ក្រុមហ៊ុនអាកាសចរណ៍នៅក្នុងពិភពលោកបាត់បង់ប្រាក់ចំណេញជាង ៥០% ក្នុងឆ្នំា ២០១១
នៅក្នុងកិច្ចប្រជុំប្រចំាឆ្នំាដែលកំពុងរៀបចំធ្វើនៅក្នុងប្រទេសសិង្ហបុរី សមាគមដឹកជញ្ជូនផ្លូវអាកាសអន្តរជាតិដែលមានទីស្នាក់ការក្នុងទីក្រុងហ្សឺណែវ ប្រទេសស្វីសបានប្រមើលទុកថា ក្រុមហ៊ុនអាកាសចរណ៍នៅក្នុងពិភពលោកអាចនឹងបាត់បង់ប្រាក់ចំណេញរបស់ខ្លួនជាង ៥០% ក្នុងឆ្នំា ២០១១នេះ។ ការបាត់បង់ប្រាក់ចំណេញដោយមកពីមូលហេតុចំនួន ២យ៉ាង៖ តម្លៃប្រេងឡើងថ្លៃ និងស្ថានការណ៍វឹកវរនៅក្នុងពិភពលោកនាពេលបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:៣៦
គ្រោះមហន្តរាយធម្មជាតិនៅក្នុងប្រទេសជប៉ុន ព្រឹត្តិការណ៍បះបោរនៅក្នុងពិភពអារ៉ាប់ និងតម្លៃប្រេងឡើងថ្លៃ ទំាងនេះសុទ្ធសឹងជាមូលហេតុសំខាន់ៗដែលបញ្ជាក់ពីការធ្លាក់ចុះនូវប្រាក់ចំណេញរបស់ក្រុមហ៊ុនអាកាសចរណ៍នៅក្នុងពិភពលោក។ តាមការគ្រោងទុកកាលពីដើមខែមីនាកន្លងមក ប្រាក់ចំណេញដែលក្រុមហ៊ុនដឹកជំញ្ជូនផ្លូវអាកាសអន្តរជាតិអាចនឹងទទួលបានក្នុងឆ្នំា ២០១១ មានចំនួន ៨ ៦០០លានដុល្លារ។ ប៉ុន្តែនៅថ្ងៃនេះ នៅក្នុងកិច្ចប្រជុំប្រចំាឆ្នំារបស់ខ្លួនក្នុងប្រទេសសិង្ហបុរី លោកប្រធានសមាគមដឹកជញ្ជូនផ្លូវអាកាសអន្តរជាតិ Giovanni Bisignani បានប្រកាសឲ្យដឹងថា ចំនួនប្រាក់ចំណេញសម្រាប់ឆ្នំា ២០១១ នេះនឹងអាចធ្លាក់ចុះជាងពាក់កណ្តាល ពោលគឺអាចមានប្រមាណតែ ៤ ០០០លានដុល្លារប៉ុណ្ណោះ។
លោក Giovanni Bisignani បានបញ្ជាក់បន្ថែមថា បើគេប្រៀបនឹងប្រាក់ចំណេញកាលពីឆ្នំា ២០១០ ដែលមានរហូតដល់ទៅ ១៨ ០០០លានដុល្លារនោះ ប្រាក់ចំណេញចំនួនតែ ៤ ០០០លានដុល្លារសម្រាប់ឆ្នំា ២០១១ បានធ្លាក់ចុះជិត ៨០%។ ម្យ៉ាងទៀត ជាមួយនឹងទឹកប្រាក់ផលរបរសរុបប្រមាណជា ៥៩៨ ០០០លានដុល្លារក្នុងឆ្នំា ២០១១ នេះ ប្រាក់ចំណេញដែលអាចនឹងទទួលបាន គឺមានប្រមាណតែ ០,៧% ប៉ុណ្ណោះ។ បើនិយាយពីការចំណាយសរុបលើតម្លៃប្រេងវិញ គឺបានកើនឡើងបន្ថែមចំនួន ១០ ០០០លានដុល្លារ ពោលគឺចំណាយរហូតដល់ទៅ ១៧៦ ០០០លានដុល្លារសម្រាប់ឆ្នំា ២០១១។ សមាគមដឹកជញ្ជូនផ្លូវអាកាសអន្តរជាតិបានឲ្យដឹងថា ក្នុងឆ្នំា ២០១១ ការចំណាយលើតម្លៃប្រេងមានចំនួនជិត ៣០% នៃការចំណាយសរុបរបស់ក្រុមហ៊ុនដឹកជញ្ជូនផ្លូវអាកាស ពោលគឺមានអត្រា ២ដង ច្រើនជាងកាលពី ១០ឆ្នំាមុន។
យ៉ាងណាក៏ដោយ ក្រុមហ៊ុនអាកាសចរណ៍នៅក្នុងតំបន់អាស៊ីប៉ាស្វីហ្វិកត្រូវបានគេមើលឃើញថា អាចនឹងទទួលបានប្រាក់ចំណេញច្រើនជាងគេ ពោលគឺមាន ២ ១០០លានដុល្លារសម្រាប់ឆ្នំា ២០១១ ទល់នឹង ១០ ០០០លានដុល្លារក្នុងឆ្នំា ២០១០។ ក្រុមហ៊ុនអាកាសចរណ៍នៅអឺរ៉ុបអាចនឹងទទួលបានប្រាក់ចំណេញ ៥០០លានដុល្លារ ទល់នឹង ១ ៩០០លានដុល្លារក្នុងឆ្នំា ២០១០។ ចំណែកក្រុមហ៊ុនអាកាសចរណ៍នៅមជ្ឈិមបូព៌ាវិញ ប្រាក់ចំណេញអាចនឹងធ្លាក់ចុះពី ៩០០លានដុល្លារក្នុងឆ្នំា ២០១០ មកនៅត្រឹមតែ ១០០លានដុល្លារក្នុងឆ្នំា ២០១១នេះ។
សូមជម្រាបជូនថា សមាគមដឹកជញ្ជូនផ្លូវអាកាសអន្តរជាតិដែលមានទីស្នាក់ការកណ្តាលនៅក្នុងទីក្រុងហ្សឺណែវ ប្រទេសស្វីស មានសមាជិកសរុបទំាងអស់ចំនួន ២៣០ ក្រុមហ៊ុនអាកាសចរណ៍នៅទូទំាងពិភពលោក និងធានាចរាចរណ៍ផ្លូវអាកាសជាង ៩០% ក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ