចិនឯទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ