វៀតណាម៖ អតីតប្រធានធនាគារ២នាក់ ត្រូវចាប់ខ្លួន ក្នុងរឿងអាស្រូវបង្វិលប្រាក់ខុសច្បាប់
អតីតប្រធានធនាគារឯកជនពីរនាក់ នៅវៀតណាម ត្រូវបានអាជ្ញាធរចាប់ឃាត់ខ្លួន បន្ទាប់ពីមានដីកាចាប់ខ្លួន ទាក់ទិននឹងសំណុំរឿងបង្វិលប្រាក់ខុសច្បាប់ នៅក្នុងធនាគារ។ នៅមានមនុស្ស១២នាក់ផ្សេងទៀត ដែលជាប់ពាក់ព័ន្ធនឹងរឿងអាស្រូវនេះ ហើយដែលត្រូវបានអាជ្ញាធរវៀតណាម កំពុងតាមចាប់ខ្លួន។ វិស័យធនាគារវៀតណាម មិនថារដ្ឋ រឺឯកជន ត្រូវបានគេមើលឃើញថា ពោរពេញទៅដោយ សកម្មភាពមិនប្រក្រតី ដែលបានបង្ករឲ្យមានការខាតបង់ប្រាក់ របស់អតិថិជនរាប់រយលានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រសួងមហាផ្ទៃវៀតណាម បានចេញផ្សាយ នៅលើគេហទំព័ររបស់ខ្លួន នូវដីកាចាប់ឃាត់ខ្លួន ដែលក្នុងនោះមានឈ្មោះមនុស្ស១៤នាក់ ស្តីពីបទល្មើសធនាគារដ៏ធ្ងន់ធ្ងរ។ គិតមកត្រឹម ល្ងាចថ្ងៃអង្គារ ទី១សីហា មនុស្សពីរនាក់ត្រូវបានគេចាប់ខ្លួនបានហើយ ដែលជាអតីតប្រធានធនាគាឯកជនវៀតណាមមួយ ឈ្មោះ Sacombank។ មនុស្សទីមួយឈ្មោះ ផាន់ ហ៊ុយខាង ជាអតីតអគ្គនាយកធនាគារនេះ ចាប់ពីឆ្នាំ២០១២ មុននឹងត្រូវគេបណ្តេញចេញ កាលពីខែកក្កដា កន្លងទៅ។ ឯមនុស្សទីពីរ ឈ្មោះ ត្រាំ បេ អតីតអនុប្រធាន ហើយក៏ជាមនុស្សក្នុងត្រកូលអ្នកមានជាងគេបំផុត នៅវៀតណាម ដែលមានជំនួញអចលនទ្រព្យ និងគ្រឿងអលង្ការ។
សូមរំលឹកថា នេះគឺជារឿងរ៉ាវបន្ត នៃរឿងអាស្រូវធនាគារ ដែលបានកើតឡើង កាលពីខែកញ្ញាឆ្នាំ២០១៦ ដែលបានធ្វើឲ្យ បុគ្គលិកធនាគារ Vietnam Construction Bank ចំនួន៣៦នាក់ ជាប់ទោស ដែលករណីខ្លះ មានទៅដល់ជាប់គុក៣០ឆ្នាំ។ បុគ្គលិកធនាគារទាំងនោះ បានប្រើវិធីបង្វិលប្រាក់ ចេញពីគណនីរបស់អតិថិជនខ្លួន យកទៅបង្កើតជាកញ្ចប់ប្រាក់ ដើម្បីទទួលបាននូវកំចី ឲ្យទៅក្រុមហ៊ុនផ្សេងៗ។ សកម្មភាពបង្វិលប្រាក់ខុសច្បាប់នេះ បានបង្ករឲ្យខាតបង់ប្រាក់ ប្រមាណ៥៦០លានអឺរ៉ូ។
ករណីមួយទៀត កាលពីខែកក្កដា ឆ្នាំ២០១៥ អតីប្រធានក្រុមហ៊ុនប្រេងរបស់រដ្ឋវៀតណាម Petro Vietnam ឈ្មោះ ង្វៀន ស៊ាន់សុន ត្រូវបានគេចាប់ឃាត់ខ្លួន បន្ទាប់ពីក្រុមហ៊ុននេះ បានខាតបង់ប្រាក់ប្រមាណ៣៨លានដុល្លារ នៅក្នុងធនាគារOcean Bank។ ប្រធានធនាគារនេះ ដែលជាមហាសេដ្ឋីមួយរូបដែរនៅវៀតណាម ក៏ត្រូវបានគេចាប់ឃាត់ខ្លួនផងដែរ។
សូមបញ្ជាក់ថា ១០ឆ្នាំចុងក្រោយនេះ កំណើនសេដ្ឋកិច្ចវៀតណាម បានកើនឡើងល្អជាងគេនៅអាស៊ីអាគ្នេយ៍។ ក៏ប៉ុន្តែវិស័យធនាគារវៀតណាម នៅមិនទាន់ធ្វើឲ្យគេទុកចិត្តបានទេ ដោយសារតែគ្មានតម្លាភាព និងក្រិត្យក្រមត្រឹមត្រូវ។ ចាប់ពីឆ្នាំ២០១១មក រដ្ឋាភិបាលកុម្មុយនីស្តិវៀតណាម បានប្តេជ្ញាធ្វើកំណែទម្រង់វិស័យធនាគារ ដោយបានខិតខំផ្សាយពាណិជ្ជកម្ម បង្អួតពីការតាមចាប់បកមុខ បុគ្គលិកធនាគារ ឬអ្នកមានៗ ដែលរកស៊ីឃុបឃិតខុសច្បាប់ ក្នុងប្រព័ន្ធធានាគារជាដើម។ តែយ៉ាងណា លទ្ធផលជាក់ស្តែង នៃការធ្វើកំណែទម្រង់ស៊ីជម្រៅ នៅមិនទាន់ឆ្លើយតប ទៅតាមការចង់បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ