ជនជាតិអ៊ុយហ្គួរ៖ សភាតំណាងអាមេរិក អនុម័តច្បាប់ដាក់ទណ្ឌកម្មចិន
កាលពីថ្ងៃអង្គារទី៣ធ្នូ សភាតំណាងនៃសហរដ្ឋអាមេរិក បានបោះឆ្នោតអនុម័ត ដោយសម្លេងភាគច្រើនលើសលប់ ទៅលើគម្រោងច្បាប់មួយ ដើម្បីដាក់ទណ្ឌកម្មទៅលើចិន ចំពោះទង្វើរំលោភបំពានសិទ្ធិសេរីភាព ការធ្វើទុក្ខបុកម្នេញទៅលើសហគមនជនជាតិភាគតិចអ៊ុយហ្គួរ នៅក្នុងខេត្តស៊ីញជាំង។ គម្រោងច្បាប់នេះ នឹងត្រូវបញ្ជូនទៅឲ្យព្រឹទ្ធសភាអាមេរិក អនុម័ត មុននឹងធ្លាក់ដល់ដៃលោកប្រធានាធិបតី ដូណាល់ ត្រាំ។ រដ្ឋាភិបាលចិនវិញ បានសម្តែងការខឹងសម្បារជាខ្លាំង ទាក់ទិននឹងការអនុម័តគម្រោងច្បាប់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅក្នុងអង្គសភា លោកស្រី ណាន់ស៊ី ប៉េឡូហ្ស៊ី ប្រធានសភាតំណាងអាមេរិក បានលើកឡើងថា៖ “បច្ចុប្បន្ននេះ ភាពថ្លៃថ្នូរជាមនុស្ស និងសិទ្ធិសេរីភាពរបស់ប្រជាជនអ៊ុយហ្គួរក្នុងខេត្តស៊ីញជាំង កំពុងត្រូវបានគំរាមកំហែង ដោយអំពើព្រៃផ្សៃរបស់អាជ្ញាធរចិន។ ទង្វើនេះ គឺជាការជេរប្រមាថ ដល់មនសិការួមរបស់ពិភពលោកទាំងមូល” ។ លោកស្រីបន្ថែមថា៖ “តាមរយៈគម្រោងច្បាប់នេះ អាមេរិកចង់ផ្ញើសារ បញ្ជាក់ប្រាប់ទៅចិនថា អាមេរិកមិនអាចបិទមាត់ នៅស្ងៀមបានទេ” ។
សូមបញ្ជាក់ថា គម្រោងច្បាប់នេះ មានខ្លឹមសារដាក់ទណ្ឌកម្មទៅលើមន្ត្រីធំៗរបស់ចិន នៅខេត្តស៊ីនជាំង ដែលបានចូលរួម អនុវត្តសកម្មភាពធ្វើទុក្ខបុកម្នេញទៅលើប្រជាជនអ៊ុយហ្គួរ។ យោងតាមការសន្និដ្ឋានរបស់អង្គការសិទ្ធិមនុស្សជាច្រើន ក៏ដូចជាអ្នកជំនាញរបស់រដ្ឋាភិបាលអាមេរិក បានឲ្យដឹងថា រដ្ឋាភិបាលចិន និងអាជ្ញាធរខេត្តស៊ីនជាំង បានបង្កើតជំរុំដាក់បង្ឃាំងជនជាតិអ៊ុយហ្គួរប្រមាណ១លាននាក់ ដើម្បីធ្វើការកសាង លាងសំអាតស្មារតីនយោបាយ។ លោក Marco Rubio ព្រឹទ្ធសមាជិកមកពីបក្សសាធារណៈរដ្ឋ ធ្លាប់បានលើកឡើងថា រដ្ឋាភិបាលចិន កំពុងតែអនុវត្ត ការកំទេចចោលនូវអត្តសញ្ញាណវប្បធម៌ របស់ជនជាតិភាគតិចដែលកាន់សាសនាអ៊ីស្លាមទាំងអស់ នៅក្នុងខេត្តស៊ីញជាំង។
ប៉ុន្តែ យោងតាមអាជ្ញាធរចិនវិញ មណ្ឌលទាំងនោះ មិនមែនជាមន្ទីរឃុំឃាំងទេ តែជាមណ្ឌលអប់រំ បណ្តុះបណ្តាលផ្តល់ជំនាញវិជ្ជាជីវៈ ដល់ជនជាតិអ៊ុយហ្គួរ ដើម្បីឲ្យពួកគេអាចរកការងារធ្វើ និងចៀសចាកឆ្ងាយ ពីទ្រឹស្តីអ៊ីស្លាមភេរវកម្មនិយម។
គួរកត់សំគាល់ថា ក្រោយដំណឹងនៃការអនុម័តច្បាប់ដាក់ទណ្ឌកម្មនេះ រដ្ឋាភិបាលចិន បានសំដែងការខឹងសម្បារជាខ្លាំង ទៅលើសភាអាមេរិក។ អ្នកនាំពាក្យក្រសួងការបរទេសចិន បានលើកឡើងថា៖ “ការសន្និដ្ឋានរបស់អ្នកជំនាញ ក៏ដូចជាសភាអាមេរិក គឺជាការសន្និដ្ឋានដោយលំអៀង គ្មានការពិត ហើយថាវាគឺជាការជ្រៀតជ្រែកក្នុងកិច្ចការផ្ទៃក្នុងរបស់ចិន។ ចិននឹងមានវិធានការតបវិញ បើអាមេរិក ហ៊ានដាក់ទណ្ឌកម្មមែននោះ”។
គួររំលឹកផងដែរថា បរិបទទំនាស់រវាងចិននិងអាមេរិកកំពុងតែរីកធំ ជាមួយនឹងសង្រ្គាមពាណិជ្ជកម្ម រវាងមហាអំណាចទាំង២។ កាលពីសប្តាហ៍មុនអាមេរិក បានអនុម័តច្បាប់មួយ ដើម្បីប្រកាសគាំទ្រដល់ការធ្វើបាតុកម្មទាមទារលទ្ធិប្រជាធិបតេយ្យនៅហុងកុង។ ហើយចំណែកកាលពីខែតុលា រដ្ឋាភិបាលអាមេរិក បានសម្រេចដាក់ក្រុមហ៊ុននិងស្ថាប័នរដ្ឋចិនចំនួន២៨ ទៅក្នុងបញ្ជីរខ្មៅ ដែលគេសង្ស័យថាបានចូលរួមតាមដានប្រមូលទិន្នន័យ ចាប់រូបភាពនឹងសកម្មភាពរបស់ប្រជាជន ទៅឲ្យអាជ្ញាធរចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ