ម៉ាឡេស៊ី បណ្តេញឯកអគ្គរដ្ឋទូតកូរ៉េខាងជើង ចេញពីម៉ាឡេស៊ី
លោករដ្ឋមន្ត្រីក្រសួងការបរទេសម៉ាឡេស៊ី បានប្រកាសឲ្យដឹង កាលពីល្ងាចថ្ងៃសៅរ៍ ទី៤ មីនា ថា ម៉ាឡេស៊ី នឹងធ្វើការបណ្តេញឯកអគ្គរដ្ឋទូតប្រទេសកូរ៉េខាងជើង ប្រចាំនៅក្រុងកូឡាឡំពួរ ចេញពីម៉ាឡេស៊ី។ ការប្រកាសនេះ ត្រូវបានធ្វើឡើង បន្ទាប់ពីទំនាក់ទំនងប្រទេសទាំងពីរ បានឈានទៅដល់ការចោទប្រកាន់គ្នាទៅវិញទៅមក នៅក្រោយការធ្វើឃាត លើរូបលោក គីម ជុងណាំ បងប្រុសឪពុកតែមួយ ម្តាយទីទៃ របស់មេដឹកនាំផ្តាច់ការ គីម ជុងអ៊ុន ដែលបានកើតឡើង នៅព្រលានយន្តហោះកូឡាឡំពួរ។
ចុះផ្សាយនៅថ្ងៃ៖ កែប្រែថ្ងៃទី៖
“ឯកអគ្គរដ្ឋទូតកូរ៉េខាងជើង ប្រចាំនៅម៉ាឡេស៊ី ត្រូវបានប្រកាសថាពុំមានឋានន្តរសក្តិអ្វីទាំងអស់ នៅក្នុងប្រទេសម៉ាឡេស៊ី”។ នេះគឺ ជាសម្តីប្រកាស របស់លោក រដ្ឋមន្ត្រីក្រសួងការបរទេសម៉ាឡេស៊ី កាលពីល្ងាចថ្ងៃសៅរ៍ ទី ៤មីនា។ លោករដ្ឋមន្ត្រីម៉ាឡេស៊ីរូបនេះ បានបន្តថា ម៉ាឡេស៊ី នឹងបណ្តេញឯកអគ្គរដ្ឋទូតកូរ៉េខាងជើង ឲ្យចាកចេញពីម៉ាឡេស៊ី ព្រោះម៉ាឡេស៊ី បានស្នើសុំឲ្យកូរ៉េខាងជើង ធ្វើការសុំទោសជាផ្លូវការចំពោះពាក្យចោទប្រកាន់ របស់ខ្លួន មកលើម៉ាឡេស៊ី តែកូរ៉េខាងជើងមិនបានធ្វើ។
លោករដ្ឋមន្ត្រីបានបញ្ជាក់ទៀតថា ការសម្រេចចិត្តបណ្តេញទូតកូរ៉េខាងជើង គឺរដ្ឋាភិបាលម៉ាឡេស៊ី មានបំណងអះអាងថា ម៉ាឡេស៊ី ជាប្រទេសស្អាតស្អំ ហើយម៉ាឡេស៊ី មិនចង់ឲ្យប្រទេសខ្លួន ត្រូវបានកូរ៉េខាងជើង យកជាទីកន្លែងដើម្បីប្រព្រឹត្តិអំពើឧក្រិដ្ឋខុសច្បាប់នោះទេ។
សូមរំលឹកថា លោក គីម ជុងណាំ បងប្រុសឪពុកតែមួយ ម្តាយទីទៃ ជាមួយនឹងមេដឹកនាំផ្តាច់ការកូរ៉េខាងជើង គីម ជុងអ៊ុន ត្រូវបានគេធ្វើឃាតនៅក្នុងព្រលានយន្តហោះក្រុងកូឡាឡំពួរ កាលពីថ្ងៃទី ១៣ កុម្ភៈ។ សមត្ថកិច្ចម៉ាឡេស៊ី បានសន្និដ្ឋានយ៉ាងច្បាស់ថា លោក គីម ជុងណាំ ត្រូវបានស្រ្តីពីរនាក់ សម្លាប់ ដោយប្រើប្រាស់ សារធាតុពុលម្យ៉ាងដ៏សាហាវបំផុត ដែលត្រូវគេចាត់ទុកថាជាអាវុធសម្លាប់រង្គាល។
យ៉ាងណាក៏ដោយ រដ្ឋាភិបាលកូរ៉េខាងជើង បានច្រានចោល ការសន្និដ្ឋានរបស់សមត្ថកិច្ចម៉ាឡេស៊ីទាំងស្រុង។ ក្រុងព្យុងយ៉ាងបានអះអាងថា លោក គីម ជុងណាំ បានស្លាប់ដោយគាំងបេះដូង តែម៉ាឡេស៊ី បានឃុបឃិត ជាមួយប្រទេសពួកខ្មាំងផ្សេងទៀត ទំលាក់កំហុស មកលើរដ្ឋាភិបាល កូរ៉េខាងជើង។
លោកមេបញ្ជាការនគរបាលស៊ើបអង្កេតរបស់ម៉ាឡេស៊ី បានឆ្លើយតបទៅវិញថា ទោះកូរ៉េខាងជើងចង់និយាយថាយ៉ាងម៉េចក៏បាន តែការពិតនៅតែជាការពិត។ លោក គីម ជុងណាំ ត្រូវបានស្រ្តីពីរនាក់ សម្លាប់ដោយសារធាតុពុល ហើយរូបភាពវីដេអូ ព្រមទាំងកោសល្យវិច្ច័យរបស់អ្នកជំនាញ ប្រកបដោយសមត្ថភាព អាចអះអាងបានគ្រប់គ្រាន់។
សូមបញ្ជាក់ថា ក្រោយឃាតកម្មនេះ ម៉ាឡេស៊ី និងកូរ៉េខាងជើង បានឈ្លោះប្រកែកគ្នា តាមផ្លូវការទូត យ៉ាងចំហរ។ កន្លងមក ម៉ាឡេស៊ី គឺជាប្រទេសមួយដ៏កម្រ ដែលបានរក្សាទំនាក់ទំនងល្អស្និទស្នាលនឹងកូរ៉េខាងជើង ដោយបានចុះកិច្ចព្រមព្រៀងទ្វេរភាគី ជាមួយកូរ៉េខាងជើង អនុញ្ញាតិឲ្យប្រជាជនទាំងសងខាង អាចធ្វើដំណើរចេញចូល ដោយមិនចាំបាច់មានទិដ្ឋាការ។ ប៉ុន្តែក្រោយហេតុការណ៍ឃាតកម្មនេះ ម៉ាឡេស៊ី បានប្រកាសលប់ចោលកិច្ចព្រមព្រាងនេះ ចាប់ពីថ្ងៃចន្ទ ទី៦ មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ