បោះឆ្នោតសភាឥណ្ឌា៖ គណបក្សរបស់លោកណារិន្ទ្រ ម៉ូឌី ទំនងជាឈ្នះដាច់
នៅប្រទេសឥណ្ឌា បន្ទាប់ពីការបោះឆ្នោតសភា អស់រយៈពេលជាង១ខែ បានបិទបញ្ចប់ជាស្ថាពរ នៅថ្ងៃទី២៣ឧសភា គឺដល់ថ្ងៃចាប់ផ្តើមរាប់សន្លឹកឆ្នោត ទូទាំងប្រទេស។ បើតាមលទ្ធផលបឋម មិនទាន់ផ្លូវការ ផ្តល់ឲ្យដោយគណកម្មការជាតិ រៀបចំការបោះឆ្នោតឥណ្ឌា បានឲ្យដឹងថា គណបក្សហិណ្ឌូជាតិនិយម របស់លោកណារិន្ទ្រ ម៉ូឌី ទំនងជាអាចឈ្នះដាច់ បានសម្លេងភាគច្រើននៅក្នុងសភា។
ចុះផ្សាយនៅថ្ងៃ៖ កែប្រែថ្ងៃទី៖
បើគិតមកត្រឹម ព្រឹកថ្ងៃទី២៣ ឧសភានេះ ការរាប់សន្លឹកឆ្នោតទាញចេញពីម៉ាស៊ីនបោះឆ្នោតដោយស្វ័យប្រវត្តិ បានបង្ហាញថា គណបក្ស Bharatiya Janata Party (BJP) របស់លោកណារិន្ទ្រ ម៉ូឌី កំពុងតែនាំមុខ នៅតាមមណ្ឌល យ៉ាងហោចណាស់ ២៨២ ក្នុងចំណោមមណ្ឌលទាំង៥៤២។
យោងតាមលទ្ធផលបឋម ដែលផ្សាយដោយគណកម្មការជាតិ រៀបចំការបោះឆ្នោតឥណ្ឌានេះ គឺមានន័យថា គណបក្សរបស់លោកណារិន្ទ្រ ម៉ូឌី កំពុងតែឈ្នះដាច់ បានចំនួនលើសពី២៧២អាសនៈ ដែលជាសម្លេងភាគច្រើននៅក្នុងសភាជាតិឥណ្ឌា។
ដោយឡែក គណបក្សខុនគ្រែស ដែលជាគណបក្សប្រឆាំង ដឹកនាំដោយលោក រ៉ាហ៊ុល ហ្កង់ឌី បាននាំមុខនៅតាមមណ្ឌល ប្រមាណជាង៥០មណ្ឌល។ តែយ៉ាង នៅពុំទាន់មានអាសនៈណាមួយ ត្រូវបានប្រកាស ប្រគល់ទៅឲ្យបក្សណាមួយ ជាផ្លូវការនៅឡើយទេ។
សូមរំលឹកថា ការបោះឆ្នោតជ្រើសរើសសមាជិក “លោកសាផា” ដែលជាសភាជាតិឥណ្ឌា មានរយៈពេលជាង១ខែ គិតចាប់ពីថ្ងៃទី១១មេសាមក។ ប្រជាជនឥណ្ឌា គ្រប់ស្រទាប់វណ្ណៈ ប្រមាណជា៦៧% ក្នុងចំណោម៩០០លាននាក់ បានចូលរួមបោះឆ្នោត នៅតាមការិយាល័យបោះឆ្នោត ជាង១លានទីតាំង។
លោកណារិន្ទ្រ ម៉ូឌី នាយករដ្ឋមន្ត្រីបច្ចុប្បន្ន សង្ឃឹមយកឈ្នះការបោះឆ្នោតនេះ ដើម្បីបន្តកាន់តំណែងអាណត្តិទី២។ ចេញពីត្រកូលគ្រួសារក្រីក្រ នៅរដ្ឋគុចារ៉ាត់ លោកម៉ូឌី បានជ្រើសរើសចរន្តនយោបាយហិណ្ឌូជាតិនិយម ដែលលើកដំកើងតែប្រជាជនដែលកាន់សាសនាហិណ្ឌូ។ ការឃោសនាបែបពុះចែកសង្គមរបស់បក្សលោកម៉ូឌី បានធ្វើឲ្យមានការព្រួយបារម្ភខ្លាំង ទាក់ទិននឹងសង្រ្គាមសាសនា ក៏ដូចជាការរស់នៅមិនចុះសម្រុងគ្នា ក្នុងសង្គមឥណ្ឌា ជាពិសេស រវាងអ្នកកាន់សាសនាឥស្លាម និងអ្នកកាន់សាសនាហិណ្ឌូ។
ជីវប្រវត្តិ និងការតស៊ូរបស់បុគ្គលលោកម៉ូឌី ត្រូវបានបក្ស Bharatiya Janata Party យកមកឃោសនា ដើម្បីប្រមូលសម្លេងឆ្នោត។ ជាមួយនឹងជោគជ័យរបស់លោកណារិន្ទ្រ ម៉ូឌី នាពេលនេះ គេសម្លឹងឃើញថា វប្បធម៌ងប់ងល់ លើកដំកើងបុគ្គលជាធំ ជាជាងការផ្តល់តម្លៃ ទៅលើកម្មវិធីនយោបាយជាក់ស្តែង កំពុងតែសង្រ្គប់ ពីលើបរិយាកាសប្រជាធិបតេយ្យឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ