អាស៊ាន “បារម្ភខ្លាំង” អំពីសកម្មភាពសាកល្បងនុយក្លេអ៊ែរ របស់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៧:០៣
ជំនួបកំពូលនៃរដ្ឋមន្ត្រីការបរទេស ប្រទេសសមាជិកអាស៊ានទាំង១០ កំពុងប្រព្រឹត្តិធ្វើទៅនៅទីក្រុងម៉ានីល ប្រទេសហ្វីលីពីន ចាប់ពីថ្ងៃសុក្រ ទី២៨មេសានេះ ដល់ថ្ងៃសៅរ៍ទី២៩ មេសា។ មានសំណុំរឿងជាច្រើន ដែលប្រទេសសមាជិកអាស៊ាន ត្រូវពិគ្រោះគ្នា ដើម្បីសម្រេចយកគោលជំហរតែមួយ។ ក្នុងនោះសំណុំរឿងនុយក្លេអ៊ែរ កូរ៉េខាងជើង ព្រមទាំងភាពតានតឹងប្រឈមមុខដាក់គ្នា ផ្នែកអាវុធ រវាងសហរដ្ឋអាមេរិក និងកូរ៉េខាងជើង គឺជាសំណុំរឿងក្តៅគគុក ដែលទាមទារឲ្យសហគមន៍អាស៊ាន ត្រូវតែធ្វើការអំពាវនាវរួមគ្នា។ សំណុំរឿងសមុទ្រចិន ខាងត្បូងក៏គេរំពឹងថា នឹងត្រូវលើកមកនិយាយដែរ។
សមាគមអាស៊ាន ដែលកន្លងមកតែងតែសន្យា ថានៅឆ្ងាយពីបញ្ហានយោបាយ ហើយគិតគូរតែពីបញ្ហាសេដ្ឋកិច្ចនោះ ពេលនេះ ត្រូវតែបង្ខំចិត្ត យកសំណុំរឿងកូរ៉េខាងជើង មកនិយាយព្រោះថា វិបត្តិនេះវាអាចបង្ករជាអស្ថិរភាពតំបន់ ហើយដែលវានឹងបង្ករជាផលអវិជ្ជាមាន ដល់វិស័យសេដ្ឋកិច្ច។
រដ្ឋមន្ត្រីការបរទេសកូរ៉េខាងជើង សរសេរលិខិតសុំឲ្យអាស៊ានជួយ៖
ចង់មិនចង់ សមាគមអាស៊ាន ក៏រងសំពាធដែរ ដោយសារតែ កូរ៉េខាងជើង បានផ្ញើរលិខិតមួយ កាលពីថ្ងៃសុក្រទី២៧មេសានេះ មកកាន់អគ្គលេខាធិការអាស៊ាន។ នេះជាលើកដំបូងហើយ ដែលកូរ៉េខាងជើង បានចេញប្រតិបត្តិការការទូត ស្វែងរកការគាំទ្រ ពីសំណាក់ សមាជិកអាស៊ានទាំង១០។ លិខិតដែលចុះហត្ថលេខា ដោយលោក Ri Yong-Ho រដ្ឋមន្ត្រីការបរទេសកូរ៉េខាងជើង ដែលអ្នករាយការណ៍ព័ត៌មានបារាំង AFP បានអាន គឺមានខ្លឹមសារ ជារួម សុំឲ្យសមាគមប្រជាជាតិអាស៊ីអាគ្នេយ៍ ចេញសេចក្តីប្រកាសគោលជំហររួមមួយ ដើម្បី ទប់ស្កាត់ការវាយប្រហារដោយអាវុធនុយក្លេអ៊ែរ ពីសំណាក់សហរដ្ឋអាមេរិក មកលើកូរ៉េខាងជើង។
លោក រដ្ឋមន្ត្រីកូរ៉េខាងជើងសរសេររាយរ៉ាប់ថា ឧបទ្វីបកូរ៉េបច្ចុប្បន្ននេះ កំពុងស្ថិតនៅមាត់ទ្វារសង្រ្គាម ដែលនេះគឺដោយសារតែសកម្មភាពកំញើញ របស់អាមេរិក តែម្នាក់គត់។ លោករដ្ឋមន្ត្រីកូរ៉េខាងជើង ក៏បានលើកឡើងអំពីការធ្វើសមយុទ្ធយោធារួមគ្នា រវាងកូរ៉េខាងត្បូង និងអាមេរិក កន្លងមក ដែលដោយសារតែមូលហេតុនេះហើយ ទើបកូរ៉េខាងជើង ត្រូវតែបង្ខំចិត្ត ផលិតអាវុធដើម្បីទុកការពារខ្លួន។ លោកសរសេរក្នុងលិខិតថា លោកសង្ឃឹម នឹងជឿទុកចិត្តប្រទេសសមាជិកសហគមអាស៊ាន ដែលកន្លងមកតែងតែផ្តល់អាទិភាព ដល់វិស័យសន្តិសុខ និងសន្តិភាពក្នុងតំបន់នោះ នឹងចាប់យកបញ្ហាសមយុទ្ធយោធារួមគ្នា រវាងអាមេរិក និងកូរ៉េខាងត្បូងនេះ មកជជែកគ្នា ដើម្បីកុំឲ្យមានសកម្មភាពនេះបន្តទៀត ធ្វើឲ្យប៉ះពាល់ស្ថិរភាពតំបន់។
ជារួមលិខិតរបស់លោករដ្ឋមន្ត្រីការបរទេសកូរ៉េខាងជើង មានខ្លឹមសារ អូសទាញ ប្រទេសសមាជិកអាស៊ាន ឲ្យស្អប់កូរ៉េខាងត្បូង និងអាមេរិក ដែលប្រើប្រាស់កងទ័ពនឹងអាវុធ មកសំឡុតកូរ៉េខាងជើង និងគំរាមដល់ស្ថិរភាព សន្តិភាពនៃតំបន់អាស៊ីប៉ាស៊ីហ្វិក។ ក្នុងន័យនេះ គឺមានន័យថា កូរ៉េខាងជើងសុំអង្វរ ឲ្យអាស៊ាន គាំទ្រខាងខ្លួន ហើយថ្កោលទោសសកម្មភាពកំញើញ របស់សហរដ្ឋអាមេរិក។
អាស៊ាន៖ “កូរ៉េខាងជើង ត្រូវតែគោរពការហាមឃាត់របស់អង្គការសហប្រជាជាតិ”
តែទីបំផុត សមាជិកអាស៊ានទាំង១០ បានចេញសេចក្តីប្រកាសរួមមួយ ដែលសេចក្តីប្រកាសគោលជំហររួមនោះ គឺគ្មានអ្វីគួរឲ្យភ្ញាក់ផ្អើលទេ គឺសមាគមអាស៊ាន បានសម្តែង ការព្រួយបារម្ភខ្លាំង ទាក់ទិនទៅនឹងសកម្មភាពសាកល្បងអាវុធនុយក្លេអ៊ែរ និងមីស៊ីល បាលីស្ទីក ម្តងហើយម្តងទៀត របស់កូរ៉េខាងជើង។ រដ្ឋមន្ត្រីការបរទេសអាស៊ានទាំង១០ ប្រកាសយ៉ាងម៉ឺងម៉ាត់ថា កូរ៉េខាងជើង ត្រូវតែគោរពការសម្រេចរបស់អង្គការសហប្រជាជាតិ ដែលបានហាមឃាត់ មិនឲ្យធ្វើការសាកល្បងអាវុធនុយក្លេអ៊ែរ និងបាលីស្ទ៊ីក។
លិខិតរបស់រដ្ឋមន្ត្រីកូរ៉េខាងជើង មិនបានធ្វើឲ្យសមាគមអាស៊ានប្តូរចិត្តទេ។ ក្នុងចំណោមប្រទេសអាស៊ានទាំង១០ ជាទូទៅគេដឹងថា មានកម្ពុជា និងឡាវ ដែលកន្លងមក មានទំនាក់ទំនងល្អជាមួយនឹង កូរ៉េខាងជើង។ តែយ៉ាងណា ក្នុងសំណុំរឿងនេះ វាជារឿងមិនអាចទៅរួចទេ ដែលសមាជិកអាស៊ាន ត្រូវទៅថ្កោលទោសកូរ៉េខាងត្បូង និងសហរដ្ឋអាមេរិក ដែលសុទ្ធតែជាដៃគូសេដ្ឋកិច្ចដ៏ធំរបស់អាស៊ាន។ តែយ៉ាងណា នៅក្នុងសេចក្តីប្រកាសនេះ អាស៊ាន បានអំពាវនាវ សុំឲ្យភាគីពាក់ព័ន្ធទាំងអស់ មិនថាកូរ៉េទាំងពីរ សហរដ្ឋអាមេរិក ជប៉ុន ឬចិន ត្រូវតែបន្ធូរបន្ថយឥរិយាបថរៀងៗខ្លួន ប្រឹងអត់ធ្មត់ កុំជុំរុញ រឺក៏ធ្វើអ្វី ដែលអាចធ្វើឲ្យស្ថានការណ៍ កាន់តែធ្ងន់ធ្ងរជាងនេះ។
ដាក់ទណ្ឌកម្មឲ្យធ្ងន់លើកូរ៉េខាងជើង និងដាក់សំពាធលើចិន
ស្ថិតក្នុងសំណុំរឿងកូរ៉េខាងជើងនេះដែរ លោករដ្ឋមន្ត្រីការបរទេសអាមេរិក Rex Tillerson នឹងត្រូវដឹកនាំ កិច្ចប្រជុំពិសេសមួយ រវាងរដ្ឋមន្ត្រីការបរទេសទាំង១៥ប្រទេស នៃសមាជិកក្រុមប្រឹក្សាសន្តិសុខ អង្គការសហប្រជាជាតិ។ តាមការឲ្យដឹង កិច្ចប្រជុំពិសេសនាពេលនេះ គឺលោក Rex Tillerson មានគំរោង អូសទាញសមាជិកក្រុមប្រឹក្សាសន្តិសុខ ឲ្យសម្រេចដាក់ទណ្ឌកម្មបន្ថែម គ្រប់រូបភាព គ្រប់មធ្យោបាយ ដើម្បីដាក់សំពាធ លើកូរ៉េខាងជើង។
យុទ្ធសាស្ត្ររបស់រដ្ឋាភិបាលលោកដូណាល់ ត្រាំ នាពេលកន្លងមក ដូចយើងឃើញហើយ គឺត្រូវតែគំរាមប្រើកំលាំង បើសិនជាមិនព្រមនិយាយគ្នាតាមសំរួល។ ជាមួយគ្នានេះ រដ្ឋាភិបាលអាមេរិក ក៏បានដាក់សំពាធទៅលើចិន ដែរ ថាត្រូវតែប្រឹងប្រែង អូសទាញកូរ៉េខាងជើង ព្រោះមានតែចិនតែម្នាក់គត់ ដែលនៅអាចមានអំណាច លើកូរ៉េខាងជើង។ ក្នុងន័យនេះ យុទ្ធសាស្ត្រអាមេរិក គឺចង់ទំលាក់ការទទួលខុសត្រូវខ្លះ ទៅលើចិន បើសិនជាសង្រ្គាមប្រើកំលាំង ផ្ទុះមែននោះ ព្រោះមកពីចិន មិនបានជួយបង្រ្កាបកូរ៉េខាងជើង។
អាមេរិក គ្មានចេតនាចង់ផ្តួលរំលំរបបកូរ៉េខាងជើងទេ
នៅលើកញ្ចក់ទូរទស្សន៍ FoxNews លោក រដ្ឋមន្ត្រីការបរទេសអាមេរិកបានសន្យាថា សហរដ្ឋអាមេរិក មិនមានចេតនាណាមួយ ទៅផ្តួលរំលំរបបដឹកនាំកូរ៉េខាងជើង រឺក៏ទៅជំរុញឲ្យកូរ៉េទាំងពីរ ឆាប់រួបរួមគ្នាឡើងវិញនោះទេ។ អ្វីដែលអាមេរិកចង់បាន គឺមិនខុសពីចិនឡើយ គឺចង់ឲ្យឧបទ្វីបកូរ៉េ លែងមានអាវុធនុយកក្លេអ៊ែរតទៅទៀត។ កាលណាគ្មានការគំរាមកំហែង នៃអាវុធនុយក្លេអ៊ែរ កូរ៉េខាងជើងនឹងមានស្ថិរភាព ហើយអាមេរិក ក៏ដូចជាដៃគូផ្សេងទៀត ត្រៀមខ្លួន ចាំជួយអភិវឌ្ឍន៍សេដ្ឋកិច្ចរបស់កូរ៉េខាងជើង។
យើង ឃើញថា ទន្ទឹមគ្នាដែលអាមេរិក ដាក់សំពាធទៅលើចិន អាមេរិក ក៏បាននិយាយលួងចិត្តរដ្ឋាភិបាលចិនថា កុំឲ្យភ័យដែរ។ កន្លងមក ដូចយើងបានដឹងស្រាប់ គឺចិន មិនចង់ធ្វើបាបកូរ៉េខាងជើង ព្រោះចិនចង់រក្សារបបផ្តាច់ការនេះ ឲ្យនៅដ៏រាប ដើម្បីទប់មិនឲ្យកូរ៉េទាំងពីររួបរួមគ្នាវិញ ក្លាយជាប្រទេសសេរី នៅក្រោមឥទ្ធិពលរបស់អាមេរិក។
កូរ៉េខាងត្បូង បដិសេធមិនព្រមបង់ប្រាក់ថ្លៃប្រព័ន្ធខែលមីស៊ីលអាមេរិក
ចំពោះកូរ៉េខាងត្បូង វិបត្តិនយោបាយក្នុងស្រុក កំពុងមានស្រាប់ទៅហើយ ក្រោយការទម្លាក់លោកស្រីប៉ាក់ គុនហេ។ បន្ថែមបញ្ហា ការដាក់តាំងប្រព័ន្ធខែលមីស៊ីលនេះមួយទៀត គឺបានធ្វើឲ្យមានការបែងចែងមតិសាធារណៈជាពីរ។ ដូច្នេះហើយ បានជាមេដឹកនាំ កូរ៉េខាងត្បូង យកលេសនេះ បដិសេធមិនបង់ប្រាក់ទៅឲ្យសហរដ្ឋអាមេរិក ជំរុញឲ្យអាមេរិក ឈប់ប្រើកំលាំង កំញើញលើកូរ៉េខាងជើងតទៅទៀត៕
ការបដិសេធ មិនបង់ប្រាក់១ពាន់លានដុល្លារ ថ្លៃចំណាយដាក់តាំងប្រព័ន្ធខែល បំផ្លាញមីស៊ីល (THAAD) អាចជះផលវិជ្ជមានខ្លះ ទៅដល់ការដោះស្រាយសំណុំរឿងកូរ៉េខាងជើងនេះ។ ព្រោះថា បើកូរ៉េខាងត្បូងមិនបង់ប្រាក់ទេនោះ មានន័យថា រដ្ឋាភិបាលលោកដូណាល់ ត្រាំ ត្រូវតែបង្ខំចិត្ត បញ្ឈប់ការតាំងប្រព័ន្ធបំផ្លាញមីស៊ីលនេះ។ ដូចយើងដឹងស្រាប់ រដ្ឋាភិបាលលោកត្រាំ មិនចូលចិត្តធ្វើអ្វីទៅ ទាំងខាតទេ។
ដូច្នេះបើអាមេរិក ដកប្រព័ន្ធខែលមីស៊ីលចេញពីកូរ៉េខាងត្បូង មានន័យថា ចិន ក៏អាចស្ងប់ត្រជាក់ចិត្តវិញដែរ ហើយអាចជួយនិយាយបញ្ចុះបញ្ចូលកូរ៉េខាងជើង។ ក៏ប៉ុន្តែ សួរថា តើកូរ៉េខាងជើង អាចស្ងប់ទៅវិញដែររឺទេ ឬក៏កាន់តែអាងចាង ដោយសារតែលែងមានប្រព័ន្ធខែលមីស៊ីល របស់អាមេរិក នៅលើដីកូរ៉េខាងត្បូង? ដូច្នេះអ្វីៗ វាអាស្រ័យលើកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ