ជំនួបឥតព្រាងទុក រវាងលោកនាយករដ្ឋមន្ត្រីឥណ្ឌា និងលោកប្រធានាធិបតីបារាំង
ចុះផ្សាយនៅថ្ងៃ៖
មុននឹងបិទបញ្ចប់ដំណើរទស្សនកិច្ចនៅទ្វីបអឺរ៉ុប លោក ណារិន្ទ្រ ម៉ូឌី នាយករដ្ឋមន្រ្តីឥណ្ឌា បានធ្វើដំនើរ មកដល់ទីក្រុងប៉ារីសប្រទេសបារាំង ដើម្បីជួបជាមួយនឹងលោកប្រធានាធិបតីថ្មីបារាំង អេម៉ានុយអែល ម៉ាក្រុង។ វាគឺជាជំនួប ដោយឥតបានគ្រោងទុកមុនទាល់តែសោះ តែលោកនាយករដ្ឋមន្ត្រីឥណ្ឌា បានឆក់ឱកាស ដើម្បីមកអបអរសាទរដោយផ្ទាល់មាត់ ចំពោះការឡើងកាន់តំណែង របស់លោកម៉ាក្រុង ហើយក៏នឹងឆ្លៀតឱកាស និយាយពីការរឹតចំណងសហប្រតិបត្តិការសេដ្ឋកិច្ច រវាងប្រទេសទាំងពីរ។
ជំនួបឥតព្រាងទុក
មុនពេលចេញដំណើរមកកាន់អឺរ៉ុប នៅថ្ងៃទី២៨ ឧសភា រដ្ឋាភិបាលឥណ្ឌា បានចេញលិខិតផ្តល់ដំណឹងដល់អ្នកកាសែត ប្រាប់ពីកាលវិភាគ នៃសកម្មភាពរបស់នាយករដ្ឋមន្ត្រី ណារិន្ទ្រ ម៉ូឌី ដែលក្នុងនោះ ពុំមានកំណត់ពីការមកដល់ប្រទេសបារាំង ដើម្បីជួបលោកប្រធានាធិបតីម៉ាក្រុងទេ។ ក្នុងលិខិតនោះ មានបញ្ជាក់ថា លោកម៉ូឌី អញ្ជើញទៅទីក្រុងប៊ែរឡាំង ជួបលោកស្រីអធិការបតីអាល្លឺម៉ង់ បន្ទាប់មកទៅទីក្រុងម៉ាឌ្រីត ប្រទេសអេស្ប៉ាញ មុននឹងបិទបញ្ចប់ដំណើរនៅទីក្រុងមូស្គូ ជួបជាមួយនឹងលោកប្រធានាធិបតី ពូទីន។
តាមពិតទៅ បើតាមដំណឹងមិនផ្លូវការ មិនមែនលោកណារិន្ទ្រ ម៉ូឌី មិនមានគំរោងមកជួបលោកអេម៉ានុយអែល ម៉ាក្រុងទេ តែមកពីកាលវិភាគវាប្រថុចញ៉ុចពេក ហើយលោកអេម៉ានុយអែល ម៉ាក្រុង ដែលទើបតែឡើងកាន់តំណែង មានការងារមមាញឹកពេក។ តែទីបំផុតទៅ ក្រុមការងាររបស់មេដឹកនាំទាំងពីរ បានទាក់ទងគ្នា យ៉ាងរហ័សបំផុត នៅមួយថ្ងៃចុងក្រោយនេះ ដើម្បីរៀបចំឲ្យលោក ណារិន្ទ្រ ម៉ូឌី បានចូលមកសំដែងការគួរសម ចំពោះលោកអេម៉ានុយអែល ម៉ាក្រុង នៅទីក្រុងប៉ារីស។
គួរបញ្ជាក់ដែរថា លោក ណារិន្ទ្រ ម៉ូឌី គឺជាមេដឹកនាំបរទេសដំបូងគេ ដែលបានទូរស័ព្ទ មកអបអរអំពីជ័យជំនះរបស់លោក ម៉ាក្រុង។ ដូច្នេះ ការមកជួបគ្នាដោយផ្ទាល់ នៅថ្ងៃនេះ នឹងធ្វើឲ្យមេដឹកនាំទាំងពីរ មានឱកាស ជជែកគ្នាឲ្យបានកាន់តែវែងឆ្ងាយ ស្តីពីអនាគតរបស់ប្រទេសទាំងពីរ។ ជាជំនួបដើម្បីសំដែងការគួរសម មែនពិត ក៏ប៉ុន្តែ គេជឿថា មេដឹកនាំទាំងពីរ ប្រាកដជានិយាយគ្នា អំពីទំនាក់ទំនងពាណិជ្ជកម្ម និងសហប្រតិបត្តិការរវាងប្រទេសទាំងពីរ ឥណ្ឌា -បារាំង។
បារាំង គឺជាដៃគូយុទ្ធសាស្ត្រដ៏សំខាន់សម្រាប់ឥណ្ឌា។ ថ្វីបើការដោះដូរពាណិជ្ជកម្មរវាងបារាំងនិង ឥណ្ឌាមានប្រមាណតែ ១០ពាន់លានដុល្លារ ពោលគឺតិចជាងការដោះដូរពាណិជ្ជកម្មរវាងឥណ្ឌា និង អាល្លឺម៉ង់ ដល់ទៅ១ទ្វេរជា២ ក៏ប៉ុន្តែ ឥណ្ឌា ត្រូវការសមត្ថភាព និងបច្ចេកទេសរបស់បារាំងក្នុងវិស័យយុទ្ធសាស្រ្តមួយចំនួន ដោយមិនអាចខ្វះបាន។
ក្នុងនោះមានជាអាថទិ គឺវិស័យបច្ចេកវិទ្យាសព្វាវុធយោធា។ ឥណ្ឌាត្រូវការធ្វើទំនើបកម្មវិស័យកងទ័ពរបស់ខ្លួន ជាបន្ទាន់។ លោកណារិន្ទ្រ ម៉ូឌី ដែលជាមនុស្សមានទស្សនវិស័យបែបជាតិនិយម មានគំនិតធ្វើឲ្យកងទ័ពឥណ្ឌា មានសមត្ថភាពខ្ពស់ ដើម្បីការពារទឹកដី។
អស់រយៈពេល២ឆ្នាំ ដែលឥណ្ឌាបានចរចាជាមួយបារាំង ចង់ទិញយន្តហោះRafale ចំនួន១២៦គ្រឿង ដោយក្នុងនោះ១០៨គ្រឿង ត្រូវយកទៅផលិតនៅឥណ្ឌា។ ក៏ប៉ុន្តែភាពស្មុគស្មាញមានច្រើន ក្នុងការកំណត់លក្ខខណ្ឌ ផ្ទេរបច្ចេកវិទ្យានេះ ទើបភាគីទាំងពីរបានលប់ចោលវិញ ហើយឥណ្ឌាយល់ព្រមទិញតែ ៣៦គ្រឿង ដែលផលិតនៅបារាំង ទាំងស្រុង។
ក៏ប៉ុន្តែចេតនារបស់ឥណ្ឌា ដែលចង់ទទួលបានបច្ចេកវិទ្យារបស់បារាំង ក្នុងវិស័យសព្វាវុធទំនើបនេះ នៅតែមានដដែល។ ឥណ្ឌា មានគំរោងថ្មីមួយទៀត គឺទិញយន្តហោះចម្បាំងបារាំង ៥៧គ្រឿង ហើយចង់សុំឲ្យលើកយកទៅផលិត នៅឥណ្ឌាទាំងអស់។ បើតាមការស្មាន មេដឹកនាំទាំងពីរ នឹងប្រាកដជាលើកឡើងអំពីចំណុចនេះ។
មហិច្ឆតា របស់លោកណារិន្ទ្រ ម៉ូឌី គឺចង់ធ្វើឲ្យឥណ្ឌា ឲ្យក្លាយជាទីពិសោធន៍ បច្ចេកវិទ្យាទំនើបរបស់ពិភពលោកតែម្តង។ ឥណ្ឌាមិនចង់ក្លាយជារោងចក្រ ផលិតសម្ភារៈកំប៉ិកកំប៉ុក ដូចចិនទេ។ តែឥណ្ឌា ចង់ធ្វើឲ្យយុវជនខ្លួន ក្លាយជាវិស្វករជំនាញ ក្នុងវិស័យបច្ចេកវិទ្យាទំនើប។ នៅមានបច្ចេកវិទ្យាមួយ ដែលឥណ្ឌាចង់បានពីបារាំង គឺបច្ចេកវិទ្យានុយក្លេអ៊ែរស៊ីវីល ដើម្បីផលិតថាមពលអគ្គីសនី។
គេត្រូវការថាមពលអគ្គីសនីជាចាំបាច់ ដើម្បីអភិវឌ្ឍន៍សេដ្ឋកិច្ច។ បើប្រជាជនគ្មានភ្លើងអគ្គីសនីប្រើ ឬក៏ចរន្តភ្លើងអគ្គីសនី ដាច់មួយថ្ងៃ៣ដង គឺមានន័យថា អ្វីៗនឹងត្រូវរអាក់រអួលទៅតាមនោះ។ ឥណ្ឌាត្រូវការអគ្គីសនី តែឥណ្ឌា បានជ្រើសរើសយក ថាមពលដែលមិនបញ្ចេញផ្សែងពុល។ ក្រៅពីវិស័យនុយក្លេអ៊ែរស៊ីវីល ឥណ្ឌាក៏បានផ្តល់អាទិភាព ដល់ការផលិតថាមពល ដោយប្រើកាំរស្មីព្រះអាទិត្យដែរ។
មិនមែនមានតែវិស័យថាមពលទេ ដែលឥណ្ឌាត្រូវការពីបារាំង នៅមានវិស័យផ្សេងៗទៀត ដែលបច្ចេកវិទ្យាបារាំង បានទាក់ទាញឥណ្ឌា ដូចជាវិស័យសំណង់ផ្លូវដែក ការផលិតទូររថភ្លើង ឬក៏សំណង់ស៊ីវីលជាដើម។
ឥណ្ឌាចង់ចូលរួមជាមួយបារាំង ក្នុងមានជាមហាអំណាចអាស៊ី
អ្នកវិភាគទូទៅយល់ថា លោកម៉ូឌី ចង់ឆក់ឱកាសនេះ ពង្រឹងតួនាទីរបស់ឥណ្ឌា នៅលើឆាកអន្តរជាតិ ក្នុងនាមជាមហាអំណាចអាស៊ីម្នាក់ដែរ។ លោក ម៉ូឌី បានសម្លឹងឃើញថា បារាំង កំពុងតែវិលត្រលប់មកកាន់ចង្កូត ដើម្បីតំរង់ទិស ដោះស្រាយបញ្ហាធំជាច្រើន នៅលើឆាកអន្តរជាតិ។ បន្ទាប់ពីសហរដ្ឋអាមេរិក បានដកខ្លួនចេញពីកិច្ចព្រមព្រៀងទីក្រុងប៉ារីស ស្តីពីអាកាសធាតុ លោកប្រធានាធិបតីបារាំង ចង់ឆក់ឱកាសនេះ បង្ហាញគោលជំហរទៅកាន់ប្រទេសធំៗ ស្តីពីការប្រមែរប្រមូលគ្នា សហការគ្នា កាត់បន្ថយការកើនឡើងនូវកំដៅផែនដី ព្រមទាំងបង្វែរទិសដៅសេដ្ឋកិច្ច ទៅរកការអភិវឌ្ឍន៍ប្រកបដោយចីរភាព មិនបំផ្លាញបរិស្ថាន។
លោក ណារិន្ទ្រ ម៉ូឌី បានសរសេរនៅលើទំព័រហ្វេសប៊ុក របស់លោកថា” លោកនឹងនិយាយជាមួយលោក ម៉ាក្រុង ពីបំណងរបស់ឥណ្ឌា ចង់សុំឲ្យខ្លួន ក្លាយជាសមាជិកអចិន្ត្រៃយ៍ នៃអង្គការសហប្រជាជាតិ។ លោក ក៏ចង់និយាយជាមួយបារាំង ដែរស្តីអំពីសហប្រតិបត្តិការបោសសំអាតចលនាភេរវកម្ម ការកាត់បន្ថយកំដៅផែនដី ការអភិវឌ្ឍន៍វិស័យថាមពលស្អាតស្អំ មិនបញ្ចេញផ្សែងពុល វិស័យដឹកជញ្ជូនផ្លូវដែក និងការស្រាវជ្រាវអវកាស ជាដើម”។ ជារួមគឺមានន័យថា ឥណ្ឌាបានផ្តល់កិត្តិយសដល់បារាំង នឹងត្រូវការបារាំង ដើម្បីសម្រេចកិច្ចការទាំងអស់នេះ។
នយោបាយដកថយ បិទទ្វារសំងំ របស់លោកដូណាល់ ត្រាំ បានជំរុញឲ្យឥណ្ឌា ងាកមករកបារាំង និងទ្វីបអឺរ៉ុបវិញ។ ជាពិសេស គឺក្នុងវិស័យពាណិជ្ជកម្មសេរី។ មិនមែន មានតែឥណ្ឌាមួយទេ ដែលបារម្ភ ពីគោលនយោបាយបែបបិទទ្វារ ពិន័យការនាំចូលផលិតផលបរទេស ដែលលោកត្រាំ បានស្រែកក្តែងៗ នាពេលកន្លងមក ។ ត្រង់ចំណុចនេះហើយ ទើបឥណ្ឌា បានងាកមករកបារាំង ដែលជាកម្លាំងចលកររបស់សហភាពអឺរ៉ុប ដើម្បីសម្រេចឲ្យបាន នូវកិច្ចព្រមព្រៀងពាណិជ្ជកម្មសេរី ជាមួយសហភាពអឺរ៉ុប។ អាមេរិក លែងជាចំណុចស្នូល លែងជាមេដឹកនាំកំពូល នៃសេដ្ឋកិច្ចពិភពលោកទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ