ម៉ាឡាស៊ី កំពុងពិចារណា រឿងទិញយន្តហោះចម្បាំងបារាំង Rafale
លោកប្រធានាធិបតីបារាំង កំពុងបំពេញទស្សនកិច្ចនៅតំបន់អាស៊ីអាគ្នេយ៍។ ទៅដល់ម៉ាឡេស៊ី នៅថ្ងៃអង្គារទី២៨មីនានេះ លោកប្រធានាធិបតីបារាំង ត្រូវបានទទួលដោយលោកនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់។ ថ្នាក់ដឹកនាំទាំងពីរ បានពិភាក្សាគ្នា ពីចំណងសហប្រតិបត្តិការ ក្នុងវិស័យការពារជាតិ។ លោក នាយករដ្ឋមន្ត្រីម៉ាឡេស៊ី បានលើកឡើងថា រដ្ឋាភិបាលម៉ាឡេស៊ី កំពុងពិចារណាឲ្យបានល្អិតល្អន់ ទាក់ទិនទៅនឹងការបញ្ជាទិញយន្តហោះចម្បាំង Rafale របស់បារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
លោកណាជីប រ៉ាហ្សាក់ បានប្រកាសក្រោយពេលជួបពិភាក្សាជាមួយលោកប្រធានាធិបតីបារាំងថា ម៉ាឡេស៊ី អាចនឹងទិញយន្តហោះចម្បាំងថ្មីៗ ម៉ាកRafale របស់បារាំង តែដោយមិនបានបញ្ជាក់ថា ចំនួនប៉ុន្មានគ្រឿងទេ។ លោកនាយករដ្ឋមន្ត្រីម៉ាឡេស៊ី បន្តថា ប៉ុន្តែសម្រាប់ដំណាក់កាលនេះ ភាគីម៉ាឡេស៊ី មិនទាន់អាចសម្រេចចិត្តបានទេ ព្រោះត្រូវពិចារណា ពីតំលៃ ពីរបៀបវារៈ ជុំវិញការប្រគល់ទំនិញ និងការអនុវត្តនូវកិច្ចសន្យា។ តែយ៉ាងណា លោកនាយករដ្ឋមន្ត្រីម៉ាឡេស៊ី មិនបានភ្លេចលើកអួតសរសើរ អំពីគុណភាព និងភាពល្បីល្បាញ របស់យន្តហោះRafale បារាំងទេ។
លោក ហ្វ្រង់ស័រ ហូឡង់ ប្រធានាធិបតីបារាំង បានលើកឡើងថា រដ្ឋាភិបាលបារាំង ចាំនៅពីក្រោយម៉ាឡេស៊ី ដើម្បីជួយជ្រោមជ្រែង ការសម្រេចចិត្តរបស់ម៉ាឡេស៊ី។ លោកហូឡង់ បន្ថែមថា លោកជឿថាម៉ាឡេស៊ី នឹងធ្វើការជ្រើសរើសយកយន្តហោះRafaleបារាំង ព្រោះវាជាយន្តហោះចម្បាំង ដែលផលិតឡើងប្រកបដោយបច្ចេកវិទ្យាខ្ពស់បំផុតលើលោក។
អមដំណើរដោយរដ្ឋមន្ត្រីក្រសួងការពារជាតិ ទាំងសងខាង ថ្នាក់ដឹកនាំទាំងពីរ បានអញើញទៅមើល ការហោះហើរបង្ហាញខ្លួន របស់យន្តហោះRafale នៅមូលដ្ឋានទ័ពអាកាស Subang ខាងលិចក្រុងកូឡាឡំពួរ។
សូមបញ្ជាក់ថា វិស័យការពារជាតិ បារាំងនិងម៉ាឡេស៊ី មានចំណងសហប្រតិបត្តិការនឹងគ្នា ល្អគួរសម។ លោកនាយករដ្ឋមន្ត្រីម៉ាឡេស៊ី បានរំលឹកថា ម៉ាឡេស៊ី ធ្លាប់បានទិញសម្ភារៈបរិក្ខាកងទ័ព របស់បារាំងជាច្រើនរួចមកហើយ។ ក្រៅពីនេះ ម៉ាឡេស៊ី ក៏បានទិញនាវាមុជទឹកបាតសមុទ្រ និងយន្តហោះដឹកជញ្ជូនកងទ័ព A400M របស់បារាំងដែរ។
យន្តហោះRafale បារាំងកំពុងតែមានប្រជាប្រិយភាពយ៉ាងខ្លាំង។ ឆ្នាំ២០១៥ កាតា និងអេហ្ស៊ីប បានកុម្មង់ទិញម្នាក់ ២៤គ្រឿង។ បន្ទាប់មកនៅខែកញ្ញា ឆ្នាំ២០១៦ ឥណ្ឌា បានសម្រេចចិត្តទិញចំនួន៣៦គ្រឿង។ បើសិនជារដ្ឋាភិបាលម៉ាឡេស៊ី សម្រេចចិត្តថានឹងទិញមែន នោះម៉ាឡេស៊ី នឹងក្លាយជាប្រទេសអាស៊ានដំបូងគេបង្អស់ ដែលមានយន្តហោះចម្បាំងRafaleបារាំង ប្រើប្រាស់ក្នុងកងទ័ពអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ