ឥណ្ឌា-រុស្ស៊ី៖ លោកពូទីន ទទួលលោកម៉ូឌីនៅក្រុងវ្លាឌីវ៉ូស្តុក
ចុះផ្សាយនៅថ្ងៃ៖
ស្តាប់ - ០៧:០៤
លោកណារិន្ទ្រ ម៉ូឌី នាយករដ្ឋមន្ត្រីឥណ្ឌា ត្រូវបានលោក វ្លាឌីមៀ ពូទីន ប្រធានាធិបតីរុស្ស៊ី អញ្ជើញជាភ្ញៀវកិត្តិយស ក្នុងឱកាសបើក “វេទិកាសេដ្ឋកិច្ចភាគខាងកើត” ដែលកំពុងតែប្រព្រឹត្តិធ្វើទៅ នៅឯទីក្រុងវ្លាឌីវ៉ូស្តុក ភាគខាងកើតបង្អស់ នៃទឹកដីរុស្ស៊ី។ រុស្ស៊ី និងឥណ្ឌា ធ្លាប់ស្និទនឹងគ្នា កាលពីជំនាន់អតីតសហភាពសូវៀត ហើយទំនាក់ទំនងដ៏ស្និទនេះ បានបន្តមកដល់បច្ចុប្បន្ន ជាពិសេសនៅក្នុងវិស័យកងទ័ព។ តែយ៉ាងណា នៅក្នុងឱកាសវេទិកាសេដ្ឋកិច្ចក្រុងវ្លាឌីវ៉ូស្តុកនេះ គឺជាពេលវេលា ឲ្យមេដឹកនាំនៃមហាប្រទេសទាំង២នេះ បានជួបនិយាយគ្នា អំពីទំនាក់ទំនង សេដ្ឋកិច្ចពាណិជ្ជកម្ម វិញម្តង។
ឥណ្ឌា និងក្លាយជាដៃគូថ្មីរបស់រុស្ស៊ី ក្នុងការវិនិយោគនៅភាគខាងកើត
វាមិនមែនជារឿងចៃដន្យទេ ដែលលោកពូទីន អញ្ជើញលោកណារិន្ទ្រ ម៉ូឌី មកជាភ្ញៀវកិត្តិយស ក្នុងឱកាសបើកវេទិកាសេដ្ឋកិច្ចភាគខាងកើត នៅក្រុងវ្លាឌីវ៉ូស្តុក នាពេលនេះ។ ទឹកដីរុស្ស៊ីធំណាស់ ពីលិចទៅកើត ហើយបច្ចុប្បន្ននេះ រុស្ស៊ីកំពុងតែធ្វើគ្រប់មធ្យោបាយ ដើម្បីអភិវឌ្ឍន៍ តំបន់ផ្នែកខាងកើតបង្អស់ នៃខ្ពង់រាបស៊ីបេរី។ ទីក្រុងវ្លាឌីវ៉ូស្តុក គឺជាចំណុចស្នូលនៃគម្រោងនានា របស់រុស្ស៊ី នៅតំបន់នេះ។
រុស្ស៊ីចង់រកអ្នកវិនិយោគថ្មី ដោយមិនចាំបាច់រំពឹងតែលើពួកប្រទេសលោកខាងលិច ព្រោះថាបច្ចុប្បន្នប្រទេសអឺរ៉ុបមួយចំនួនធំ គឺគេមិនសូវជាចង់រកស៊ីជាមួយរុស្ស៊ីទេ។ ឥណ្ឌាជាប្រទេសកំពុងតែមានសន្ទុះខ្លាំង ហើយក៏កំពុងតែស្វែងរកមូលដ្ឋាន ដើម្បីបោះទុនរកស៊ីក្រៅប្រទេស ដើម្បីកុំឲ្យចាញ់ចិនដែរ។ ដូច្នេះ ឥណ្ឌាអាចក្លាយជាដៃគូសេដ្ឋកិច្ចចំបង របស់រុស្ស៊ី។ មួយវិញទៀត ការដោះដូរពាណិជ្ជកម្មរវាងឥណ្ឌានិងរុស្ស៊ី នៅទាបណាស់ មានត្រឹមតែ១១ពាន់លានដុល្លារប៉ុណ្ណោះ កាលពីឆ្នាំ២០១៨។ ដូច្នេះគេអាចបង្កើនវាបន្ថែមទៀត។
អ្នកនាំពាក្យវិមានក្រឹមឡាំង បានប្រាប់អ្នកកាសែតថា ក្នុងជំនួបរវាងលោកពូទីន និងលោកណារិន្ទ្រ ម៉ូឌី គឺគេនឹងនិយាយគ្នា អំពីការពង្រីកនូវការបោះទុនវិនិយោគទៅវិញទៅមក និងការសហការគ្នា ក្នុងវិស័យថាមពល។ ហើយបើផ្អែកតាម លោក Alexïs Kouprianov អ្នកវិភាគសេដ្ឋកិច្ចរុស្ស៊ី បានឲ្យដឹងថា កម្មវត្ថុនៃជំនួបនេះ គឺសំណុំរឿងវិនិយោគទុនធំៗ ដែលរុស្ស៊ីចង់ឲ្យឥណ្ឌាចូលរួមបោះទុននៅភាគខាងកើតរុស្ស៊ី។
ដោយឡែក លោកណារិន្ទ្រ ម៉ូឌី បាននិយាយទៅកាន់អ្នកកាសែតរុស្ស៊ីថា លោកនិងលោកពូទីន ស្និទស្នាលនឹងគ្នាណាស់ ពួកគាត់រាប់អានគ្នាមកយូរហើយ។ អ្នកទាំង២មិនត្រឹមតែនិយាយគ្នាពីបញ្ហាទំនាក់ទំនងសេដ្ឋកិច្ចទេ តែក៏នឹងនិយាយអំពីបញ្ហាបរិស្ថាន សត្វព្រៃផងដែរ។ លោកម៉ូឌី បាននិយាយទាំងញញឹមញញែមថា លោកពូទីន ស្រលាញ់ខ្លាណាស់ ហើយចង់ជួយឥណ្ឌា ក្នុងការអភិរក្សការពារសត្វខ្លា។
“មិត្តចាស់ម្នាក់ ប្រសើរជាងមិត្តថ្មី២នាក់”
យើងមិនអាចភ្លេចបានទេ អំពីទំនាក់ទំនងយុទ្ធសាស្ត្ររបស់ឥណ្ឌា និងរុស្ស៊ី ក្នុងវិស័យយោធា។ ទំនាក់ទំនងផ្នែកយោធារវាងឥណ្ឌា និងរុស្ស៊ី គឺជាកេរតំណែល សល់ពីសម័យសូវៀត។ កាលពីជំនាន់នោះ សម្ភារៈសិក អាវុធ រថក្រោះ យន្តហោះចម្បាំង នាវាចម្បាំង របស់ឥណ្ឌាសឹងតែទាំងស្រុង គឺជារបស់រុស្ស៊ី។
បច្ចុប្បនេះ បើផ្អែកតាមតួលេខផ្លូវការ សម្ភារៈគ្រឿងសព្វាវុធរបស់កងទ័ពឥណ្ឌា ប្រមាណជា៦៨% គឺជាផលិតផលរបស់រុស្ស៊ី។ ឥណ្ឌាកំពុងតែ ធ្វើទំនើបកម្មកងទ័ពរបស់ខ្លួន ទាំងផ្លូវទឹក ផ្លូវអាកាស និងផ្លូវគោក ព្រោះថាគ្រឿងសព្វាវុធរុស្ស៊ីចាស់ៗពីមុន ចាប់ផ្តើមហួសសម័យប្រើការលែងកើតហើយ។ ឥណ្ឌា ដែលចង់ធ្វើខ្លាប្រចាំតំបន់អាស៊ីខាងត្បូង គឺត្រូវតែមានកងទ័ពទំនើប។ មានប្រទេសផ្សេងទៀត ដូចជា អាមេរិក បារាំង អង់គ្លេស ឬអ៊ីស្រាអែលជាដើម ដែលបានចូលទៅក្នុងទីផ្សារឥណ្ឌា ដើម្បីលក់គ្រឿងសព្វាវុធ។ ត្រង់នេះហើយ បានជារុស្ស៊ីកំពុងព្យាយាមទាញឥណ្ឌាឲ្យមកខាងខ្លួនវិញ។
លទ្ធផលយើងឃើញថា បានជាបណ្តើបណ្តើហើយ។ នៅឆ្នាំ២០១៨ ក្រោយកិច្ចប្រជុំកំពូលឥណ្ឌា-រុស្ស៊ី ឥណ្ឌាបានចុះកិច្ចសន្យា ទិញគ្រឿងសព្វាវុធពីរុស្ស៊ី ក្នុងតម្លៃសរុបប្រមាណ១ម៉ឺនលានដុល្លារ។ ទំនិញទាំងអស់ មានដូចជាឧត្ថម្ភាគចក្រប្រភេទ Ka-226T ចំនួន២០០គ្រឿងរបស់រុស្ស៊ី ៦០គ្រឿងផលិតនៅរុស្ស៊ី ហើយ១៦០គ្រឿងទៀត រុស្ស៊ីលើកយកផលិតនៅឥណ្ឌា។ បន្ទាប់មក មានប្រព័ន្ធខែលមីស៊ីល S-400 របស់រុស្ស៊ី ដែលនឹងត្រូវប្រគល់ឲ្យឥណ្ឌា នៅរវាងឆ្នាំ២០២៣។ បើតាមការប៉ាន់ស្មាន ឥណ្ឌា ក៏អាចទិញយន្តហោះចម្បាំង និងនាវាចម្បាំងរបស់រុស្ស៊ីបន្ថែមទៀត ហើយក៏អាចទិញនាវាមុជទឹកបាទសមុទ្រមួយគ្រឿង ពីរុស្ស៊ីដែរ។ បច្ចុប្បន្ននេះ ឥណ្ឌាមាននាវាមុជទឹកបាតសមុទ្រមួយគ្រឿង ដែលខ្លួនជួលពីរុស្ស៊ី។
ដូច្នេះយើងឃើញថា ទំនាក់ទំនងយោធា រវាងឥណ្ឌា និង រុស្ស៊ីនៅតែមាន ហើយអាចរីកធំជាងនេះផង ទៅថ្ងៃមុខ។ កាលពីប៉ុន្មានឆ្នាំមុន ក្នុងសន្ទរកថាមួយនៅចំពោះមុខលោកពូទីន លោក ម៉ូឌី បានលើកឡើងនូវសុភាសិតរុស្ស៊ីមួយដែលថា “មិត្តចាស់ម្នាក់ ប្រសើជាងមិត្តថ្មី២នាក់”។ មានន័យថា សម្រាប់ឥណ្ឌា រុស្ស៊ីនៅតែជាមិត្តចាស់ដ៏ល្អម្នាក់ និងមានទំងន់។
ឥណ្ឌាជើង២ជាន់ទូក២
តើនយោបាយការបរទេសឥណ្ឌា ក៏កំពុងតែងាកទៅរករុស្ស៊ី ច្រើនជាងទៅខាងលោកខាងលិចមែនទេ? មិនប្រាកដទាំងស្រុងទេ។ ប្រមាណ២០ឆ្នាំចុងក្រោយនេះ ឥណ្ឌាបានសំងំកសាងខ្លួន ដោយចៀសវៀង មិនរើសយកភាគីខាងណាឲ្យពិតប្រាកដទេ។ ឥណ្ឌា ត្រូវការអាមេរិក ត្រូវការអឺរ៉ុប ហើយក៏ត្រូវការរុស្ស៊ីដែរ។ ជាការពិត គេសង្កេតឃើញឥណ្ឌា ប្រកាន់ជំហរការទូតពេលខ្លះ ផ្អៀងទៅខាងរុស្ស៊ីមែន ព្រោះធ្លាប់ជាមិត្តចាស់។ ជាក់ស្តែងក្នុងសំណុំរឿង អន្តរាគមន៍របស់រុស្ស៊ីនៅស៊ីរី ឬក៏បញ្ហាតំបន់គ្រីម៉េអ៊ុយក្រែន។ ឥណ្ឌាបានសម្រេច មិនចូលរួមជាក្រុមប្រទេសលោកខាងលិច ក្នុងការថ្កោលទោសរុស្ស៊ីទេ។
មួយវិញទៀត ការប្រកាន់ជំហរខ្លះរបស់ឥណ្ឌា ក៏ដោយសារឥណ្ឌា ខឹងអាមេរិក ដែលស្និទនឹងប៉ាគីស្ថានពេក។ ជាក់ស្តែងការដែលឥណ្ឌា ទិញប្រព័ន្ធខែលមីស៊ីល S-400 ពីរុស្ស៊ី មិនមែនឥណ្ឌាមិនដឹងថា នឹងធ្វើឲ្យអាមេរិក រករឿងខ្លួននោះទេ។ ប៉ុន្តែក្នុងករណីខ្លះ ដែលប៉ះពាល់ ដល់ប្រយោជន៍ខ្លួនវិញ គឺឥណ្ឌាមិនខ្លាចនឹងប្រកាន់ជំហរកាន់ជើងអាមេរិកទេ។ ជាក់ស្តែងទាក់ទិននឹងការវាទទីរបស់ចិន នៅតំបន់អាស៊ី។ ត្រង់ចំណុចនេះ ឥណ្ឌានៅខាងអាមេរិកជានិច្ច ដើម្បីប្រជែងកុំឲ្យចិនអាងយ៉ាងនៅអាស៊ី។ ទោះចង់មិនចង់ ឥណ្ឌាក៏មិនអាច ចេះតែធ្វើឲ្យអាមេរិកខឹងខ្លាំងពេកដែរ ព្រោះថាអាមេរិកអាចនឹងប្តូរគោលជំហរ ឈប់គាំទ្រឥណ្ឌា ទាក់ទិននឹងបញ្ហានុយក្លេអ៊ែរ។
ហើយបើយើងសង្កេតមើលមតិសាធារណៈឥណ្ឌាវិញ គឺសង្គមឥណ្ឌា បានងាកទៅរកភាពទំនើបហ៊ឺហារ បែបអាមេរិកច្រើនណាស់។ អតីតកាលបែបសង្គមនិយម ដែលរុស្ស៊ីធ្លាប់មានឥទ្ធិពលទៅលើឥណ្ឌា កាន់តែសាបរលាបហើយ។ អ្នកនយោបាយសង្គមនិយម ឬកុម្មុយនិស្តនៅឥណ្ឌាទៀតសោត ក៏លែងមានឥទ្ធិពលដែរ។ ដូច្នេះថ្នាក់ដឹកនាំឥណ្ឌា ត្រូវតែថ្លឹងថ្លែង ប្រយ័ត្នជាប្រចាំ រវាងមហាអំណាចទាំង២នេះ មិនត្រូវធ្វើឲ្យមានការច្រណែនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ