HRW៖ ទាហានថៃ ប្រព្រឹត្តអំពើឃាតកម្មលើប្រជាជនស៊ីវិលនៅនិទាឃរដូវ២០១០
អង្គការការពារសិទ្ធិមនុស្ស Human Rights Watch (HRW) កាលពីថ្ងៃអង្គារម្សិលមិញ បានបរិហារថា ទាហានថៃបានប្រព្រឹត្តអំពើឃាតកម្មដោយ ឥតញញើតតក់ស្លុត ទៅលើចលនាបាតុករថៃកាលពីនិទាឃរដូវ២០១០ និងដែលបណ្តាលឲ្យមានមនុស្សស្លាប់ ជាង៩០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
អង្គការការពារសិទ្ធិមនុស្ស Human Rights Watch (HRW) បានចោទថា កងទ័ពថៃ បានប្រើពួកអ្នកបាញ់ដៃឆើត ពួនចាំស្ទាក់បាញ់ និងវាយបង្រ្កាបចលនាបះបោរអាវក្រហមដោយឥតរើសមុខនិងគ្មានតក់ស្លុតឡើយ។ នេះ ជាការ អះអាងរបស់លោក Brad Adams នាយកអង្គការ Human Rights Watch ប្រចាំតំបន់អាស៊ី នៅឱកាសសន្និសីទសារព័ត៌មានមួយ។
យោងតាមយោបល់ លោក Brad Adams « ការដែលទាហាន បាញ់សម្លាប់ទៅលើហ្វូងបាតុករដែលគ្មានអាវុធនៅក្នុងដៃ គឺជាអំពើឃាតកម្មមួយ បើទោះបី ជាពួកគេស្ថិតនៅក្រោមអំណាច របស់រដ្ឋាភិបាលក៏ដោយក្តី »។
ក្នុងអំឡុងខែមីនានិងឧសភាឆ្នាំ ២០១០ ចលនាបាតុករអាវក្រហមដែលជាពួកអ្នកប្រឆាំងរដ្ឋាភិបាល ចំនួន ប្រមាណ១០ម៉ឺននាក់ បានចូលកាន់កាប់សង្កាត់មួយនៅកណ្តាលទីក្រុងបាងកកដើម្បីទាមទារឲ្យលោកអាប់ភីស៊ីតចុះចេញពីមុខតំណែងនាយករដ្ឋមន្ត្រី។ ក៏ប៉ុន្តែ ចលនាបាតុកម្មនេះ ត្រូវបានកងទ័ពថៃវាយបង្រ្កាបយ៉ាងកាចសាហាវបំផុតដើម្បីបំបែកហ្វូងបាតុករអាវក្រហម។
នៅក្នុងរបាយការណ៍មួយរបស់ខ្លួនក្រោមចំណងជើងថា « ផ្លូវចុះទៅរកភាពវឹកវរ » ចេញផ្សាយកាលពីថ្ងៃអង្គារម្សិលមិញ អង្គការ HRW បានសំដែងការសោកស្តាយយ៉ាងខ្លាំង ចំពោះ ការដែលរដ្ឋាភិបាលថៃ បានចាត់ទុកពួកបាតុករ ថាជា ពួក« ភេរវជន» ។ ក៏ប៉ុន្តែ អង្គការ ការពារសិទ្ធិមនុស្ស ដដែលនេះ ក៏បានទទួលស្គាល់ដែរថា មានពួកទាហានស៊ីឈ្នួលច្បាំងប្រដាប់អាវុធទំនើបដែលគេស្គាល់ក្រោមឈ្មោះថា ពួក « អាវខ្មៅ» ក៏បានធ្វើការវាយប្រហារទៅលើពួកទាហាន ដោយប្រើកាំភ្លើងវាយលុក និង គ្រាប់បែកដៃដែរ។
ប្រទេសថៃ ដែលកំពុងរៀបចំចាត់ចែងការបោះឆ្នោត នាពេលខាងមុខ នៅតែ មានការបែកបាក់ប្រេះឆាគ្នាយ៉ាងខ្លាំង មួយឆ្នាំក្រោយពី វិបត្តិនយោបាយនេះ ដែលបណ្តាលឲ្យមានមនុស្សរបួសជាង១៩០០នាក់។
នៅទីបំផុត Human Rights Watch ក៏សំដែងការព្រួយបារម្ភដែរ អំពី ការធ្វើយុទ្ធនាការឃោសនាបោះឆ្នោត ការរំលាយសភា ដែលគេទន្ទឹងចាំមើលនៅសប្តាហ៍នេះ ក្នុងគោលដៅរៀបចំការបោះឆ្នោត ក្នុងអំឡុង ចុងខែមិថុនា ឬក៏នៅដើមខែ កក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ