អនាគតប្រធានាធិបតីថ្មីហ្វីលីពីន ចង់ធ្វើហ្វីលីពីនជារដ្ឋសហព័ន្ធ
លោក រ៉ូឌ្រីហ្គោ ឌុយទែរតឺ អនាគតប្រធានាធិបតីថ្មីរបស់ហ្វីលីពីន បានប្រកាសថានឹងធ្វើវិមជ្ឈការ បែងចែងអំណាច ហើយកែប្រែហ្វីលីពីនជារដ្ឋសហព័ន្ធ ដើម្បីបិទបញ្ចប់ការប្រមូលផ្តុំអំណាច នៅតែក្នុងដៃរបស់ក្រុមបក្សពួកតែមួយ ដែលមានទីតាំងនៅរដ្ឋធានីម៉ានីល។ ប្រធានាធិបតីថ្មីនេះយល់ថា ការធ្វើវិមជ្ឈការអំណាច ក៏នឹងអាចបិទបញ្ចប់វិបត្តិបះបោរដណ្តើមឯករាជ្យ ដែលបានយាយីហ្វីលីពីន ជារៀងរហូតមក ដែរ។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃព្រហស្បតិ៍ ទី៣០មិថុនា លោក រ៉ូឌ្រីហ្គោ ឌុយទែរតឺ នឹងចូលកាន់តំណែងប្រធានាធិបតីហ្វីលីពីន ជាផ្លូវការ។ លោកបានសន្យាថា លោកនឹងធ្វើកំណែទម្រង់រដ្ឋធម្មនុញ្ញ ដើម្បីធ្វើវិមជ្ឈការអំណាច ហើយកែប្រែហ្វីលីពីន ឲ្យក្លាយជារដ្ឋសហព័ន្ធ។ ខេត្តទាំង៨១ របស់ហ្វីលីពីន នឹងត្រូវរៀបចំឲ្យក្លាយជារដ្ឋតូចៗ ចំណុះឲ្យរដ្ឋសហព័ន្ធកណ្តាល។ ចំណូលថវិកាមួយចំណែក នឹងទុកបំរុងទៅឲ្យតំបន់នីមួយៗចាត់ចែង ហើយអំណាចកណ្តាល ជាអ្នកចាត់ចែងកិច្ចការធំៗ ដូចជាវិស័យការបរទេស វិស័យកងទ័ពការពារជាតិ និងវិស័យពន្ធដាជាដើម។
លោក ប្រធានាធិបតីថ្មី បាននិយាយថា ប្រព័ន្ធគ្រប់គ្រងហ្វីលីពីនបច្ចុប្បន្ននេះ វាគ្រាន់តែជាការរៀបចំដើម្បីធ្វើយ៉ាងណា ឲ្យតែបក្សពួកអ្នកមានអំណាច មានទ្រព្យសម្បត្តិនៅក្រុងម៉ានីល បន្តនៅជញ្ជក់ឈាមហ្វីលីពីនតែប៉ុណ្ណោះ។ ពួកក្រាញននាលនឹងអំណាចទាំងនោះ សំងំនៅពីមួយជំនាន់ទៅមួយជំនាន់ ដោយមិនបានបែងចែកអំណាចគ្រប់គ្រងជោគវាសនារបស់ហ្វីលីពីន ទៅឲ្យអ្នកផ្សេងទេ។
សូមបញ្ជាក់ថា លោក រ៉ូឌ្រីហ្គោ ឌុយទែរតឺ គឺជាមេធាវី អាយុ៧១ឆ្នាំ ហើយធ្លាប់ជាចៅហ្វាយក្រុង Davao ភាគខាងត្បូងហ្វីលីពីន។ ក្នុងពេលឃោសនាបោះឆ្នោត លោកបានសន្យា ដាក់វិធានការឲ្យតឹងរឹង ដើម្បីបោសសម្អាតអំពើឧក្រិដ្ឋកិម្ម ការជួញដូរគ្រឿងញៀន ព្រមទាំងចលនាបះបោរបំបែកទឹកដីនៅតំបន់កោះភាគខាងត្បូង។ ប្រជាជនដែលបានបោះឆ្នោតឲ្យគាត់ បានគាំទ្រចង់បានមនុស្សថ្មីមកដឹកនាំប្រទេស ដែលមិនមែនជាបក្សពួករបស់អ្នកមានអំណាចមុនៗ ហើយមួយទៀត មតិសាធរណៈយល់ថា លោក រ៉ូឌ្រីហ្គោ ឌុយទែរតឺ ពិតជាមិនមែនជាមនុស្សល្មោភអំណាចនោះទេ។
គម្រោងធ្វើវិសោធនកម្ម កែប្រែហ្វីលីពីនជារដ្ឋសហព័ន្ធនេះ ហាក់ទទួលបានការគាំទ្រពីក្រុមឧទ្ទាមផ្តាច់ខ្លួនធំៗ។ តែយ៉ាងណា ការធ្វើវិសោធនកម្មរដ្ឋធម្មនុញ្ញ ត្រូវតែឆ្លងកាត់ការគាំទ្រពីសភាទាំងពីរអង្គ របស់ហ្វីលីពីន។ រដ្ឋធម្មនុញ្ញហ្វីលីពីន ដែលបានកែប្រែកាលពីឆ្នាំ១៩៨៧ នោះ មិនដែលបានទទួលវិសោធនកម្មម្តងទេ។
សម្រាប់បក្សពួករបស់លោកអតីប្រធានាធិបតី អាគីណូ បេននីណូវិញ បានរិះគន់ថា ការបំបែកហ្វីលីពីនឲ្យទៅជារដ្ឋសហព័ន្ធ នឹងធ្វើឲ្យប្រទេសធ្លាក់ទៅក្នុងភាពអន្តរាយ បែកបាក់គ្នា ហើយគំរោងរៀបចំរបស់ប្រធានាធិបតីថ្មីទៀតសោត គឺប្រហោងក្នុងពុំមានគិតគូរ ឲ្យគ្រប់ជ្រុងជ្រោយទេ។ យ៉ាងណាមិញ យោងតាមប្រសាសន៍លោក Tamario Rivera អ្នកវិភាគនយោបាយហ្វីលីពីនម្នាក់ បានយល់ថា ការបង្កើតរដ្ឋសហព័ន្ធ ត្រូវតែអំណាចកណ្តាលឲ្យរឹងមាំ តែផ្ទុយទៅវិញអំណាចកណ្តាលហ្វីលីពីន នៅទន់ខ្សោយខ្លាំង ដែលនាំឲ្យមានគ្រោះថ្នាក់។ រដ្ឋតូចៗ អាចយកឱកាសនេះ ពង្រឹងអំណាច ធ្វើអ្វីស្រេចតែនឹងចិត្ត បង្ករជាការបែកខ្ញែកគ្នាកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ