ម៉ាឡេស៊ីទិញនាវាល្បាតសមុទ្រ អាចផ្ទុកគ្រាប់មីស៊ីលពីចិន៤គ្រឿង
នាយករដ្ឋមន្ត្រីម៉ាឡេស៊ី លោកណាជីប រ៉ាហ្សាក់ ដែលកំពុងបំពេញទស្សនកិច្ចនៅទីក្រុងប៉េកាំងប្រទេសចិននោះ ទើបបានចុះហត្ថលេខាទិញនាវាល្បាតសមុទ្រ ចំនួន៤គ្រឿង របស់ចិន ដែលនាវានោះអាចបំពាក់គ្រាប់មីស៊ីលផងដែរ។ នេះជាលើកទីមួយហើយដែល ម៉ាឡេស៊ី ប្រទេសសម្ព័ន្ធមិត្តស្និតស្នាលរបស់អាមេរិកនិងអង់គ្លេស បែរជាទៅទិញសម្ភារៈយោធាពីចិនទៅវិញ។ អ្នកវិភាគជាច្រើនយល់ថា របត់ថ្មីរបស់លោកនាយករដ្ឋមន្ត្រីម៉ាឡេស៊ី ដែលងាកទៅរកចិននេះ គឺដោយសារម៉ាឡេស៊ី យល់ប្រយោជន៍ដែលបានមកពីចិន ហើយដែលជាប្រយោជន៍ដែលអាមេរិក មិនអាចផ្តល់ឲ្យបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ដោយមិនបានប្រាប់ពីតំលៃ លោកណាជីប រ៉ាហ្សាក់ បានប្រកាសនៅទីក្រុងប៉េកាំងថា ម៉ាឡេស៊ីទើបបានចុះហត្ថលេខាទិញនាវាល្បាតសមុទ្រ៤គ្រឿងពីចិន។ កិច្ចសន្យាទិញនេះ គឺមានភ្ជាប់ជាមួយនឹងកិច្ចព្រមព្រៀងសហប្រតិបត្តិការយោធា រវាងចិន និងម៉ាឡេស៊ី។ នាវាពីរគ្រឿងដំបូង នឹងត្រូវផលិតនៅចិន ហើយបន្ទាប់មកពីរគ្រឿងទៀត ត្រូវយកទៅផលិតនៅប្រទេសម៉ាឡេស៊ី។ លោកណាជីប រ៉ាហ្សាក់ មិនភ្លេចបញ្ជាក់ទេថា នេះគឺជាកិច្ចព្រមព្រៀងជាប្រវត្តិសាស្ត្រ ដែលបានចងចំណងមេត្រី រវាងម៉ាឡេស៊ី និងចិន ក្នុងវិស័យការពារជាតិ។
ជាប្រវត្តិសាស្ត្រមែនហើយ ព្រោះថានេះគឺជាលើកទីមួយហើយ ដែលម៉ាឡេស៊ី បានទិញសម្ភារៈយោធាពីចិន។ ជាប្រវត្តិសាស្ត្រមួយទៀត គឺថាម៉ាឡេស៊ីធ្លាប់ស្ថិតក្រោមអនានិគមអង់គ្លេស ហើយជាសម្ព័ន្ធមិត្តចាក់ទឹកមិនលិចរបស់សហរដ្ឋអាមេរិក។ ការកាច់ចង្កូតបែរទៅរកប៉េកាំងក្នុងពេលនេះ ត្រូវបានអ្នកវិភាគជាច្រើន យល់អំពីចេតនារបស់លោកណាជីព រ៉ាហ្សាក់ ដែលចង់ដោះដៃចោលអាមេរិក ដោយសារតែចិនបានហុចប្រយោជន៍ឲ្យខ្លួនបានច្រើនជាង មិនថាប្រយោជន៍សម្រាប់ម៉ាឡេស៊ី រឺប្រយោជន៍ផ្ទាល់ខ្លួន សម្រាប់លោកណាជីប រ៉ាហ្សាក់ផ្ទាល់។
ថ្លែងទៅកាន់អ្នកសារព័ត៌មាន China Daily លោកណាជីប រ៉ាហ្សាក់ បានបញ្ជាក់ថា ប្រទេសលោកជាប្រទេសធ្លាប់នៅក្រោមអនានិគមអង់គ្លេសមែនពិត តែមិនមែនមានន័យថាប្រទេសលោកត្រូវតែស្តាប់បង្គាប់ រឺសួរយោបល់ពីប្រទេសអតីតចៅហ្វាយខ្លួននោះទេ។ ទាក់ទិនទៅនឹងបញ្ហាជម្លោះរវាងចិន និងម៉ាឡេស៊ី ក្នុងដែនសមុទ្រចិនខាងត្បូង លោកនាយករដ្ឋមន្ត្រីម៉ាឡេស៊ីបានឆ្លើយថា រឿងជម្លោះនេះជារឿងផ្សេង ដែលយើងត្រូវការដោះស្រាយ តាមការនិយាយស្រុះស្រួលគ្នាតាមសម្រួល ក្នុងភាពស្ងប់ស្ងាត់។
ដោយឡែក លោករដ្ឋមន្ត្រីក្រសួងការពារជាតិម៉ាឡេស៊ី បានឆ្លើយទៅកាន់អ្នកយកព័ត៌មានBernamaថា ការដែលម៉ាឡេស៊ីទិញសម្ភារៈយោធាពីចិន គឺវាគ្មានហេតុផលអ្វីផ្សេង ក្រៅតែពីថាផលិតផលចិនវាមានតំលៃថោកសមរម្យនោះទេ។ យោងតាមទីភ្នាក់ងារព័ត៌មានBernama ដដែលបានឲ្យដឹងថា លោកណាជីប រ៉ាហ្សាក់ មានបំណងទិញសម្ភារៈយោធាពីចិនបន្ថែមទៀត ទៅថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ