អូស្រ្តាលី និងឥណ្ឌូណេស៊ី ព្រមព្រៀងចេញល្បាតរួមគ្នា ក្នុងសមុទ្រចិនខាងត្បូង
ក្រសួងការបរទេសឥណ្ឌូណេស៊ី និងអូស្រ្តាលី បានប្រកាសឲ្យដឹង នៅថ្ងៃអង្គារទី១ វិច្ឆិកានេះថា ប្រទេសទាំងពីរ បានយល់ព្រមគ្នា ក្នុងការបើកបេសកកម្មចេញល្បាតរួមគ្នាក្នុងសមុទ្រ នៅក្នុងដែនទឺកអន្តរជាតិនៃសមុទ្រចិនខាងត្បូង។ ចិនដែលកំពុងតែអនុវត្តឆន្ទានុសិទ្ធិ ទៅលើការកាន់កាប់តំបន់សមុទ្រចិនខាងត្បូង សឹងតែទាំងស្រុងនោះ នៅមិនទាន់មានប្រតិកម្មតបនៅឡើយទេ ទាក់ទិននឹងដំណឹងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
នៅតាមកញ្ចក់ទូរទស្សន៍ABC លោកស្រី Julie Bishop រដ្ឋមន្ត្រីក្រសួងការបរទេសអូស្ត្រាលី បានប្រកាសថា រដ្ឋាភិបាលអូស្រ្តាលីនិងឥណ្ឌូណេស៊ី បានយល់ព្រមគ្នា ដើម្បីពិចារណារិះរកនូវកិច្ចសហប្រតិបត្តិការ ក្នុងវិស័យផ្លូវសមុទ្រឲ្យបានកាន់តែខ្លាំងក្លា ជាមួយគ្នា។ ក្នុងនោះគឺមានន័យថា ប្រទេសទាំងពីរ និងសហការគ្នា ធ្វើការរួមគ្នា នៅក្នុងតំបន់សមុទ្រចិនខាងត្បូង និងសមុទ្រស៊ូលូ។ លោកស្រីរដ្ឋមន្ត្រីបញ្ជាក់ទៀតថា កិច្ចសហប្រតិបត្តិការទាំងនេះ គឺប្រទេសទាំងពីរអនុវត្តដោយគោរពទៅតាមក្រិត្យក្រមច្បាប់សមុទ្រអន្តរជាតិ។
យ៉ាងណាមិញ កាលពីមួយសប្តាហ៍កន្លងទៅ លោករដ្ឋមន្ត្រីក្រសួងការពារជាតិឥណ្ឌូណេស៊ី ធ្លាប់បានបង្ហើបឲ្យដឹងរួចមកហើយថា ក្នុងពេលឆាប់ៗនេះ ឥណ្ឌូណេស៊ី និងអូស្ត្រាលី នឹងចេញល្បាតរួមគ្នា ក្នុងសមុទ្រចិនខាងត្បូង ដោយបេសកកម្មនេះ ត្រូវគេប្រសិទ្ធិនាមថា “កងល្បាតសន្តិភាព”។
គួររំលឹកថា តំបន់សមុទ្រចិនខាងត្បូង គឺជាតំបន់សំបូរទៅដោយធនធានក្រោមសមុទ្រ ហើយដែលបច្ចុប្បន្ន កំពុងមានជម្លោះក្តៅគគុក រវាងចិន និងប្រទេសអាស៊ីអាគ្នេយ៍មួយចំនួន ដូចជាហ្វីលីពីន វៀតណាម ម៉ាឡេស៊ីនិងឥណ្ឌូណេស៊ីជាដើម។ ចិនដែលគូសផែនទីដោយអត្តនោម័ត វាទយកផ្ទៃទឹកនិងកោះសឹងតែទាំងស្រុងនៃតំបន់នេះ បានចេញល្បាតហាមឃាត់មិនឲ្យមានចរាចរណ៍ក្នុងតំបន់ជាប់ជម្លោះ។ មិនត្រឹមតែប៉ុណ្ណោះ ចិនបានចាប់ផ្តើម ចាក់ដីបំពេញតាមចន្លោះកោះតូចៗ ដើម្បីសាងសង់កំពង់ផែ និងមូលដ្ឋានទ័ព ដោយគ្មានការព្រមព្រៀងពីប្រទេសពាក់ព័ន្ធ ទៀតផង។
អូស្ត្រាលី មិនមែនជាប្រទេសជាប់ពាក់ព័ន្ធក្នុងជម្លោះនេះ ជាមួយចិនទេ តែកន្លងមកអូស្ត្រាលី តែងតែប្រកាន់ជំហររឹងមាំ ជាមួយចិន ដោយបានអះអាងសិទ្ធិរបស់អូស្ត្រាលី ក្នុងការធ្វើចរាចរណ៍នាវា នៅក្នុងដែនសមុទ្រអន្តរជាតិ នៃតំបន់សមុទ្រចិនខាងត្បូង ដោយគោរពទៅតាមច្បាប់អន្តរជាតិ។
ដោយឡែក ខុសពីប្រទេសដ៏ទៃ ដូចជាហ្វីលីពីន និងវៀតណាម ដែលកំពុងទាមទារអធិបតេយ្យភាពលើដែនកោះ ជាមួយនឹងចិន ឥណ្ឌូណេស៊ី មិនមានជម្លោះអធិបតេយ្យជាមួយចិនទេ។ វិវាទរវាងឥណ្ឌូណេស៊ី និងចិន គឺទាក់ទងទៅនឹងតំបន់ដែនទឹកដែលជាដែននេសាទ។ ដែននេសាទនេះ ត្រូវបានឥណ្ឌូណេស៊ីចាត់ទុកថា វាស្ថិតក្នុងតំបន់សេដ្ឋកិច្ចផ្តាច់មុខរបស់ខ្លួន តែនាវាល្បាតចិន តែងតែចេញមកហាមឃាត់ទូកនេសាទឥណ្ឌូណេស៊ីជារឿយៗ បង្កជាការប៉ះទង្គិចគ្នា។ យ៉ាងណាមិញ លោកJoko Widodo ប្រធានាធិបតីឥណ្ឌូណេស៊ី បានជិះនាវាចម្បាំងទៅពិនិត្យតំបន់មានវិវាទ កាលពីខែមិថុនា ដើម្បីជាការបង្ហាញកម្លាំង ថាឥណ្ឌូណេស៊ីមិនចុះញ៉ម ជាមួយនឹងចិនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ