ទស្សនកិច្ចរដ្ឋមន្ត្រីការបរទេសអាមេរិក នៅប៉េកាំង ដើម្បីនិយាយរឿងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៥:៥៧
សំណុំរឿងកូរ៉េខាងជើង ដែលបង្កការភ័យខ្លាចដល់សន្តិសុខពិភពលោក តាមរយៈការបាញ់មីស៊ីល និងនុយក្លេអ៊ែរជាបន្តបន្ទាប់នោះ គឺជាសំណុំរឿង ដែលរដ្ឋាភិបាលអាមេរិក និងចិន បានផ្តល់សារៈសំខាន់បំផុត។ លោក រិច ធីឡឺសុន រដ្ឋមន្ត្រីការបរទេសអាមេរិក ទើបតែបានទៅដល់ ទីក្រុងប៉េកាំង នៅថ្ងៃសៅរ៍ទី ៣០ កញ្ញានេះ។ ក្នុងដំណើរទស្សនកិច្ចនេះ ថ្វីបើកម្មវត្ថុចំបងត្រូវគេប្រកាសថា គឺដើម្បីរៀបចំដំណើរទស្សនកិច្ចរបស់លោកប្រធានាធិបតីដូណាល់ត្រាំ នៅក្រុងប៉េកាំង ក៏ដោយ តែយ៉ាងណាគេជឿថា លោករដ្ឋមន្ត្រីការបរទេសអាមេរិក នឹងឆ្លៀតលើកឡើង ជាមួយសមភាគីចិន ស្តីពីបញ្ហាកូរ៉េខាងជើង។
រៀបចំដំណើរទស្សនកិច្ចរបស់លោកដូណាល់ ត្រាំ
លោក Rex Tillerson បានទៅដល់ទីក្រុងប៉េកាំង កាលពីព្រឹកថ្ងៃសៅរ៍ទី ៣០កញ្ញានេះ។ កម្មវត្ថុ ដែលគេប្រកាសជាផ្លូវការ គឺលោក រដ្ឋមន្ត្រីការបរទេសអាមេរិក ទៅប៉េកាំង ដើម្បីនិយាយជាមួយសមភាគីចិន ស្តីពីការរៀបចំ នូវដំណើរទស្សនកិច្ចផ្លូវរដ្ឋ របស់លោក ដូណាល់ ត្រាំ នៅទីក្រុងប៉េកាំង នៅរវាងខែ វិច្ឆិកា ខាងមុខនេះ។
លោក Rex Tillerson ត្រូវបានលោក Wang Yi រដ្ឋមន្ត្រីការបរទេសចិន ទទួលយ៉ាងអធិកអធម្ម នៅមហាវិមានប្រជាជននៅទីលានធានអានមិន។ បន្ទាប់មកទៀត លោក Tillerson នឹងត្រូវចូលទៅជួបជាមួយ នឹងលោកប្រធានាធិបតីចិន ស៊ី ជីនពីង ព្រមទាំងលោកទីប្រឹក្សារដ្ឋពិសេស ទទួលបន្ទុកកិច្ចការអន្តរជាតិ គឺលោក Yang Jiechi។
ស្ថិតក្នុងកម្មវត្ថុនេះ លោក រដ្ឋមន្ត្រីការបរទេសចិន បានលើកឡើងថា ការមកធ្វើទស្សនកិច្ចផ្លូវរដ្ឋ របស់លោកដូណាល់ ត្រាំ នៅខែវិច្ឆិកាខាងមុខ គឺជាឱកាសដ៏សំខាន់ណាស់ សំរាប់ទំនាក់ទំនង នៃប្រទេសទាំងពីរ អាមេរិក ចិន។ ដូច្នេះហើយ ទើបក្រុមការងារនៃប្រទេសទាំងពីរ ត្រូវជួបនិយាយគ្នា ដើម្បីរៀបចំដំណើរទស្សនកិច្ចនេះ ឲ្យបានល្អប្រសើរ។
នៅចំពោះមុខអ្នកកាសែត រដ្ឋមន្ត្រីការបរទេសចិន និងអាមេរិក មិនបានលើកឡើងពីបញ្ហាកូរ៉េខាងជើងទេ។ តែយ៉ាងណា មុននឹងចេញដំណើរទៅ ប៉េកាំង លោករដ្ឋមន្ត្រីការបរទេសអាមេរិក បានលើកឡើងថា លោកនឹងទៅនិយាយជាមួយសមភាគចិន ស្តីពីយុទ្ធសាស្ត្រក្នុងការសំអាតអាវុធនុយក្លេអ៊ែរ ចេញពីឧបទ្វីបកូរ៉េ ព្រមទាំងនិយាយពីបញ្ហាដោះដូរពាណិជ្ជកម្ម រវាងចិន និងអាមេរិកផងដែរ។ ដូច្នេះ ទោះគេមិនប្រកាសជាផ្លូវការ ក៏យើងអាចដឹងថា លោកRex Tillerson នឹងនិយាយជាមួយភាគីចិន ស្តីពីបញ្ហានុយក្លេអ៊ែរ កូរ៉េខាងជើង។
ចិន ព្រមសហការច្រើន ក្នុងការដាក់ទណ្ឌកម្មលើកូរ៉េខាងជើង
ទាក់ទិន នឹងសំណុំរឿង នុយក្លេអ៊ែរកូរ៉េខាងជើងនេះ កន្លងមកយើងឃើញថា ខាងភាគីអាមេរិក តែងតែស្តីបន្ទោសចិន យ៉ាងធ្ងន់ៗ ថាមិនបានជួយជ្រោមជ្រែងដោះស្រាយបញ្ហាទេ បែរជាបន្តរកស៊ីជាមួយកូរ៉េខាងជើងដដែល។ មិនមែនមានតែអាមេរិក មួយទេ ដែលចោទចិន ថាមិនបានជួយក្នុងបញ្ហាកូរ៉េខាងជើងនេះ។ នរណាក៏ដឹងដែរថា របបផ្តាច់ការព្យុងយ៉ាង រកស៊ីជាមួយចិនសឹងតែទាំងស្រុង ទាំងជំនួញស្របច្បាប់ និងជំនួញផ្លូវងងឹត។ ដូច្នេះ ទណ្ឌកម្មទាំងឡាយណា ដែលគេដាក់ទៅលើកូរ៉េខាងជើង មិនអាចមានប្រសិទ្ធិភាពទេ បើសិនជាគ្មានការប្រឹងប្រែងចូលរួម ពីសំណាក់ អាជ្ញាធរចិន។
ប៉ុន្តេ ជាការកត់សំគាល់ គេឃើញថា ចិន បានប្តូរច្រើន ដោយបានទទួលយកទណ្ឌកម្ម ដែលក្រុមប្រឹក្សាសន្តិសុខសម្រេចដាក់ទៅលើកូរ៉េខាងជើង។ ទណ្ឌកម្ម ដែលបានដាក់ចេញ កាលពីដើមខែកញ្ញានេះ គឺជាទណ្ឌកម្មធ្ងន់ធ្ងរណាស់ ហើយចង់មិនចង់ ក្រុមហ៊ុនចិន អ្នកជំនួញចិន ក៏ខាតបង់មិនស្ទើរដែរ។ តែយ៉ាងណា រដ្ឋាភិបាលចិន សន្យាថា នឹងសហការ។
យ៉ាងណាមិញ រដ្ឋមន្ត្រីក្រសួងពាណិជ្ជកម្មចិន ទើបបានប្រកាសថា ពីនេះរហូតដល់ខែមករា ឆ្នាំ២០១៨ ក្រុមហ៊ុនកូរ៉េខាងជើង ដែលបានមកបោះទីតាំងចុះបញ្ជីនៅចិន នឹងត្រូវតែបិទទ្វារទាំងអស់។ ហើយកាលពីសប្តាហ៍មុននេះ អាជ្ញាធរចិន ក៏បានបញ្ជាក់ដែរថា គេបានកាត់បន្ថយការផ្គត់ផ្គត់ ប្រេងឥន្ធនៈ ទៅឲ្យកូរ៉េខាងជើង យ៉ាងច្រើនបំផុត។ មិនត្រឹមតែប៉ុណ្ណោះ កាលពីថ្ងៃអង្គារ សប្តាហ៍នេះ ចិន បានសម្រេច កាត់ផ្តាច់ទំនាក់ទំនងក្នុងវិស័យធនាគារជាមួយកូរ៉េខាងជើង។ ការនេះ បានធ្វើឲ្យលោក ដូណាល់ ត្រាំ អបអរសរសើរចិនផងដែរ។
អ្នកនាំពាក្យក្រសួងការបរទេសអាមេរិក ក៏បានលាន់មាត់ សរសើរចិនដែរ ថាបានប្រែប្រួសច្រើន ព្រមសហការច្រើន ទាក់ទិននឹងទណ្ឌកម្មទៅលើកូរ៉េខាងជើង។ ដូច្នេះហើយ អាមេរិក ក៏ត្រូវបន្ទន់ឥរិយាបថ ជាមួយចិនដែរ ដែលនេះជារឿងធម្មតា។ តាមពិតទៅ ចិន ព្រមសហការ ក្នុងរឿងទណ្ឌកម្មកូរ៉េខាងជើងនេះ បើទោះបីជាចិន ខាតផ្នែកជំនួញមែន តែចិន មានប្រយោជន៍ព្រោះបើផ្ទុះសង្រ្គាមរវាងអាមេរិក និងកូរ៉េខាងជើង អ្នកដែលខាតធ្ងន់ គឺចិនទៅវិញទេ។
ជំហរផ្ទុយគ្នា រវាងអាមេរិក និងចិន
ក្នុងសំណុំរឿងកូរ៉េខាងជើង នៅមានរឿងច្រើនចំណុច ដែលចិន គិត ខុសពីអាមេរិក។ វាជារឿងធម្មតាទេ ព្រោះថាចិន មានផលប្រយោជន៍ផ្សេង ខុសពីអាមេរិក។ តែយ៉ាងណា មហាអំណាចទាំងពីរ មានកម្មវត្ថុរួមគ្នា គឺធ្វើយ៉ាងណា បោសសំអាតកម្មវិធីនុយក្លេអ៊ែរ ឲ្យអស់ពីឧបទ្វីបកូរ៉េ។ ទាញកូរ៉េខាងជើង ឲ្យឈប់បាញ់សាកមីស៊ីល និងឈប់អភិវឌ្ឍន៍អាវុធនុយក្លេអ៊ែរ។
គោលជំហរចិន មិនខុសពីរុស្ស៊ីទេ គឺត្រូវដោះស្រាយបញ្ហាដោយសន្តិវិធី ហើយត្រូវបញ្ឈប់ជាបន្ទាន់ នូវការផ្លោងពាក្យសំដីគំរាមទៅគំរាមមក ដែលលោកដូណាល់ ត្រាំ តែងតែធ្វើជារឿយៗកន្លងមក។ និយាយគំរាម កំញើញគីម ជុងអ៊ុន វាមិនត្រឹមតែមិនបានផលទេ គឺវារឹតតែធ្វើឲ្យគីម ជុងអ៊ុន ក្តៅឆេវឆាវ។ គោលជំហរចិន មួយទៀត គឺចិន ចង់ឲ្យអាមេរិក ព្រមធ្វើសម្បទានឲ្យកូរ៉េខាងជើង តាមរយៈ ការផ្អាកទាំងសងខាង។ គឺភាគីអាមេរិក និងកូរ៉េខាងត្បូង ត្រូវផ្អាក ឈប់ធ្វើសមយុទ្ធយោធា ឯចំណែកកូរ៉េខាងជើងវិញ ត្រូវឈប់បាញ់សាកល្បងមីស៊ីលបាលីស្ទីក និងនុយក្លេអ៊ែរ។
កាសែតចិន Global Times ចុះផ្សាយថា ជំរើសក្នុងការដោះស្រាយវិបត្តិនុយក្លេអ៊ែរកូរ៉េខាងជើង មានតែពីរទេ។ ទីមួយ គឺកំទេចកូរ៉េខាងជើងចោល ឬមួយទីពីរ គឺនិយាយជាមួយកូរ៉េខាងជើងតាមសម្រួល។ ហើយបើចង់ឲ្យកូរ៉េខាងជើង វិលមកនិយាយចរចាគ្នា លុះណា តែកូរ៉េខាងជើងបានត្រជាក់ចិត្ត។ ហើយដើម្បីឲ្យកូរ៉េខាងជើង បានត្រជាក់ចិត្ត លុះណាតែអាមេរិក និងកូរ៉េខាងត្បូង ឈប់ធ្វើសមយុទ្ធយោធា តទៅទៀត។
ចិន និងរុស្ស៊ី យល់ដូចគ្នា ថា បើកូរ៉េខាងជើង នៅតែខ្លាច អាមេរិកមកផ្តួលរំលំរបបខ្លួន នោះគឺគេនៅតែបន្តគំរាមបាញ់មីស៊ីលជានិច្ច។ ដូច្នេះ ក្នុងន័យនេះ អាមេរិកត្រូវតែបន្ថយការគំរាម បញ្ឈប់ការធ្វើសមយុទ្ធយោធា ដើម្បីឲ្យស្ថានការណ៍ស្ងប់ស្ងាត់។ ប៉ុន្តែ ចំនុចចុងក្រោយនេះ អាមេរិក មិនព្រមស្តាប់ចិនទាល់តែសោះ។ សម្រាប់អាមេរិក គឺគេត្រូវតែត្រៀមកំលាំងទុក បើសិនជាសង្រ្គាមកើតឡើង ដោយប្រការណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ