ភេរវកម្មរបស់ក្រុមជីហាត នៃអង្គការរដ្ឋអ៊ីស្លាម កំពុងហៀរចូលបង់ក្លាដែស?
ចុះផ្សាយនៅថ្ងៃ៖
ស្តាប់ - ០៤:៥៨
ការបាញ់សម្លាប់អ្នកសរសេរប្លុក ដែលរិះគន់ក្រុមអ៊ីស្លាមជ្រុលនិយម និងឃាតកម្មផ្ទួនៗគ្នា ក្នុងរយៈពេលតែមួយសប្តាហ៍ ទៅលើជនបរទេស បានឆ្លុះបង្ហាញពីការកើនឡើងកម្រិតគំរាមកំហែង បង្កឡើងដោយក្រុមអ៊ីស្លាមជ្រុលនិយម ក្នុងប្រទេសបង់ក្លាដែស។ ក្រុមជីហាតនៃអង្គការរដ្ឋអ៊ីស្លាម បានប្រកាសចេញមុខ ទទួលខុសត្រូវលើឃាតកម្ម ទៅលើបុគ្គលិកមនុស្សធម៌ ជាតិអ៊ីតាលី និងជនជាតិជប៉ុន នៅបង់ក្លាដែស កាលពីសប្តាហ៍មុន។ តើក្រុមជីហាត នៃអង្គការរដ្ឋអ៊ីស្លាមកំពុងលុកលុយចូលដល់អាស៊ីខាងត្បូង។
នៅក្រោយឃាតកម្មទៅលើជនបរទេស ក្នុងប្រទេសបង់ក្លាដែស ក្រុមជីហាតនៃអង្គការរដ្ឋអ៊ីស្លាម ដែលកំពុងកាន់កាប់ទឹកដីមួយភាគរបស់ស៊ីរី និងអ៊ីរ៉ាក់ បានប្រកាសចេញមុខ និយាយតែម្នាក់ឯងថា ឃាតកម្មទាំងពីរលើកជាស្នាដៃរបស់ក្រុមខ្លួន។ បើសិនរឿងនេះ ពិតមែន នេះជាលើកទី១ ហើយ ដែលភេរវកម្ម បង្កឡើង ដោយក្រុម ជីហាតនៃអង្គការរដ្ឋអ៊ីស្លាម កើតមាន នៅទឹកដីអាស៊ីខាងត្បូង។
ក្រុមភេរវនិយម ជីហាតនៃអង្គការរដ្ឋអ៊ីស្លាមចេញមុខប្រកាសទទួលខុសត្រូវភ្លាមៗ យ៉ាងដូចច្នេះ ធ្វើឲ្យទាំងអ្នកជំនាញ និងរដ្ឋាភិបាលបង់ក្លាដែស កើតក្តីសង្ស័យ និងមិនទាន់ហ៊ានបញ្ជាក់ថា ឃាតកម្មសម្លាប់ជនជាតិអ៊ីតាលី និងជប៉ុន កាលពីសប្តាហ៍មុននោះ ជាស្នាដៃរបស់ក្រុមជីហាត នៅស៊ីរី និងអ៊ីរ៉ាក់។ អាជ្ញាធរបង់ក្លាដែសវិញ បានបដិសេធថា ឃាតកម្ម ទៅលើជនបរទេស គ្មានជាប់ពាក់ព័ន្ធនឹងក្រុមជីហាតនៃអង្គការរដ្ឋអ៊ីស្លាម។ សម្រាប់ភាគីរដ្ឋាភិបាលបង់ក្លាដែស គេគ្មានរកឃើញដានរបស់ក្រុមជីហាតនៃអង្គការរដ្ឋអ៊ីស្លាម ក្នុងប្រទេសបង់ក្លាដែសទេ។ តាមអាជ្ញាធរបង់ក្លាដែស ការបាញ់សម្លាប់ជនបរទេស គឺជាករណីធម្មតា ដែលគ្មានជាប់ទាក់ទងនឹងក្រុមភេរវនិយមណាមួយទេ។ កាលពីថ្ងៃអង្គារ ប៉ូលិសបង់ក្លាដែស នៅបាននិយាយថា គេបានឃាត់ខ្លួន សកម្មជនរបស់បក្សប្រឆាំងបង់ក្លាដែស ម្នាក់ និងពាណិជ្ជករជប៉ុនម្នាក់ ដែលជាប់សង្ស័យក្នុងករណីឃាតកម្មទៅលើជនជាតិជប៉ុន កាលពីថ្ងៃសៅរ៍។
ទោះជារដ្ឋាភិបាលបង់ក្លាដែស រុញច្រាន មិនទទួលស្គាល់ការអះអាងរបស់ក្រុមជីហាត នៃអង្គការរដ្ឋអ៊ីស្លាម ដែលថា ឃាតកម្មលើជនបរទេសជាស្នាដៃរបស់ខ្លួន ប៉ុន្តែ អ្នកជំនាញ ខាងចលនាអ៊ីស្លាម ជាច្រើនជឿថា ចលនាអ៊ីស្លាមជ្រុលនិយម នៅបង់ក្លាដែស កំពុងកើនឡើង គួរឲ្យកត់សំគាល់ ដោយសារតែនយោបាយរបស់រដ្ឋាភិបាល ដែលបានទាត់ បណ្តេញក្រុមអ៊ីស្លាមនិយម ចេញពីសៃង្វៀននយោបាយ។ បង់ក្លាដែសជួបវិបត្តិនយោបាយ រ៉ាំរ៉ៃ អស់៣ឆ្នាំ មកហើយ ដែលក្នុងនោះ គណបក្សសំខាន់របស់ក្រុមអ៊ីស្លាម នៅបង់ក្លាដែស ត្រូវបានហាមឃាត់មិនឲ្យចូលរួមក្នុងការបោះឆ្នោត នៅឆ្នាំ ២០១៤កន្លងទៅ។ ការចាប់ ផ្តន្ទាទោស ក្រុមមេដឹកនាំអ៊ីស្លាម ដោយសារតួនាទីរបស់ពួកគេ ក្នុងសង្រ្គាមជាមួយប៉ាគីស្ថាន នៅឆ្នាំ ១៩៧១ រឹតតែធ្វើឲ្យរដ្ឋាភិបាល និងក្រុមប្រឆាំងតានតឹងនឹងគ្នា។
អ្នកប្រឆាំង ជាច្រើននាក់ ដែលនៅក្នុងនោះ មានផងដែរ ក្រុមអ៊ីស្លាមបានបាត់ខ្លួន ដោយអាថ៌កំបាង បន្ទាប់ពីបានធ្វើបាតុកម្មប្រឆាំងនឹងរដ្ឋាភិបាលនៅដើមឆ្នាំនេះ។ ការបង្រ្កាប សំដៅតែក្រុមអ៊ីស្លាម និងការផាត់ចោល ក្រុមអ៊ីស្លាម នៅក្នុងឆាកនយោបាយបង់ក្លាដែស គឺជាចលករ រុញច្រាន ឲ្យកើតមានក្រុមអ៊ីស្លាមជ្រុលនិយម កាន់តែច្រើន នៅបង់ក្លាដែស ដែលតាមពិត ធ្លាប់ត្រូវគេចាត់ទុកថា ជាប្រទេសអ៊ីស្លាមទាន់សម័យ និងមានសេរីភាពខាងផ្នែកសាសនា។
នៅអាស៊ី បង់ក្លាដែស ជាប្រទេសធំទី ៣ ដែលមានអ្នកកាន់អ៊ីស្លាមរស់នៅច្រើនជាងគេ។ ៨៨ភាគរយ នៃប្រជាជន គឺជាកាន់សាសនាអ៊ីស្លាម និកាយស៊ុននីត។ និកាយរបស់ក្រុមជីហាត នៃអង្គការរដ្ឋអ៊ីស្លាម។ ដូច្នេះ តាមអ្នកជំនាញ ទោះជាក្រុមជីហាត នៅមិនទាន់មានវត្តមាន ចេញមុខ នៅក្នុងទឹកដី បង់ក្លាដែស ក៏ពិតមែន ក៏ប៉ុន្តែ គេជឿថា បង់ក្លាដែស ដែលកំពុងបាក់បែកផ្ទៃក្នុង រវាងរដ្ឋាភិបាល និងក្រុមប្រឆាំង អ្នកកាន់សាសនាអ៊ីស្លាម កំពុងក្លាយជាទឹកដីដ៏ទាក់ទាញសម្រាប់ក្រុមជីហាតនៃអង្គការរដ្ឋអ៊ីស្លាម។ នៅក្នុងសេចក្តី ប្រកាសរបស់ខ្លួន កាលពីចុងសប្តាហ៍មុន ក្រុមជីហាត បានប្រកាសរួចហើយថា មនុស្សរបស់ប្រទេសដែលចូលរួម ជាមួយអាមេរិក ធ្វើប្រតិបត្តិការទ័ព នៅស៊ីរី និងនៅអ៊ីរ៉ាក់ នឹងត្រូវសងសឹក សម្លាប់នៅក្នុងប្រទេសដែលកាន់សាសនាអ៊ីស្លាម។
នាយករដ្ឋមន្រ្តី បង់ក្លាដែស បាននិយាយថា ប៉ូលិសមិនបានរកឃើញភស្តុតាងដែលបញ្ជាក់ថា ឃាតកម្មទៅលើជនជាតិអ៊ីតាលី និងជប៉ុន មានជាប់ពាក់ព័ន្ធនឹងក្រុមអង្គការរដ្ឋអ៊ីស្លាម។ ប៉ុន្តែ ប៉ូលិសបង់ក្លាដែសដដែល ធ្លាប់បានប្រកាសថា នៅប៉ុន្មានខែចុងក្រោយនេះ គេចាប់បានមនុស្សជាច្រើននាក់ ដែលធ្វើសកម្មភាព ក្នុងទឹកដីបង់ក្លាដែស ដើម្បី រើសសមាជិកឲ្យក្រុមជីហាត នៃអង្គការរដ្ឋអ៊ីស្លាម។ ពួកគេទាំងនោះ ភាគច្រើន ជាជនជាតិ អង់គ្លេស អាល្លឺម៉ង់ ឬអាមេរិក ប៉ុន្តែ មានដើមកំណើត បង់ក្លាដែស។ កន្លងមក លោកស្រីនាយករដ្ឋមន្រ្តីបង់ក្លាដែសធ្លាប់បានក្រើនរំលឹកដល់រដ្ឋាភិបាលអង់គ្លេស ព្រោះថា អង្គការសមាគមអ៊ីស្លាម របស់ជនជាតិអង់គ្លេស ដើមកំណើត បង់ក្លាដែស បានប្រើលុយ និងបញ្ជូនមនុស្សទៅបំពាក់បំប៉ន មនោគមវិជ្ជាដល់ក្រុមយុវជន នៅក្នុងប្រទេសបង់ក្លាដែស។ ប៉ូលិសបង់ក្លាដែស នៅចាប់ឃាត់ខ្លួន មនុស្សជាច្រើននាក់ ដែលប៉ុនប៉ងចង់ចេញដំណើរទៅប្រយុទ្ធក្នុងទឹកដីស៊ីរី ឬអ៊ីរ៉ាក់។
ផាត់ចេញពីរង្វង់នយោបាយ និងសង្គម ក្រុមយុវជនអ៊ីស្លាម ដែលខ្វះខាតទាំងចំណេះដឹង និងទ្រព្យធន គឺគោលដៅសំឡឹងចង់បាន របស់បណ្តាញរើសបញ្ចូលរបស់ក្រុមជីហាត។ តាមអ្នកជំនាញ អង្គការរដ្ឋអ៊ីស្លាម ប្រហែលមិនទាន់មានមុខ នៅ បង់ក្លាដែសមែន។ ប៉ុន្តែ ការបង្រ្កាប បិទសេរីភាព ទៅលើក្រុមប្រឆាំង បានបង្កើតបរិយាកាសមួយ ដែលហុចប្រយោជន៍ច្រើនទៅឲ្យក្រុមជ្រុលនិយម។ ធម្មតាទេ កន្លែងណា ដែលជួបការរឹតបន្តឹងលទ្ធិប្រជាធិបតេយ្យ កន្លែងនោះ នឹងប្រឈមច្រើននឹងការកើនឡើងនៃក្រុមដែលមាននិន្នាការជ្រុលនិយម ដែលប្រឆាំងនឹងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ