កប៉ាល់ដឹកជនអន្តោប្រវេសន៍សេរីលង្កា ចូលដល់ផែកាណាដា
ជនអន្តោប្រវេសន៍ជាតិសេរីលង្កាចំនួន ៤៩០ នាក់ បានធ្វើដំណើរតាមកប៉ាល់ ត្រូវបានទាហានជើងទឹកកាណាដា ចាប់បាននៅយប់ថ្ងៃទី ១២ សីហានេះ។ បន្ទាប់ពីចំណាយពេលអស់ជាងបួនខែ។ កប៉ាល់បានចូលចតក្នុងកំពង់ផែ Esquimalt ភាគខាងលិចប្រទេសកាណាដា បានធ្វើឲ្យអាជ្ញាធរបារម្ភយ៉ាងខ្លាំង ខ្លាចក្រែងមានពួកខ្លាតាមូលលាក់ខ្លួននៅក្នុងចំណោមជនភៀសខ្លួនសេរីលង្កា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍លម្អិតរបស់ អៀង សុខម៉ិញ
គ្រាន់តែបានចូលជាន់ដីកាណាដាភ្លាម ជនភៀសខ្លួនខុសច្បាប់ទាំង៤៩០ នាក់នោះ ត្រូវទទួលស្វាគមន៍ ជាដំបូង ដោយក្រុមបុគ្គលិកសុខាភិបាល ដើម្បីពិនិត្យ និងព្យាបាលសុខភាព ព្រោះពួកគេបានធ្វើដំណើរតាមកប៉ាល់ដឹកទំនិញអស់រយៈពេលដល់ទៅជាងបួនខែ។ បន្ទាប់មក ទើបគេប្រគល់ខ្លួនជនភៀសខ្លួនទាំងអស់នោះទៅឲ្យភ្នាក់ងារអន្តោប្រវេសន៍។ ក្នុងពេលកំពុងរង់ចាំអាជ្ញាធរមានសមត្ថិកិច្ច សិក្សាពាក្យសុំសិទ្ធិជ្រកកោន ពួកគេត្រូវស្ថិតនៅក្នុងមណ្ឌលឃុំឃាំងសិន។
រដ្ឋាភិបាលកាណាដា បានអះអាងទៀតថាមេខ្យល់ ដែលរកស៊ីដឹកជនភៀសខ្លួន និងពួកឧទ្ទាមខ្លារំដោះអេឡាំតាមូល ទំនងជាអាចមានលាក់ខ្លួននៅក្នុងចំណោមជនអន្តោប្រវេសន៍ទាំងអស់នោះ។ ក្រុងOttawa មិនប្រាថ្នាទទួលពួកតាមូលឲ្យជ្រកកោនក្នុងទឹកដីខ្លួនឡើយ ព្រោះពួកឧទ្ទាមសេរីលង្កានេះ ត្រូវបានអាជ្ញាធរកាណាដា ចាត់ទុកជាអង្គការភេរវនិយមមួយ។
សូមបញ្ជាក់ថា កាលពីខែតុលា ឆ្នាំ២០០៩ មានកប៉ាល់ទំនិញមួយគ្រឿងបានចូលមកផែកាណាដា ដោយផ្ទុកជាមួយនូវជនភៀសខ្លួន ចំនួន៧៦នាក់។ ពួកគេទាំងនោះកំពុងតែមានសេរីភាពដូចជនធម្មតាទូទៅ ក្នុងពេលដែលអាជ្ញាធរមានសមត្ថកិច្ចកំពុងសិក្សាសំណុំឯកសារសុំជ្រនកោននយោបាយ ទោះបីជាក្នុងចំណោមនោះ មានខ្លះត្រូវគេសង្ស័យថាជាពួកឧទ្ទាមតាមូលក៏ដោយ។
មិនបានមួយឆ្នាំផង កប៉ាល់ទីពីរបានមកដល់ទៀត។ ក្រុងOttawa ត្រូវសម្តែងពីភាពដាច់ខាតប្រឈមនឹងអន្តោប្រវេសន៍ខុសច្បាប់ តែកាណាដា ក៏ត្រូវរក្សាមុខមាត់ និងកេរ្តិ៍ឈ្មោះ ឲ្យសក្តិសមជាប្រទេសដែលមាននយោបាយទទួលស្វាគមន៍ (ជាប្រទេសទទួលជនភៀសខ្លួន-Terre D’accueil)។
ដូច្នេះ ការមកដល់នៃពួកភៀសខ្លួនលើកនេះ ពិតជានឹងធ្វើឲ្យការតស៊ូមតិស្តីពីអំពីច្បាប់អន្តោប្រវេសន៍ ផ្តើមផុសផុលឡើងវិញមិនខាន។ ជាពិសេសការរិះគន់ បានកើតមានជាបន្តបន្ទាប់ថា ច្បាប់អន្តោប្រវេសន៍នេះ ធូររលុង ព្រោះវាបានអនុញ្ញាតឲ្យជនភៀសខ្លួនខុសច្បាប់ អាចរស់នៅលើទឹកដីកាណាដាបាន ក្នុងរយៈពេលដែលអាជ្ញាធរកំពុងពាក្យសុំសិទ្ធិជ្រកកោនរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ