ម៉ាឡេស៊ីគ្រោងប្តឹងអឺរ៉ុប ដែលឈប់ទទួលស្គាល់ប្រេងដូង ជាប្រេងឥទ្ធនៈជីវសាស្ត្រ
នៅថ្ងៃអង្គារទី១៦កក្កដានេះ រដ្ឋមន្ត្រីក្រសួងឧស្សាហកម្មម៉ាឡេស៊ី បានបញ្ជាក់ឲ្យដឹងថា រដ្ឋាភិបាលម៉ាឡេស៊ី នឹងរៀបចំដាក់ពាក្យប្តឹងសហភាពអឺរ៉ុប ទៅកាន់អង្គការពាណិជ្ជកម្មពិភពលោក ទាក់ទិននឹងបញ្ហា ប្រេងដូង។ ម៉ាឡេស៊ី ចាត់ទុកការសម្រេច ដកប្រេងដូង ពីបញ្ជីនៃប្រេងឥទ្ធនៈជីវសាស្ត្ររបស់អឺរ៉ុប ថាគឺជាការសម្រេចដោយអយុត្តិធម៌ ហើយវានឹងពិន័យដល់ការនាំចេញផលិតផលប្រេងដូង របស់ម៉ាឡេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ម៉ាឡេស៊ី និងដាក់ពាក្យប្តឹងសហភាពអឺរ៉ុប ឲ្យបានមុនខែវិច្ឆិកា ឆ្នាំ២០១៩នេះ។ នេះគឺជាប្រសាសន៍របស់លោកស្រី Teresa Kok រដ្ឋមន្ត្រីឧស្សាហកម្មម៉ាឡេស៊ី។ លោកស្រីបន្ថែមទៀតថា ម៉ាឡេស៊ី និងនិយាយជាមួយរដ្ឋាភិបាលឥណ្ឌូណេស៊ី ដើម្បីរួមគ្នា សហការធ្វើពាក្យបណ្តឹង ទៅកាន់អង្គការពាណិជ្ជកម្មពិភពលោក។
គួររំលឹកថា សហភាពអឺរ៉ុប បានអនុម័តសម្រេចដក ផលិតផលប្រេងដូង ចេញពីបញ្ជីប្រេងឥទ្ធនៈជីវសាស្ត្រ ដែលគោរពក្រិត្យក្រមបរិស្ថានធម្មជាតិ។ យោងតាមការសម្រេចចិត្តនេះ សហភាពអឺរ៉ុប និងកាត់បន្ថយការប្រើប្រាស់ប្រេងដូង បន្តិចម្តងៗ ឲ្យដល់ចំណុចសូន្យ ពីនេះរហូតដល់ឆ្នាំ២០៣០។ ដោយផ្អែក លើឯកសារស្រាវជ្រាវរបស់អ្នកជំនាញអឺរ៉ុប ព្រមទាំងអ្នកជំនាញអង្គការបរិស្ថានផង ដំណាំងដូងប្រេង បានបង្កផលប៉ះពាល់យ៉ាងខ្លាំង ដល់បរិស្ថានធម្មជាតិ។
សហភាពអឺរ៉ុប យល់ឃើញថា ឧស្សាហកម្មដំណាំដូងប្រេងនេះ បានបំផ្លាញព្រៃឈើធម្មជាតិរាប់ម៉ឺនហិកតា បំផ្លាញជំរកសត្វ និងប្រព័ន្ធជីវចម្រុះ ហើយប្រការនេះ បានចូលរួមជំរុញការកើនឡើង នូវកំដៅផែនដី។ ឧស្សាហកម្មដំណាំដូងប្រេង ក៏បានបង្កើតឲ្យមានជម្លោះដីធ្លី ភាពតានតឹងក្នុងសង្គម និងជាពិសេសដល់ជីវភាពរបស់ប្រជាជនម្ចាស់ស្រុក ដែលរស់រំពឹងលើផលិតផលរបស់ព្រៃឈើធម្មជាតិ។
គួរកត់សម្គាល់ថា ឧស្សាហកម្មដូងប្រេង គឺជាវិស័យផលិតវត្ថុធាតុដើមយុទ្ធសាស្ត្រ មិនថាសម្រាប់ ម៉ាឡេស៊ី ឬ ឥណ្ឌូណេស៊ី។ ប្រទេសទាំង២នេះ បានផលិតនឹងនាំចេញផលិតផលប្រេងដូង ប្រមាណជា៨៥% នៃតម្រូវការសរុបទូទាំងសកលលោក។ ជាមួយនឹងរបាយការណ៍លើកឡើង ពីផលប៉ះពាល់ នៃឧស្សាហកម្មនេះ ការនាំចេញដូងប្រេងរបស់ម៉ាឡេស៊ី និងឥណ្ឌូណេស៊ី បានចុះថយចំនួន១៥% កាលពីឆ្នាំ២០១៨។
កាលពីខែមីនាកន្លងទៅ លោក ម៉ាហាធា ម៉ូហាម៉េដ នាយករដ្ឋមន្ត្រីម៉ាឡេស៊ី បាននិយាយតវ៉ា ចំពោះការសម្រេចចិត្តរបស់សហភាពអឺរ៉ុប ដោយលើកឡើងថា បញ្ហានេះ នឹងបង្កឲ្យមានជម្លោះពាណិជ្ជកម្ម។ លោកនាយករដ្ឋមន្ត្រីម៉ាឡេស៊ី ថែមទាំងបានគំរាមថា ម៉ាឡេស៊ី នឹងឈប់ទិញយន្តហោះចម្បាំងរបស់បារាំង ហើយងាកទៅទិញយន្តហោះចម្បាំងរបស់ចិនវិញ។
ដូចគ្នាដែរ កាលពីថ្ងៃសុក្រ សប្តាហ៍មុននេះ លោក Joko Widodo ប្រធានាធិបតីឥណ្ឌូណេស៊ី បានអះអាងថា លោកនឹងប្រឹងឲ្យអស់ពីសមត្ថភាព ដើម្បីតតាំងជាមួយសហភាពអឺរ៉ុប ដែលបានសម្រេចដោយអយុត្តិធម៌ មកលើផលិតផលប្រេងដូង។ លោកប្រធានាធិបតីឥណ្ឌូណេស៊ី លើកឡើងថា ឧស្សាហកម្មដំណាំដូងប្រេង បានជួយស្រោចស្រង់ជីវភាពប្រជាជនក្រីក្រឥណ្ឌូណេស៊ី ហើយមនុស្ស១៦លាននាក់ ដែលរស់រំពឹងលើវិស័យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ