ចិនធ្វើសមយុទ្ធយោធា ក្នុងសមុទ្រចិនខាងត្បូង ក្នុងន័យកំញើញ?
ចុះផ្សាយនៅថ្ងៃ៖
ស្តាប់ - ០៦:៥៦
នៅថ្ងៃសៅរ៍ទី ៩ កក្កដានេះ យោងតាមប្រព័ន្ធផ្សព្វផ្សាយព័ត៌មានចិន បានឲ្យដឹងថា កងទ័ពចិន កំពុងធ្វើសមយុទ្ធយោធាយ៉ាងសកម្ម ក្នុងទ្រង់ទ្រាយធំមិនធ្លាប់មាន នៅក្នុងតំបន់សមុទ្រចិនខាងត្បូង ក្បែរប្រជុំកោះប៉ារ៉ាសែល ខាងត្បូងកោះហៃណាន។ សមយុទ្ធយោធានេះ ត្រូវបានគេមើលឃើញថា ចិនមានចេតនាកំញើញហ្វីលីពីន និងប្រទេសផ្សេងទៀតក្នុងតំបន់ ដែលមានជំលោះជាមួយចិន ក្នុងការដណ្តើមគ្នាកាន់កាប់ដែនទឹកនិងដែនកោះ។ សមយុទ្ធនេះ ក៏ធ្វើឡើងព្រមពេលដែលតុលាការអាជ្ញារកណ្តាលអន្តរជាតិ ត្រូវបើកសវនាកា នៅថ្ងៃអង្គារសប្តាហ៍ក្រោយ ទៅលើបណ្តឹងរបស់ហ្វីលីពីន ដែលចោទថាចិនបានរំលោភសន្ធិសញ្ញាសមុទ្រអន្តរជាតិ។
យោងតាមការផ្សាយរបស់សារព័ត៌មាន PLA Daily ដែលជាការផ្សាយរបស់ក្រសួងការពារជាតិចិន បានឲ្យដឹងថា ការធ្វើសមយុទ្ធកំពុងតែធ្វើនៅក្បែរប្រជុំកោះប៉ារ៉ាសែលParacels ភាគខាងត្បូងកោះហៃណាន ហើយគ្រាប់និងអាវុធទាំងអស់ដែលប្រើ ក្នុងសមយុទ្ធនេះ គឺជាគ្រាប់និងអាវុធពិតៗតែម្តង។ ប្រភពព័ត៌មានរបស់ក្រសួងការពារជាតិចិនដដែល បានបញ្ជាក់ថា សមយុទ្ធយោធានេះ សំដៅហាត់សមទាំងផ្នែកគ្រប់គ្រង់ការវាយប្រហារតាមផ្លូវអាកាស នៅពីលើលំហរសមុទ្រ ទាំងការវាយប្រហារបាញ់គ្រាប់ចេញពីនាវាចម្បាំង ព្រមទាំងនាវាមុជទឹកបាតសមុទ្រផងដែរ។
ចំណែក ទូរទស្សន៍CCTV របស់ចិនវិញ បានផ្សាយរូបភាព មានយន្តហោះប្រដេញ ព្រមទាំងនាវាចំបាំង ដែលកំពុងតែបាញ់គ្រាប់មីស៊ីលជាច្រើនគ្រាប់។ បន្ទាប់មក មានរូបភាព ឧត្ថម្ភាគចក្រជាច្រើនគ្រឿង កំពុងហោះឡើងចុះ ព្រមជាមួយនឹងរូបនាវាមុជទឹកបាតសមុទ្រ ដែលងើបខ្លួនចេញពីផ្ទៃទឹក ទៀតផង។
បើយើងពិនិត្យមើលរូបភាពដំបូងនៃការផ្សព្វផ្សាយដំណឹង ពីការធ្វើសមយុទ្ធយោធានាពេលនេះ គឺវាមានលក្ខណៈជាការឃោសនានយោបាយ ដើម្បីបង្ហាញថា ចិនខ្លាំង ចិនមានសមត្ថភាព ចិនមានមោទនភាព និងវិរៈភាពក្នុងការការពារបុរណភាពដែនដី។ តែនៅពីក្រោយ សកម្មភាពនេះ គឺគ្មានអ្វីក្រៅពីបង្ហាញពីមហិច្ឆិតាយោធា របស់ចិន ដែលកាន់តែរីកធំទៅៗនោះទេ។
ធ្វើសមយុទ្ធសាមញ្ញ តែក្នុងន័យកំញើញ៖
ខាងក្រសួងការពារជាតិចិន បានបញ្ជាក់ថា សមយុទ្ធយោធានេះ គ្មានអ្វីចម្លែក ខុសពីធម្មតាទេ។ វាជាសមយុទ្ធយោធាសាមញ្ញ ដែលកងទ័ពចិន តែងតែអនុវត្តធ្វើវា។ តែយ៉ាងណា យើងទទួលស្គាល់ថា ការធ្វើសមយុទ្ធយោធា វាជាសិទ្ធិស្របច្បាប់របស់ចិន គ្មានអ្នកណាទៅហាមឃាត់បានទេ។ តែកាលៈទេសៈនេះ គឺសមយុទ្ធនេះ មិនមែនជាការហាត់សមធម្មតាទេ តែវាជាការបញ្ចេញសាច់ដុំ ដើម្បីបំភ័យប្រទេសតូចៗ ក្នុងតំបន់ ព្រោះចិន កំពុងមានជម្លោះ ជាមួយប្រទេសទាំងនោះ។
ប៉ុន្មានថ្ងៃមុននេះ លោករដ្ឋមន្ត្រីក្រសួងការបរទេសចិន បានទាំងគំរាមសហរដ្ឋអាមេរិកទៀតផង ថាកុំឲ្យមកលូកដៃក្នុងកិច្ចការជម្លោះនេះ។ លោក វ៉ាង យី បាននិយាយដោយចំៗតែម្តងថា ហាមសហរដ្ឋអាមេរិក មកប៉ះពាល់កិច្ចការអធិបតេយ្យរបស់ចិន។
អ្វីដែលយើង គិតថាសកម្មភាពចិននាពេលនេះ គឺជាការគំរាម គឺដោយសារតែវានៅសល់ពេលតែ៣ថ្ងៃទៀត ពោលគឺនៅថ្ងៃអង្គារសប្តាហ៍ក្រោយនេះ ដែលតុលារអាជ្ញារកណ្តាលអន្តរជាតិ ត្រូវបើកសវនាកា សម្រេចសេចក្តីទៅលើបណ្តឹងរបស់ហ្វីលីពីន។ ចិនបានប្រកាសរួចហើយ ថាគេមិនទទួលស្គាល់សេចក្តីសម្រេចរបស់តុលាការអាជ្ញារកណ្តាលនេះទេ បើសិនជាខ្លួនចាញ់ក្តី។ ដូច្នេះ ការបញ្ចេញកម្លាំងយោធា នាពេលនេះ គឺចិនចង់បង្ហាញប្រាប់ថា ចិនមិនអនុវត្តសេចក្តីសម្រេចរបស់តុលាការទេ ហើយបើប្រទេសណាចង់មកចាប់បង្ខំចិន ឲ្យដកថយចេញពីតំបន់មានជម្លោះ គឺប្រទេសនោះនឹងស្គាល់ថ្នាំខ្លាំងរបស់ចិនមិនខាន។
៨០%នៃផ្ទៃសមុទ្រចិនខាងត្បូង គឺជារបស់ចិន៖
ដូចយើងដឹងហើយ ថាប្រទេសតំបន់អាស៊ីអាគ្នេយ៍ ដែលនៅជាប់សមុទ្រចិនខាងត្បូង កំពុងមាន ជម្លោះជាមួយចិន ក្នុងការដណ្តើមកោះនឹងដែនទឹក។ តែក្នុងចំណោមនេះ មានតែហ្វីលីពីនមួយទេ ដែលក្លាហាន ហ៊ានដាក់ពាក្យប្តឹងចិន នៅចំពោះមុខតុលាការអាជ្ញារកណ្តាលអចិន្ត្រៃយ៍ ដែលមានទីទាំងនៅក្រុងឡាអេ ប្រទេសហូឡង់ដ៍។ រដ្ឋាភិបាលហ្វីលីពិន ដែលកាលនោះដឹកនាំដោយលោក អាគីណូ បានប្តឹងចិន ថាបានរំលោភទៅលើសន្ធិសញ្ញាដែនសមុទ្រអន្តរជាតិ របស់អង្គការសហប្រជាជាតិ ដែលចិនខ្លួនឯងក៏ជាប្រទេសហត្ថលេខីដែរ។
បណ្តឹងនេះ គឺផ្អែកលើឯកសារដែលចិនបានប្រគល់ទៅឲ្យអង្គការសហប្រជាជាតិ។ ក្នុងឯកសារនេះ ចិនបានធ្វើផែនទីមួយ ដើម្បីកំណត់អធិបតេយ្យភាពខ្លួន នៅក្នុងសមុទ្រចិនខាងត្បូង។ ការកំណត់យកដែនទឹកនេះ គឺចិនបានប្រើគំនូសខ្សែបន្ទាត់ចំនួន៩ខ្សែ ដើម្បីព័ទ្ធយក ដល់ទៅ៨០% នៃផ្ទៃសមុទ្រតែម្តង។
មិនត្រឹមតែប៉ុណ្ណោះទៀត ចិន បានបូមដីចាក់បំពេញ ដើម្បីសាងសង់ជាមូលដ្ឋានទ័ព ព្រលានយន្តហោះជាដើម នៅប្រជុំកោះ Spratleys ដែលហ្វីលីពីន អះអាងថាជារបស់ខ្លួនដែរ។ អំណះអំណាងតែមួយគត់របស់ចិន ក្នុងការទាមទារថាជារបស់ខ្លួន គឺថាចិនលើកឡើងពីប្រវត្តិសាស្ត្រតាំងតែពីសតវត្សទី១៣ ព្រោះជំនាន់នោះមានទូកអ្នកជំនួញ និងអ្នកនេសាទចិន នៅពេញសមុទ្រចិនខាងត្បូង។ អញ្ចឹងតំបន់ទាំងនោះគឺជារបស់ដូនតាចិន។
សន្ធិសញ្ញាអន្តរជាតិនៃច្បាប់សមុទ្រ គឺជាច្បាប់កំណត់ព្រំដែនសមុទ្រ៖
សម្រាប់អ្នកច្បាប់ អំណះអំណាងដែលចិនលើកឡើងពីប្រវត្តិសាស្ត្រតាំងពីសតវត្សទី១៣ ដើម្បីទាមទារសមុទ្រចិនខាងត្បូងថាជារបស់ខ្លួននោះ គឺធ្វើឲ្យគេហួសចិត្តខ្លាំងណាស់។ ការបែងចែកដែនសមុទ្រ គឺមានវិធានអន្តរជាតិជាអ្នកកំណត់ ហើយគឺជាអ្វីដែលហ្វីលីពីនបានលើកឡើង ពោលគឺគេត្រូវផ្អែកលើសន្ធិសញ្ញាច្បាប់សមុទ្រ របស់អង្គការសហប្រជាជាតិ។ មិនមែនចិនគូសខ្សែ៩បន្ទាត់ វាទយកតែម្នាក់ឯងនោះទេ។
មុននឹងទទួលពាក្យបណ្តឹងហ្វីលីពីន តុលាការអាជ្ញារកណ្តាលអន្តរជាតិ គេបានប្រជុំសម្រេចជាបឋមរួចទៅហើយ ថាគេមានអំណាចយុត្តាធិការ ក្នុងការដោះស្រាយបញ្ហានេះ។ តែផ្ទុយទៅវិញ ចិន ដែលជាសមាជិកក្រុមប្រឹក្សាអចិន្ត្រៃយ៍នៃអង្គការសហប្រជាជាតិ និងជាប្រទេសហត្ថលេខីនៃសន្ធិសញ្ញាច្បាប់សមុទ្រ បែរជាប្រកាសមិនទទួលស្គាល់អំណាចយុត្តាធិការនៃតុលាការនេះទៅវិញ។ មិនត្រឹមតែប៉ុណ្ណោះ ចិនបានគំរាមទៀតថា នឹងដកខ្លួនចេញពីប្រទេសហត្ថលេខីនៃសន្ធិសញ្ញាសមុទ្រទៀតផង។
កំញើញផង រុលទៅមុខផង៖
គ្រប់គ្នាដឹងយ៉ាងច្បាស់ ថាចៅក្រមទាំង៥រូបនៃតុលាការក្រុងឡាអេ ពិតជាសម្រេចសេចក្តីឲ្យហ្វីលីពីនឈ្នះ ហើយតំរូវឲ្យចិនដកកម្លាំងត្រឡប់ទៅវិញ។ តែយុទ្ធសាស្រ្តដែលចិន កំពុងធ្វើនាពេលនេះ គឺធ្វើយ៉ាងណា បំផ្លាញសេចក្តីសម្រេចរបស់តុលាការ តាមរយៈការបំភ័យប្រទេសសាម៉ីម្ខាងទៀត កុំឲ្យអនុវត្តវាបាន។ ស្របពេលជាមួយគ្នានេះ ចិននៅតែបន្តរុលទៅមុខទៀត។ ពោលគឺវាមិនខុសពីការដែលចិន កំញើញ និង ញុះញង់ឲ្យហ្វីលីពីនប្រើកម្លាំង តាមរយៈការដាក់ទ័ពរុលទៅមុខបន្តិចម្តងៗ តែហ្វីលីពិនមិនហ៊ាន គិតតែដកថយ ទីបំផុតចិនឈរនឹង ព័ទ្ធយកដោយមិនចាប់បាច់បាញ់ សូម្បីតែមួយគ្រាប់។
ជាក់ស្តែងកាលពីថ្ងៃសុក្រទី ៨ កក្កដា រដ្ឋាភិបាលថ្មីរបស់ហ្វីលីពីន បានប្រកាសរួចទៅហើយថា ហ្វីលីពីនសុខចិត្តធ្វើការបែងចែកភោគផល ដែលមាននៅបាតសមុទ្រជាមួយនិងចិន បើទោះបីជាតុលាការសម្រេចឲ្យហ្វីលីពីនឈ្នះក្តី។ ពាក្យចាស់ពោលថា “អារសាច់ជូនខ្លា ទើបនៅសុខបាន” គឺវាមិនខុសទេ។
ហ្វីលីពីន មិនខុសពីពងមាន់ ដែលជល់នឹងថ្មទេ។ អាមេរិក បានពង្រាយកម្លាំងទ័ពនៅក្នុងតំបន់ដែនទឹកអន្តរជាតិ ចាំជួយហ្វីលីពីនមែនពិត តែកាលៈទេសៈនេះរដ្ឋាភិបាលអាមេរិក កំពុងតែរវល់ជាប់ដៃ ជាមួយនឹងការឃោសនាបោះឆ្នោត ប្រធានាធិបតី។ ដូច្នេះគេមិនជឿថា អាមេរិក នឹងមកជួយហ្វីលីពីនបានទាន់ពេលទេ។ ដូច្នេះហើយ ទើបចិនឆក់ឱកាសនេះ ដើម្បីខិតកូនអុករបស់ខ្លួនទៅមុខ។
ឯចំណែកសហគមន៍អាស៊ាន រឹតតែមិនអាចឲ្យហ្វីលីពីនសង្ឃឹមបានទៅទៀត ព្រោះប្រទេសទាំង១០ មិនបានសាមគ្គីគ្នាតែមួយ ដើម្បីទប់ទល់ជាមួយចិនទេ។ ក្នុងអាស៊ានពេលនេះ សក់អ្នកណា ក្បាលអ្នកហ្នឹង តែម្តង។ យ៉ាងណាមិញ វៀតណាម ធ្លាប់បាក់ធ្មុងស្លាប់ទាហានជាង១៤០នាក់រួចហើយ កាលពីឆ្នាំ១៩៧៤ និង១៩៨៨ នៅតំបន់ Paracelsនិង Spratleys នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ