អាហ្វហ្កានីស្ថាន៖ ភេរវកម្មស្នាដៃក្រុមជីហាតអង្គការរដ្ឋអ៊ីស្លាម ស្លាប់៦នាក់ នៅក្រុងកាប៊ូល
យ៉ាងហោចណាស់ មានមនុស្ស៦នាក់ បានស្លាប់ និងរបួស៣នាក់ នៅក្រុងកាប៊ូល រដ្ឋធានីអាហ្វហ្កានីស្ថានដោយអំពើភេរវកម្មបំផ្ទុះគ្រាប់បែកមួយ នៅព្រឹកថ្ងៃចន្ទនេះ នៅក្បែរទីស្នាក់ការស៊ើបការណ៍សំងាត់។ ភ្លាមៗ ក្រុមជីហាតអង្គការរដ្ឋអ៊ីស្លាម បានចេញមុខ អះអាងថានេះជាស្នាដៃរបស់ពួកគេ។ ក្នុងឆ្នាំ២០១៧នេះ អាហ្វហ្កានីស្ថាន បានរងអំពើភេរវកម្មជាច្រើនដង ទាំងបង្កឡើងដោយក្រុមតាលីបង់ និងទាំងក្រុមជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ហេតុការណ៍បំផ្ទុះគ្រាប់បែកអត្តឃាត បានកើតឡើងនៅវេលាព្រឹក ថ្ងៃចន្ទ ទី២៥ ធ្នូ ក្នុងពេលដែលបុគ្គលិក កំពុងធ្វើដំណើរមកដល់កន្លែងធ្វើការ នៅតាមដងផ្លូវដ៏ធំមួយ ក្នុងក្រុងកាប៊ូល។ មនុស្ស៦នាក់ ដែលកំពុងស្ថិតក្នុងរថយន្តមួយ នៅនឹងកន្លែងកើតហេតុ ត្រូវស្លាប់មួយរំពេច និង៣នាក់ផ្សេងទៀត រងរបួសធ្ងន់។ នៅលើគេហទំព័រ Amaq របស់ក្រុមជីហាតអង្គការរដ្ឋអ៊ីស្លាម បានសរសេរថា ភេរវកម្មនេះ គឺជាស្នាដៃបង្គាប់បញ្ជា ដោយក្រុមជីហាតនេះតែម្តង។
អ្នកនាំពាក្យក្រសួងមហាផ្ទៃអាហ្វហ្កានីស្ថាន បានលើកឡើងថា គេនៅមិនទាន់ច្បាស់ថា ភេរវកម្មនេះ មានបំណងវាយប្រហារ គោលដៅណាមួយ ឲ្យពិតប្រាកដទេ។ ក៏ប៉ុន្តែ កន្លែងកើតហេតុនេះ ស្ថិតនៅមិនឆ្ងាយប៉ុន្មាន ពីការិយាល័យស៊ើបការណ៍សំងាត់របស់អាហ្វហ្កានីស្ថាន (NDS)។ ជាងនេះទៅទៀត ភេរវកម្មនេះ កើតឡើង មួយសប្តាហ៍ ក្រោយហេតុការណ៍ មួយទៀត ដែលមានក្រុមជីហាតមួយក្រុម បានសម្រុកចូលទៅប៉ុនប៉ងសម្លាប់ទាហ៊ាន នៅឯបន្ទាយហ្វឹកហាត់ នៅភាគខាងជើងក្រុងកាប៊ូល របស់ការិយាល័យស៊ើបការណ៍សំងាត់អាហ្វហ្កានីស្ថានដែរ។
សូមបញ្ជាក់ថា អាហ្វហ្កានីស្ថានកំពុងប្រឈមមុខ នឹងការគំរាមកំហែងភេរវកម្ម របស់ក្រុមភេរវកម្មធំពីរ ទីមួយគឺក្រុមអាល់កាយដាតាលីបង់ និងទី២គឺក្រុមជីហាតអង្គការរដ្ឋអ៊ីស្លាម ដែលទើបតែបានពង្រីកឥទ្ធិពលនៅទីនោះ។ កាលពីថ្ងៃទី ៣១ ឧសភា កន្លងទៅ ភេរវកម្មបំផ្ទុះរថយន្តមួយ បានផ្តាច់ជីវិតមនុស្ស១៥០នាក់ និងរបួសប្រមាណ៤០០នាក់ នៅក្រុងកាប៊ូល។
ក្រៅពីសំដៅវាយប្រហារ អាជ្ញាធរ ឬ កងកម្លាំងអាហ្វហ្កានីស្ថាន ក្រុមជីហាតភេរវកម្មទាំង២ក្រុម ក៏បានបន្ថែមការវាយប្រហារភេរវកម្ម ដោយសំដៅសំលាប់សហគមន៍អ្នកកាន់សាសនាគ្រិស្ត និងអ្នកកាន់សាសនាអ៊ីស្លាម និកាយឈីអ៊ីត នៅអាហ្វហ្កានីស្ថាន ផងដែរ។
កងកម្លាំងរក្សាសន្តិសុខអាហ្វហ្កានីស្ថាន នគរបាល ក៏ដូចជាទាហាន ស្ថិតក្នុងស្ថានភាពមួយដ៏លំបាក ចុះទន់ខ្សោយជាលំដាប់ ដោយត្រូវប្រឈមមុខនឹងបញ្ហាខ្វះការហ្វិកហាត់ ខ្វះសម្ភារៈ គ្មានប្រាក់បៀរវត្ស៍។ មិនត្រឹមតែប៉ុណ្ណោះ អំពើពុករលួយក្នុងជួរកងនគរបាល និងកងទ័ព បានធ្វើឲ្យកងកម្លាំងបាក់ទឹកចិត្ត ហើយបានរត់ចោលជួរ មួយឆ្នាំៗ រាប់ពាន់នាក់។ ចំណែកកងកម្លាំងសម្ព័ន្ធមិត្តអន្តរជាតិ ដឹកនាំដោយទាហានអាមេរិក ក៏បានដកទ័ពម្តងបន្តិចៗ ចាប់តាំងពីឆ្នាំ២០១៤មកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ