រង្វាន់ណូបែលសន្តិភាពត្រូវប្រគល់ទៅឲ្យសកម្មជនប្រឆាំងនឹងរដ្ឋអំណាចចិន
បើទោះបីជាមានការព្រមានពីទីក្រុងប៉េកាំង គណៈកម្មាធិការណូបែលនៅទីបំផុតបានសម្រេចផ្តល់ពានរង្វាន់ណូបែលសន្តិភាពទៅឲ្យលោក លីវ ស៊ាវប៉ូ ដែលបច្ចុប្បន្នកំពុងត្រូវរដ្ឋអំណាចចិនចាប់ដាក់គុកពីបទបង្កវិទ្ធង្សនាប្រឆាំងនឹងថ្នាក់ដឹកនាំ។ ចិនធ្លាប់បានបញ្ជាក់ទៅប្រទេសន័រវែស ហើយថា ការប្រគល់រង្វាន់ណូបែលសន្តិភាពទៅឲ្យលោក លីវ ស៊ាវប៉ូ នឹងអាចធ្វើឲ្យប៉ះពាល់ដល់ទំនាក់ទំនងមិត្តភាពរវាងចិន និងន័រវែស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
អាយុ ៥៤ ឆ្នាំ លោក លីវ ស៊ាវប៉ូ ជាបញ្ញាវន្តចិនម្នាក់ដែលបានបូជាទាំងកំលាំងកាយ និងចិត្តដើម្បីជម្រុញឲ្យមានលទ្ធិប្រជាធិបតេយ្យក្នុងប្រទេសចិន។ អតីតសាស្រ្តាចារ្យអក្សសិល្បិ៍រូបនេះជាមនុស្សសំខាន់មួយដែលបានចូលរួមតាក់តែងធម្មនុញ្ញ លេខ៨។ ជា អត្ថបទដែលទាមទារឲ្យថ្នាក់ដឹកនាំចិនអនុវត្តលទ្ធិប្រជាធិបតេយ្យ។ ប៉ុន្តែ រដ្ឋអំណាចកម្មុយនិស្តចិនបានចាត់ទុកសកម្មភាពរបស់អ្នកនិពន្ធរូបនេះថា ជាអំពើប្រឆាំងនឹងនយោបាយរបស់ខ្លួន។ ដូច្នេះហើយ កាលពីខែធ្នូ ឆ្នាំ ២០០៩មុននេះ តុលាការចិនបានសម្រេចផ្តន្ទាទោស លោក លីវ ស៊ាវប៉ូ ឲ្យជាប់គុក ១១ឆ្នាំ។
លោក លីវ ស៊ាវប៉ូមិនមែនទើបតែចេញមុខប្រឆាំងនឹងនយោបាយរឹតត្បិតរបស់រដ្ឋអំណាចចិននៅពេលថ្មីៗនេះទេ។ ក្នុងអតីតកាល លោកធ្លាប់ត្រូវបានអាជ្ញាធរចិនចាប់ដាក់គុករយៈពេលជិត២ឆ្នាំ ម្តងហើយ ដោយចោទពីបទនៅពីក្រោយការធ្វើបាតុកម្មរបស់ចលនានិស្សិតចិន នៅទីវាល Tiananmen នាពីឆ្នាំ ១៩៨៩។ ក្រោយការដោះលែងឲ្យមានសេរីភាព អតីតសាស្រ្តាចារ្យរូបនេះនៅបានចាប់ផ្តើមចលនាតវ៉ានានាដើម្បីប្រយោជន៍របស់ប្រជាកសិករចិន និងនិស្សិតដែលត្រូវគេបិទសិទ្ធិសេរីភាពមិនឲ្យបញ្ចេញមតិ។ សកម្មភាពប្រឆាំងជាបន្តបន្ទាប់នេះ បានធ្វើលោក លីវ ស៊ាវប៉ូត្រូវគេបញ្ចូនឲ្យទៅរៀនសូត្រ និងរស់នៅក្នុងការតាមឃ្លាំមើលពីសំណាក់អាជ្ញាធរចិនជានិច្ច។
នៅពេលលោកត្រូវគេបណ្តេញចេញពីសកលវិទ្យាល័យ លោក លីវ ស៊ាវប៉ូនៅបន្តរក្សាទំនាក់ទំនងជាមួយនឹងបញ្ញាវន្តចិនដទៃទៀត និងបន្តសរសេរសៀវភៅ។ សៀវភៅភាគច្រើនរបស់លោកត្រូវអាជ្ញាធរហាមឃាត់មិនឲ្យបោះពុម្ពផ្សាយក្នុងប្រទេសចិន។
នៅថ្ងៃនេះ លោក លីវ ស៊ាវប៉ូដែលកំពុងជាប់ក្នុងគុករបស់រដ្ឋអំណាចចិន មិនបានដឹងថា លោកត្រូវបានតែងតាំងជាម្ចាស់ជ័យលាភីណូបែលសន្តិភាពទេ។ ភរិយារបស់លោក បាននិយាយ កាលពីសប្តាហ៍មុន ថា ដំណឹងពីលោកខាងក្រៅទាំងប៉ុន្មានត្រូវគេហាមមិនឲ្យនិយាយប្រាប់ទៅប្តីរបស់លោកស្រី។
នៅក្នុងបទសម្ភាសន៍ មួយមុននឹងការចាប់ខ្លួនរបស់លោក លោក លីវ ស៊ាវប៉ូធ្លាប់បាននិយាយថា លទ្ធិប្រជាធិបតេយ្យកំពុងរីកចំរើនយ៉ាងយឺតៗ និងសន្សឹមៗ ក្នុងប្រទេសចិន។ កន្លងមក ប្រធានគណៈមេប្រយោគរង្វាន់ណូបែលធ្លាប់បានបញ្ជាក់ថា រង្វាន់ណូបែលសន្តិភាពនេះធ្វើឡើងដើម្បីលើកទឹកចិត្តដល់បុព្វហេតុរបស់បុគ្គលការពារសិទ្ធិមនុស្សក្នុងពិភពលោក។ ការតស៊ូជម្រុញឲ្យមានការគោរពសិទ្ធិមនុស្សក្នុងប្រទេសចិន បានទាក់ទាញទឹកចិត្តរបស់គណៈមេប្រយោគ និងសម្រេចផ្តល់រង្វាន់ណូបែលសន្តិភាពនេះទៅឲ្យ លោកលីវ ស៊ាវប៉ូ។
ប៉ុន្តែសម្រាប់ទីក្រុងប៉េកាំង ការប្រគល់រង្វាន់ណូបែលសន្តិភាពទៅឲ្យសកម្មជនប្រឆាំងនឹងរដ្ឋអំណាចរបស់ខ្លួន គឺជាការសកម្មភាពដើរផ្ទុយស្រលះទៅនឹងគោលការណ៍របស់រង្វាន់ណូបែល និងអាចប៉ះពាល់ដល់ទំនាក់ទំនងរវាងចិន និងប្រទេសន័រវែស។ នេះជាការលើកឡើងរបស់រដ្ឋមន្រ្តីការបរទេសចិន នៅថ្ងៃសុក្រនេះ គឺនៅប៉ុន្មាននាទីក្រោយការប្រកាសរបស់គណៈមេប្រយោគណូបែល។
ដូចជាករណីរបស់លោកស្រី អ៊ុងសាន ស៊ូជី មេដឹកនាំបក្សប្រឆាំងរបស់ភូមា លោក លីវ ស៊ាវប៉ូមិនអាចនឹងចេញពីពន្ធនាគាមកទទួលរង្វាន់ណូបែលសន្តិភាពទេ។ ការប្រគល់រង្វាន់ជាផ្លូវការនឹងធ្វើឡើងនៅថ្ងៃ ទី ១០ ខែ ធ្នូខាងមុខនេះ។ ជាធម្មតាម្ចាស់ជ័យលាភីណូបែលសន្តិភាព នឹងទទួលបានមេដាយមួយ និងទឹកប្រាក់លើកទឹកចិត្តចំនួន មួយលានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ