មុននឹងចាកចេញពីម៉ាឡេស៊ី លោកទូតកូរ៉េខាងជើង ឆ្លៀតនិយាយរិះគន់ម៉ាឡេស៊ីទៀត
ក្នុងសំណុំរឿងវិបត្តិការទូតរវាងកូរ៉េខាងជើង និងម៉ាឡេស៊ី ក្រោយហេតុការណ៍ឃាតកម្មលោកគីមជុងណាំ បានជម្រុញឲ្យរដ្ឋាភិបាលម៉ាឡេស៊ី បណ្តេញឯកអគ្គរដ្ឋទូតកូរ៉េខាងជើង ចេញពីទឹកដីខ្លួន។ កាលពីល្ងាចថ្ងៃទី៦ មីនាម្សិលមិញ មុននឹងចាកចេញពីទីក្រុងកូឡាឡំពួរ នៅព្រលានយន្តហោះ លោកឯកអគ្គរដ្ឋទូតកូរ៉េខាងជើង បានឆ្លៀតនិយាយរិះគន់ម៉ាឡេស៊ីទៀត ថាបានដឹកនាំការស៊ើបអង្កេត លើសំណុំរឿងឃាតកម្មលោកគីម ជុងណាំ នេះដោយលំអៀង នឹងមានបំណងទំលាក់កំហុសលើកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:០៨
មុននឹងឡើងយន្តហោះ ចេញពីកូឡាឡំពួរ លោក កាង ឆុល ឯកអគ្គរដ្ឋទូតកូរ៉េខាងជើង បានឆ្លៀតនិយាយបន្ថែមថា អាជ្ញាធរម៉ាឡេស៊ី បានធ្វើការស៊ើបអង្កេត និងសន្និដ្ឋាន ក្នុងសំណុំរឿងឃាតកម្ម លោកគីម ជុងណាំ ដោយលំអៀងបំផុត។
ក្នុងនាមរដ្ឋាភិបាលកូរ៉េខាងជើង លោកទូតរូបនេះ បានបដិសេធ លទ្ធផលកោសល្យវិច្ច័យ និងការសន្និដ្ឋានរបស់អាជ្ញាធរម៉ាឡេស៊ី ដែលលោកបានចោទថា ធ្វើដោយអត្តនោម័តតែម្នាក់ឯង គ្មានការចូលរួមពីអ្នកជំនាញរបស់កូរ៉េខាងជើង។ មិនត្រឹមតែប៉ុណ្ណោះ លោកទូតកូរ៉េខាងជើង បានឆ្លៀតរិះគន់ថា អាជ្ញាធរម៉ាឡេស៊ី បានធ្វើការឃាត់ខ្លួន បុរសជនជាតិកូរ៉េខាងជើងម្នាក់ ដោយគ្មានភស្តុតាង អ្វីទាំងអស់។
ភ្លាមៗ ក្រោយលោកទូតកូរ៉េខាងជើងចេញផុតពីកូឡាឡំពួរ ក្រសួងការបរទេសកូរ៉េខាងជើង បានប្រកាសថា គេក៏បានសម្រេច បណ្តេញឯកអគ្គរដ្ឋទូតម៉ាឡេស៊ី ប្រចាំនៅក្រុងព្យុងយ៉ាងដែរ។
សូមបញ្ជាក់ថា ម៉ាឡេស៊ី បានកោះហៅឯកអគ្គរដ្ឋទូត និងបុគ្គលិកទូតទាំងអស់ នៅក្រុងព្យុងយ៉ាង ឲ្យចូលស្រុកវិញ តាំងតែពីក្រោយឃាតុកម្មភ្លាមម្លេះ។ រដ្ឋាភិបាលម៉ាឡេស៊ី បានទាមទារឲ្យរដ្ឋាភិបាលកូរ៉េខាងជើង សុំទោសខ្លួនជាសាធារណៈ ចំពោះសម្តីដែលចោទប្រកាន់មកលើសមត្ថកិច្ចម៉ាឡេស៊ី។
យោងតាមសមត្ថកិច្ចម៉ាឡេស៊ី លោក គីម ជុងណាំ បងប្រុសឪពុកតែមួយម្តាយទីទៃ ជាមួយនឹងលោក គីម ជុងអ៊ុន បានស្លាប់ប្រមាណតែ២០នាទីប៉ុណ្ណោះ ក្រោយពេលដែលស្ត្រីពីរនាក់ បានយកសារធាតុពុលទៅលាបលើមុខជនរងគ្រោះ។ បច្ចុប្បន្ននេះ ស្ត្រីពីរនាក់ កំពុងជាប់ឃុំឃាំង ម្នាក់ជាជនជាតិឥណ្ឌូណេស៊ី និងម្នាក់ទៀតជាជនជាតិវៀតណាម។ ស្ត្រីទាំងពីរ អាចប្រឈមមុខនឹងទោសប្រហារជីវិត។
ក្រុមស៊ើបអង្កេត ម៉ាឡេស៊ី សន្និដ្ឋានថា យ៉ាងហោចណាស់ មានមនុស្សជនជាតិកូរ៉េខាងជើង៨នាក់ ដែលបានចូលរួមរៀបចំឃាតកម្មដ៏សាហាវនេះ នៅលើទឹកដីម៉ាឡេស៊ី។ ក្នុងនោះ៤នាក់ បានរត់គេចចេញពីម៉ាឡេស៊ីហើយ ក្រោយពេលសម្រេចឃាតកម្មរួចរាល់។ អាជ្ញាធរម៉ាឡេស៊ី ទើបបានដោះលែងបុរសជនជាតិកូរ៉េខាងជើងម្នាក់ ដោយសារតែពុំមានភស្តុតាងដាក់បន្ទុក។
ដោយឡែក ជម្លោះការទូតរវាងប្រទេសទាំងពីរ បានរាលដាល ទៅដល់ការប្រកួតកីឡាបាល់ទាត់ ជម្រុះពានរង្វាន់អាស៊ី។ រដ្ឋាភិបាលម៉ាឡេស៊ីទើបបានសម្រេចហាមឃាត់ មិនឲ្យក្រុមកីឡាករបាល់ទាត់ជម្រើសជាតិខ្លួន ទៅជួបប្រកួតជាមួយនឹងក្រុមជំរើសជាតិកូរ៉េខាងជើង នៅក្រុងព្យុងយ៉ាង នៅថ្ងៃទី ២៨ មីនា ខាងមុខនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ