ឥណ្ឌូណេស៊ី៖ បាតុកម្មហិង្សាទាមទារឯករាជ្យ ផ្ទុះឡើងកាន់តែខ្លាំង នៅខេត្តប៉ាពូអាស៊ី
ប្រមាណជិត២សប្តាហ៍មកហើយ ដែលអំពើហិង្សាបានផ្ទុះឡើង នៅខេត្តប៉ាពូអាស៊ី របស់ឥណ្ឌូណេស៊ី។ ប្រជាជនម្ចាស់ស្រុក ជនជាតិប៉ាពូ បានធ្វើបាតុកម្មតវ៉ា ប្រឆាំងនឹងអាជ្ញាធរឥណ្ឌូណេស៊ី រហូតឈានទៅដល់ ការដុតបំផ្លាញអាគារសាធារណៈ និងឯកជន ជាច្រើនកន្លែង នៅរវាងថ្ងៃពុធ និងថ្ងៃព្រហស្បតិ៍កន្លងមកនេះ។ ជនជាតិប៉ាពូ កាន់តែច្រើន បានចូលរួមធ្វើបាតុកម្ម ទាមទារឯករាជ្យ ផ្តាច់ខ្លួនចេញពីឥណ្ឌូណេស៊ី។
ចុះផ្សាយនៅថ្ងៃ៖
ស្តាប់ - ០២:៣៧
នៅទីក្រុងJayapura ទីក្រុងធំរបស់ខេត្តប៉ាពូអាស៊ី មានបាតុកររាប់រយនាក់ បានធ្វើបាតុកម្ម បង្កអគ្គីភ័យ ដុតអាគារជាច្រើនកន្លែង ក្នុងនោះ មានអាគារសភាតំបន់ អាគារក្រុមហ៊ុនទូរគមនាគមន៍ និងបានយកដុំថ្មគប់បំផ្លាញអាគារសណ្ឋាគារ មួយចំនួនផង។ នេះបើតាមការផ្តល់ព័ត៌មាន ពីអ្នកកាសែតនៅផ្ទាល់ទីនោះ។
អ្នកនាំពាក្យនគរបាលជាតិឥណ្ឌូណេស៊ី បានបញ្ជាក់ថា ក្រុមបាតុករហិង្សា បានដុតបំផ្លាញអាគារជាច្រើនកន្លែង ហើយសមត្ថកិច្ច កំពុងតែព្យាយាមបង្រ្កាប។ ដោយឡែក ក្រុមហ៊ុនជាតិផ្គត់ផ្គង់អគ្គិសនី បានប្រាប់ថា បាតុកម្មហិង្សាដុតបំផ្លាញនេះ បានបង្កឲ្យដាច់ចរន្តអគ្គិសនី ក្នុងក្រុង Jayapura។
គួរកត់សំគាល់ថា ក្រៅពីនៅទីក្រុងJayapura ដែលមានប្រជាជនរស់នៅប្រមាណ៣សែននាក់នេះ បាតុកម្មហិង្សាក៏មាននៅតាមទីប្រជុំជនផ្សេងទៀតដែរ ដូចជានៅតំបន់ Deiyai ដែលការប្រឈមមុខដាក់គ្នា រវាងបាតុករប៉ាពូ និងទាហានឥណ្ឌូណេស៊ី បានបង្កឲ្យស្លាប់ទាហានម្នាក់ និងបាតុករ២នាក់។ សមត្ថកិច្ចឥណ្ឌូណេស៊ី បានលើកឡើងថា ក្រុមបាតុករជនជាតិភាគតិចប៉ាពូ បានប្រើកាំបិត និងព្រួញបាញ់មកលើសមត្ថកិច្ច។
សូមរំលឹកថា កំហឹងរបស់ប្រជាជនប៉ាពូ ដែលទាមទារឯករាជ្យនេះ បានផ្ទុះឡើង បន្ទាប់ពីថ្ងៃទី១៧សីហា មានករណីចាប់ឃាត់ខ្លួននិស្សិតជនជាតិប៉ាពូ ប្រមាណ៤៣នាក់ នៅឯក្រុង ស៊ូរ៉ាបាយ៉ា លើកោះហ្សាវ៉ា។ និស្សិតទាំង៤៣នាក់ ត្រូវបានគេចោទថាបានធ្វើបាតុកម្ម ដុតទង់ជាតិឥណ្ឌូណេស៊ី។ ក្រោយពេលនរបាលដោះលែងមកវិញ ក្រុមនិស្សិតជនជាតិប៉ាពូទាំង៤៣ ត្រូវបានប្រជាជនឥណ្ឌូណេស៊ី ធ្វើបាតុកម្មជេរប្រមាថ មើលងាយ ប្រៀបប្រដូចទៅនឹងមនុស្សព្រៃ ថាមានរូបរាងដូចសត្វស្វា ឬដូចសត្វឆ្កែជាដើម។
ការប្រមាថមើលងាយទាំងនេះ ក៏បានបញ្ឆេះឲ្យមានកំហិងតវ៉ា នៅឯខេត្តប៉ាពូអាហ្ស៊ី របស់ឥណ្ឌូណេស៊ី ដែលមានប្រជាជនប៉ាពូរស់នៅភាគច្រើន។ គំនិតចង់បានឯករាជ្យបានផុសឡើងកាន់តែខ្លាំង។ ជាងមួយសប្តាហ៍មកនេះ អាជ្ញាធរងឥណ្ឌូណេស៊ី បានបិទខ្ទប់បណ្តាញអ៊ីនធើនែត និងទូរស័ព្ទចល័ត នៅខេត្តប៉ាពូអាស៊ី ដែលប្រការនេះបានបង្ករឲ្យមានការលំបាកខ្លាំងក្នុងការទំនាក់ទំនងយកព័ត៌មានពិតជាក់ស្តែង។
សូមបញ្ជាក់ថា ខេត្តប៉ាពូអាស៊ី ដែលសំបូរទៅដោយភោគផលធម្មជាតិនេះ គឺជាផ្នែកភាគខាងលិច នៃកោះនូវែលហ្គីណេ ដែលឥណ្ឌូណេស៊ី បានលើកទ័ពចូលទៅគ្រប់គ្រង នៅឆ្នាំ១៩៦៣។ ចំណែកផ្នែកខាងកើតនៃកោះ នូវែលហ្គីណេ ដែលធ្លាប់ស្ថិតក្រោមការគ្រប់គ្រងរបស់អូស្ត្រាលី បានទទួលឯករាជ្យពីអូស្ត្រាលី កាលពីឆ្នាំ១៩៧៥។ ប្រជាជនប៉ាពូនៅផ្នែកខាងលិច នៅតែចងចិត្តស្រម៉ៃចង់បានឯករាជ្យ ផ្តាច់ខ្លូនចេញពីឥណ្ឌូណេស៊ី នៅថ្ងៃណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ