ប្រមុខរដ្ឋាភិបាលនិរទេសទីបេបំពេញទស្សនកិច្ចលើកទីមួយនៅអឺរ៉ុប
ប្រទេសស្វីស អាល្លឺម៉ង់ ន័រវែស និងប្រទេសដាណាម៉ាក ហើយនៅចុងសប្តាហ៍នេះនៅប្រទេសបារាំង មុននឹងធ្វើដំណើរទៅកាន់ប្រទេសបែលហ្សិកនិងប្រទេសអង់គ្លេស លោកប្រមុខរដ្ឋាភិបាលនិរទេសទីបេបំពេញទស្សនកិច្ចលើកទីមួយនៅប្រទេសអឺរ៉ុបចំនួនប្រាំពីរ។ ទាំងនេះ ៤ខែក្រោយពីបានស្បថឡើងកាន់មុខតំណែងជានាយករដ្ឋមន្ត្រីថ្មីនៃរដ្ឋាភិបាលនិរទេសទីបេ។ ដូច្នេះ លោក Lobsang Sangay បានស្នងតំណែងបន្តពីសម្តេចសង្ឃដាឡៃឡាម៉ាដែលបានចាកចេញពីជីវិតនយោបាយទៅបំពេញបេសកកម្មជាអគ្គមគ្គុទ្ទេសក៍ខាងផ្លូវធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
លោក Lobsang Sangay នាយករដ្ឋមន្ត្រីថ្មីនៃរដ្ឋាភិបាលនិរទេសទីបេជាអ្នកឯកទេសខាងច្បាប់អន្តរជាតិ លោកបានទទួលសញ្ញាបត្រច្បាប់ពីមហាវិទ្យាល័យអាមេរិកាំង Harvard ដ៏ល្បីឈ្មោះ។ លោក Lobsang Sangay ប្រយុទ្ធទាមទារចង់បានស្វ័យភាពមួយពិតប្រាកដសម្រាប់ទីបេ ដែលឋិតនៅក្រោមការគ្រប់គ្រងរបស់ប្រទេសចិនតាំងពីឆ្នាំ១៩៥១។
លោក Lobsang Sangay ពាក់អាវធំ ចងកក្រវ៉ាត់ដូចជនជាតិអឺរ៉ុបដែលខុសពីរូបភាពរបស់សម្តេចសង្ឃដាឡៃឡាម៉ាដែលស្លៀកដណ្តប់ដោយស្បង់ចីវរតាមបែបលោកសង្ឃទីបេ។ លោក Lobsang Sangay កើតនៅប្រទេសឥណ្ឌា មានអាយុ៤៣ឆ្នាំ ហើយពុំដែលជាន់ទឹកដីទីបេទាល់តែសោះ។ ក៏ប៉ុន្តែ លោក Lobsang Sangay យល់ដឹងណាស់ពីក្តីអស់សង្ឃឹមរបស់លោកសង្ឃនិងដូនជីទីបេដែលបានដុតសម្លាប់ខ្លួន ដើម្បីសម្ដែងឲ្យឃើញនូវការប្រឆាំងទល់នឹងការវាយបង្ក្រាបរបស់អាជ្ញាធរចិន។ ដូច្នេះទស្សនកិច្ចរបស់លោក Lobsang Sangay នៅប្រទេសអឺរ៉ុបនេះគឺដើម្បីធ្វើឲ្យសាធារណមតិជ្រួតជ្រាបពីសោកនាដកម្មទីបេ។
“បុរសទុយនីស៊ីម្នាក់បានដុតសម្លាប់ខ្លួន ដែលជាមូលហេតុនាំឲ្យកើតមានបដិវត្តន៍និទាឃរដូវអារ៉ាប់ និងធ្វើឲ្យកើតមានការគាំទ្រពីសំណាក់មជ្ឈដ្ឋានអន្តរជាតិ។ នៅទីបេឯណោះ ការដុតសម្លាប់ខ្លួនមានដល់ទៅ១៣ករណី ប៉ុន្តែគេគ្មានឃើញការគាំទ្រអ្វីសោះ”។ នេះជាការថ្លែងសោកស្តាយរបស់លោក Lobsang Sangay នាយករដ្ឋមន្ត្រីថ្មីនៃរដ្ឋាភិបាលនិរទេសទីបេនាឱកាសសន្នីសីទកាសែតនៅថ្ងៃសៅរ៍ទី២៦វិច្ឆិកាឆ្នាំ២០១១នៅទីក្រុងប៉ារីស។
ហើយ លោក Lobsang Sangay បានថ្លែងបន្ថែមថា “ខ្ញុំមកទីនេះដើម្បីជួយផ្តល់ក្តីសង្ឃឹមឲ្យប្រជាជនទីបេ ឲ្យប្រជាជនទីបេឈប់ដុតសម្លាប់ខ្លួន ហើយឲ្យបន្តមានជិវិតដើម្បីប្រយុទ្ធទាមទារការពារមូលហេតុទីបេ ហើយខ្ញុំចង់ថ្លែងប្រាប់ប្រជាជនទីបេទៀតថា នៅគ្រប់ទិសទីនៅលើពិភពលោក មានអ្នកស្រឡាញ់យុត្តិធម៌ ស្រឡាញ់សេរីភាព ពួកគេនៅគាំទ្រមូលហេតុទីបេរបស់យើង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ