ប្រធានាធិបតីហ្វីលីពីន ស្នើទៅសភា សុំបន្តអនុវត្តច្បាប់អាជ្ញាសិក នៅភាគខាងត្បូង
លោក ឌុយទែរតឺ ប្រធានាធិបតីហ្វីលីពីន បានស្នើទៅសភាទាំងពីររបស់ហ្វីលីពីន ឲ្យពន្យាពេល ដើម្បីបន្តអនុវត្តច្បាប់អាជ្ញាសិក នៅតំបន់ប្រជុំកោះមីនដាណាវ ភាគខាងត្បូងហ្វីលីពីន តទៅទៀត។ សង្រ្គាម ដែលលោកប្រធានាធិបតីហ្វីលីពីន បានប្រកាសថា ដើម្បីបោសសំអាតចលនាជីហាតអ៊ីស្លាមនោះ នៅមិនទាន់ចប់នៅឡើយ ខណៈដែលចំនួនមនុស្សស្លាប់ និងត្រូវគេចាប់ខ្លួន ដោយគ្មានការអនុញ្ញាតពីតុលាការ បានកើនឡើងកាន់តែច្រើន។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃទី២៣ឧសភា លោកប្រធានាធិបតីហ្វីលីពីន បានប្រកាសប្រើច្បាប់អាជ្ញាសិក នៅតំបន់មីនដាណាវទាំងមូល។ ទីក្រុង ម៉ារ៉វី ចំណុចស្នូលនៃតំបន់នេះ បានក្លាយជាសមរភូមិប្រយុទ្ធ ដែលរដ្ឋាភិបាលហ្វីលីពីន អះអាងថា ជាការប្រយុទ្ធដើម្បីរំដោះតំបន់នេះ មិនឲ្យធ្លាក់ទៅក្នុងការគ្រប់គ្រងរបស់ក្រុមជីហាតអង្គការរដ្ឋអ៊ីស្លាម។ លោកប្រធានាធិបតីហ្វីលីពីន ថែមទាំងបានអះអាងថា នៅទីនោះ គឺមានទាំងជនជីហាតមកពីប្រទេសផ្សេង ដែលមានបំណងមកតាំងទី បង្កើតជាដែនដីកាលីហ្វា ក្នុងទឹកដីហ្វីលីពីន ដូចដែលពួកនេះបានធ្វើ នៅស៊ីរី និងអ៊ីរ៉ាក់។
ច្បាប់អាជ្ញាសិក ដែលមានសុពលភាព រយៈពេល៦០ថ្ងៃនេះ បានអនុញ្ញាតិឲ្យរដ្ឋាភិបាលប្រើកម្លាំងនគរបាល និងទាហាន ធ្វើការប្រយុទ្ធ ព្រមទាំងអាចចាប់ឃាត់ខ្លួនមនុស្ស រយៈពេល៣ថ្ងៃ ដោយមិនចាំបាច់មានសាដីកាពីតុលាការ។ លោក ឌុយទែរទឺ បានលើកឡើងថា ការប្រយុទ្ធនៅមិនទាន់បានជោគជ័យ ហើយបច្ចុប្បន្ននេះ នៅមានអាគារចំនួនជាង៦០០ខ្នង ដែលមានក្រុមជីហាតអ៊ីស្លាម បន្លំលាក់ខ្លួន។
ដើម្បីបន្តអនុវត្តច្បាប់អាជ្ញាសិកនេះ រដ្ឋាភិបាលហ្វីលីពីន ត្រូវការការយល់ព្រម ពីសភាទាំងពីរអង្គរបស់ហ្វីលីពីន។ តែយ៉ាងណា គេជឿថា វាមិនមែនជាការលំបាកទេ សម្រាប់លោកឌុយទែរតេ ដោយសារលោកមានសម្លេងភាគច្រើននៅសភាតំណាង។ យ៉ាងណាមិញ លោកប្រធានសភាតំណាង ធ្លាប់បាននិយាយថា លោកមិនមានអ្វីជំទាស់ និងបន្តអនុវត្តច្បាប់អាជ្ញាសិកនៅតំបន់មីនដាណាវទេ។
ដោយឡែក ក្រុមសមាជិកសភា មកពីគណបក្សប្រឆាំង បានដាក់ពាក្យប្តឹងទៅតុលាការកំពូលហ្វីលីពីន ប្រឆាំងនឹងច្បាប់អាជ្ញាសិកនេះ។ គណបក្សប្រឆាំងយល់ឃើញថា រដ្ឋាភិបាលលោកឌុយទែរតឺ ពុំបានផ្តល់ភស្តុតាងជាក់លាក់ ស្តីពីសកម្មភាពបះបោរបំបែកទឹកដី ធ្វើជាតំបន់កាលីហ្វាអ៊ីស្លាម របស់ពួកជីហាតឡើយ។ តែកាលពី២សប្តាហ៍មុន ចៅក្រមតុលាការកំពូលហ្វីលីពីន បានច្រានចោលពាក្យបណ្តឹងនេះ ដោយពុំមានផ្តល់ការពន្យល់ហេតុផលទេ។
សូមបញ្ជាក់ថា ខេត្តមីនដាណាវ មានមនុស្សរស់នៅប្រមាណ១០លាននាក់ ដែលភាគច្រើនជាអ្នកកាន់សាសនាអ៊ីស្លាម។ ជារឿយៗ តែងតែមានការបះបោរនៅក្នុងតំបន់នេះ ដោយសារប្រជាជនអ្នកកាន់សាសនាអ៊ីស្លាម យល់ថា រដ្ឋបាលកណ្តាលហ្វីលីពីន មិនយកចិត្តទុកដាក់លើពួកគេ។ ពិតណាស់ដែលក្រុមជ្រុលនិយមអ៊ីស្លាម បានកើនឥទ្ធិពលកាន់តែខ្លាំង តែការប្រើកម្លាំងទាហាន បើកការវាយប្រយុទ្ធ បានបង្កឲ្យមាន ជនរងគ្រោះរាប់ម៉ឺនគ្រួសារ ដែលសុទ្ធតែជាជនស្លូតត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ