លំហាត់សឹកដ៏ធំធេងក្រោមឈ្មោះថា “បេសកកម្មសន្តិភាពឆ្នាំ ២០១០"
លើកនេះជាលើកទី៥ដែលអង្គការសហប្រតិបត្តិការក្រុងសៀងហៃ ហៅកាត់ថា “ OCS “ ធ្វើសមយុទ្ធរបស់ខ្លួន។ សមយុទ្ធនេះ បានត្រូវបើកជាផ្លូវការ គឺថ្ងៃ១៣កញ្ញាម្សិលមិញ ហើយវានឹងប្រព្រឹត្តទៅ ចំនួន១៧ថ្ងៃ លុះរហូតដល់ចុងខែកញ្ញានេះតែម្តង។ គោលដៅសមយុទ្ធ គឺ សមជើងប្រឆាំងភេរវនិយម ប្រឆាំងពួកផ្តាច់ទឹកដីនិយមនិងពួកជ្រុលនិយម។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ពិធីសម្ពោធបានប្រព្រឹត្តទៅនៅឯវាលវង់ល្បងពិសោធន៍ឈ្មោះMatybulakលើដែនដីកាហ្សាក់ស្តង់(Kazakhstan)ក្រោមស្នូរប្រគំនៃភ្លេងជាតិ ស្នូរបាញ់សំដែងគារវកិច្ចនៃកងកាំភ្លើងធំនិងការបង្ហូតទង់ជាតិទាំង៦ប្រទេស សមាជិកអង្គការសហប្រតិបត្តិការក្រុងសៀងហៃហៅកាត់ថា “ OCS “ ពោលគឺមហាប្រទេសចិនដីគោក ប្រទេសរុស្ស៊ី កាហ្សាក់ស្តង់ គៀកហ្ស៊ីស្តង់តាដជីគីស្តង់និងអ៊ូស្បេគីស្តង់ សូម្បីតែលើកនេះឥតមានពួកយោធាOuzbekistan ចូលរួមក្តី។ ចំណែកសមយុទ្ធផ្ទាល់នឹងប្រព្រឹត្តទៅលើកនេះគឺតែនៅលើដែនដី កាហ្សាក់ស្តង់ ប៉ុណ្ណោះ។
ចូលរួម គឺមាន យោធា សរុបទៅចំនួន ៥.០០០នាក់ រថក្រោះនិងយានយន្តពាសដែក ជាង ៣០០ គ្រឿង យន្តហោះនិងឧទ្ធម្ភាគចក្រ ជាង៥០គ្រឿង។ ជាការកត់សំគាល់ យន្តហោះនិង ឧទ្ធម្ភាគចក្រទាំងនេះបញ្ជូនទៅ គឺតែដោយ៣ប្រទេសប៉ុណ្ណោះ ពោលគឺ ដោយ ចិន រុស្ស៊ី កាហ្សាក់ស្តង់។ ដោយហេតុថា លំហាត់សឹកនេះ ប្រព្រឹត្តទៅលើដែនដីខ្លួនបានជា កាហ្សាក់ស្តង់ដាក់ឲ្យប្រតិបត្តិការ ក៏ទាំងអង្គភាពទ័ពមហាផ្ទៃរបស់ខ្លួន។
ថ្ងៃអង្គារនេះ ពួកយោធា ចាប់ផ្តើមធ្វើការហ្វឹកហាត់ ដែលនឹងពន្យារទៅចំនួន ៤វគ្គ ទម្រាំឈានដល់ដំណាក់សកម្មនៃសមយុទ្ធ នៅថ្ងៃ២៤កញ្ញាខាងមុខ។ បានអញ្ជើញទៅដល់វាលវង់ល្បង ពិសោធទៅហើយ ដើម្បីតាមដានអំពីសមយុទ្ធរួមនោះ គឺរដ្ឋមន្ត្រីការពារប្រទេស នៃគ្រប់តែប្រទេសសមាជិក “ OCS “ ព្រមទាំងរដ្ឋមន្ត្រីការពារប្រទេស Azerbaidjan និង Ukraine ក្នុងឋានៈជាអ្នកសង្កេតការណ៍។
នាយករងនៃអគ្គសេនាធិការដ្ឋាន កងទ័ពរំដោះប្រជាជនចិន ឧត្តមសេនីយឯក Ma Ciav Tian ក្នុងបទអន្តរាគមន៍ខ្លួន កត់សំគាល់ថា បច្ចុប្បន្ននិងក្នុងប៉ុន្មានឆ្នាំទៅមុខ ភេរវកម្ម អំពើឆ្ពោះទៅផ្តាច់ទឹកដី អំពើជ្រុលនិយម នឹងបន្តស្ថិតនៅជាកត្តាចំបងៗ ពាំនាំជាអស្ថិរភាពដល់តំបន់ និងដល់ពិភពលោក វាជាសត្រូវរួមរបស់យើង។ អ៊ីចឹងហើយ បានជាយើងត្រូវតែសំដែងនូវ សាមគ្គីភាពធ្លុងមួយហើយ ពង្រឹងយុទ្ធសហប្រតិបត្តិការ ក្នុងក្របខ័ណ្ឌ អង្គការសហប្រតិបត្តិការក្រុងសៀងហៃ។
តាំងពីអង្គការនេះប្រសូតមកក្នុងឆ្នាំ ២០០១ សមយុទ្ធលើកនេះជាលើកទី៥។ លើកទី១ គឺ កាលក្នុងឆ្នាំ ២០០៣ ដោយមុនដំបូងវាប្រព្រឹត្តទៅលើដែនដីកាហ្សាក់ស្តង់រួចបន្ទាប់មកលើដែនដីចិន។ លើកទី២ និងទី៣គឺក្នុងឆ្នាំ ២០០៥ និង២០០៧ សុទ្ធតែនៅលើដែនដីរុស្ស៊ី។ លើកទី៤ ក្នុងឆ្នាំ២០០៩ គឺលើដែនដីរុស្ស៊ីផង ចិនផង។ ហើយវាតែងមានឈ្មោះរួមជានិច្ចថា៖ “បេសកកម្មសន្តិភាព “៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ