ជាប្រវត្តិសាស្រ្តដែលមានកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៧:០១
៥ថ្ងៃបន្ទាប់ពីចរចាយ៉ាងស្វិតស្វាញនៅទីក្រុងហ្សឺណែវ ប្រទេសស្វីស ប្រទេសមហាអំណាច៥ បូក ១ និងអ៊ីរ៉ង់បានធ្វើយល់ព្រម នៅព្រឹកថ្ងៃអាទិត្យធ្វើកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់។ អ៊ីរ៉ង់យល់ព្រមបញ្ឈប់ចម្រើនធាតុអ៊ុយរ៉ានីញ៉ូមដែលលើសពី៥ភាគរយ។ ជាថ្នូរមកវិញ ប្រទេសមហាអំណាចសម្រាលទណ្ឌកម្មសេដ្ឋកិច្ច ដែលនឹងធ្វើឲ្យអ៊ីរ៉ង់ទទួលបានប្រយោជន៍ប្រមាណ ៧ពាន់លានដុល្លារ។
តាម សេតវិមានអាមេរិក អ៊ីរ៉ង់ បានយល់ព្រមបញ្ឈប់ជាបន្ទាន់ការចម្រើនធាតុអ៊ុយរ៉ានីញ៉ូមដែលមានកម្រិតលើសពី៥ភាគរយ និងឈប់ផលិតម៉ាស៊ីនដែលជំនាញខាងចម្រើនធាតុអ៊ុយរ៉ានីញ៉ូម។ ជាចំណុចសំខាន់ ព្រោះប្រទេសមហាអំណាចវាយតម្លៃថា សកម្មភាពចម្រើនធាតុអ៊ុយរ៉ានីញ៉ូមដែលលើសពី៥ភាគរយទៅ នឹងចាត់ចូលក្នុងកម្មវិធីនុយក្លេអ៊ែរយោធា ប៉ុន្តែមិនមែននុយក្លេអ៊ែរស៊ីវិល ដូចដែលអ៊ីរ៉ង់ធ្លាប់អះអាងទេ។
ទីពីរ អ៊ីរ៉ង់ត្រូវបំផ្លាញធាតុអ៊ុយរ៉ានីញ៉ូមដែលខ្លួនបានចម្រើនដល់២០ភាគរយរួចហើយ។
បន្ទាប់មកទៀត អ៊ីរ៉ង់បានយល់ព្រមបញ្ឈប់ការសាងសង់នៅរោងចក្រArak។ បារាំងបានទាមទារដាច់ខាតចំណុចនេះ ព្រោះបារាំងសង្ស័យថា រោងចក្រArak ត្រូវបង្កើតឡើង ក្នុងគោលដៅនុយក្លេអ៊ែរយោធា។ ការចរចា កាលពីថ្ងៃទី ៩វិច្ឆិកាកន្លងទៅបានបរាជ័យ ដោយសារតែអ៊ីរ៉ង់មិនយល់ព្រមតាមការទាមទាររបស់បារាំង។
►សូមអាន៖កិច្ចពិភាក្សានុយក្លេអ៊ែរអ៊ីរ៉ង់ថ្ងៃទីបី បារាំងប្រុងប្រយ័ត្នចំពោះចំនុចខ្លះនៃកិច្ចព្រមព្រៀង
ទីបីទៀតអ៊ីរ៉ង់បានយល់ព្រមឲ្យមន្រ្តីរបស់ទីភ្នាក់ងារអន្តរជាតិនៃថាមពលបរិមាណូ AIEAចូលធ្វើអធិការកិច្ចលើទីតាំងរោងចក្រនុយក្លេអ៊ែររបស់ខ្លួន និងផ្តល់ព័ត៌មានស្តីពីដំណើរការនៃម៉ាស៊ីនប្រតិករនៅរោងចក្រArak ដល់ភ្នាក់ងារAIEA។
បើសិនជាអ៊ីរ៉ង់ធ្វើបានតាមការសន្យា នៅក្នុងកិច្ចព្រមព្រៀងខាងលើ នោះ ប្រទេសមហាអំណាចបានសម្រេចផ្អាកព្យួរការដាក់ទណ្ឌកម្មសេដ្ឋកិច្ចថ្មីៗក្នុងរយៈពេល៦ខែ ទៅមុខ ទៅលើអ៊ីរ៉ង់។ លើសពីនោះទៀត ប្រទេសលោកខាងលិច ជាពិសេស អាមេរិកនឹងសម្រាលលើកទណ្ឌកម្មមួយចំនួនដែលនឹងធ្វើឲ្យអ៊ីរ៉ង់ទទួលបានប្រយោជន៍ប្រមាណ ៧ពាន់លានដុល្លារ។ ជាក់ស្តែង អាមេរិក និងប្រទេសនៅអឺរ៉ុប នឹងព្យួរទណ្ឌកម្មមួយចំនួនដែលគេបានដាក់លើអ៊ីរ៉ង់ ដូចជាចរាចរណ៍ទិញលក់មាសរបស់អ៊ីរ៉ង និងការនាំចេញប្រេងគីមីរបស់អ៊ីរ៉ង់។ ជាពិសេសទៅទៀត គេនឹងអនុញ្ញាតឲ្យអ៊ីរ៉ង់បានទទួល ទឹកប្រាក់ប្រមាណជាង ៤ពាន់លានដុល្លារ ដែលអ៊ីរ៉ង់បានមកពីការលក់ប្រេង ប៉ុន្តែ ដែលត្រូវគេផ្អិបទុកនៅបរទេស ដោយសារទណ្ឌកម្មសេដ្ឋកិច្ចរបស់អ៊ីរ៉ង់។
ប៉ុន្តែ យ៉ាងណាក៏ដោយ តាមសេតវិមាន នៅមានទណ្ឌកម្មសំខាន់ៗជាច្រើនទៀត ដែលគេនៅដាក់លើអ៊ីរ៉ង់ ដែលគេមិនផ្អាកព្យួរ នៅក្នុងកិច្ចព្រមព្រៀងលើកនេះ។ ទណ្ឌកម្មទាំងនោះដែលដាក់ដោយក្រុមប្រឹក្សាសន្តិសុខ និងអាមេរិកផ្ទាល់ ផ្តោតទៅលើប្រព័ន្ធធនាគាររបស់អ៊ីរ៉ង់ កម្មវិធីយោធារបស់អ៊ីរ៉ង់ និងហិបប្រាក់អ៊ីរ៉ង់ នៅបរទេស។
កិច្ចព្រមព្រៀងប្រវត្តិសាស្រ្ត
កិច្ចព្រមព្រៀងនៅថ្ងៃអាទិត្យបិទបញ្ចប់វិបត្តិ១០ឆ្នាំ ដែលប្រទេសមហាអំណាច និងអ៊ីរ៉ង់ឈ្លោះ និយាយមិនត្រូវគ្នាពីសំណុំរឿងនុយក្លេអ៊ែរអ៊ីរ៉ង់។នៅព្រឹកថ្ងៃអាទិត្យនេះ លោកប្រធានាធិបតីអាមេរិកដែលបានបោះដៃទៅរកអ៊ីរ៉ង់ និងចង់ដោះស្រាយវិបត្តិនុយក្លេអ៊ែររបស់អ៊ីរ៉ង់តាមរយៈការទូត បានស្វាគម កិច្ចព្រមព្រៀងដែលចេញកាលពីព្រឹកមិញនេះ។ សម្រាប់លោកអូបាម៉ា កិច្ចព្រមព្រៀងនឹងជំរុញឲ្យអ៊ីរ៉ង់បិទបញ្ចប់កម្មវិធីនុយក្លេអ៊ែរយោធា។
►សូមអាន៖ស្វែងយល់អំពីវិបត្តិនុយក្លេអ៊ែរអ៊ីរ៉ង់
ប៉ុន្តែ យ៉ាងណាក៏ដោយ លោកបារ៉ាក់ អូបាម៉ា ដែលមានការប្រុងប្រយ័ត្នមួយ បានបញ្ជាក់ថា កិច្ចព្រមព្រៀងលើកនេះ គ្រាន់តែជាកិច្ចព្រមព្រៀងបឋមតែប៉ុណ្ណោះ។ កិច្ចព្រមព្រៀងពេញលេញមួយនឹងត្រូវគេធ្វើឡើង ក្នុងរយៈពេល ៦ខែខាងមុខ។ មានន័យថា ប្រទេសមហាអំណាចបានផ្តល់រយៈពេលសាកល្បង៦ខែ ដល់អ៊ីរ៉ង់ ដើម្បីឲ្យអ៊ីរ៉ង់ អនុវត្តសកម្មភាព ដែលអ៊ីរ៉ង់បានសន្យាធ្វើ នៅក្នុងកិច្ចព្រមព្រៀង។ តាមអូបាម៉ា អាមេរិកផ្ទាល់នឹងបង្កើនការដាក់គំនាប និងពង្រឹងទណ្ឌកម្មលើអ៊ីរ៉ង់ ប្រសិនបើអ៊ីរ៉ង់មិនគោរពតាមកិច្ចព្រមព្រៀង។
ប្រមុខការបរទេសរុស្ស៊ី វិញ ដែលជាសម្ព័ន្ធមិត្តរបស់អ៊ីរ៉ង់ បានថ្លែងថា គ្មានទេ អ្នកចាញ់ និងអ្នកឈ្នះ នៅក្នុងកិច្ចចរចាលើកនេះ។ នោះមានន័យថា ភាគីទាំងពីរ គឺប្រទេសមហាអំណាច ទាំង៦ និងអ៊ីរ៉ង់បានធ្វើសម្បទានទៅវិញ ទៅមក ដើម្បីអាចសម្រេចឈានទៅបង្កើតកិច្ចព្រមព្រៀងនេះ។ មួយវិញទៀត គេមើលឃើញថា ជំហរទន់ភ្លន់ជាងមុនរបស់ប្រធានាធិបតីអ៊ីរ៉ង់ថ្មី ដែលមិនសូវរឹងត្អឹងដូចប្រធានាធិបតីមុន អាចជាចលកររុញឲ្យអ៊ីរ៉ង់ធ្វើកិច្ចព្រមព្រៀងមួយជាមួយប្រទេសមហាអំណាច។
►សូមអាន៖ តើជំហរទន់ភ្លន់របស់លោករ៉ូហានីអាចឈានទៅដល់ការស្តារទំនាក់ទំនងអ៊ីរ៉ង់-អាមេរិកឬទេ?
ប្រធានាធិតបីអ៊ីរ៉ង់ពីទីក្រុងតេអេរ៉ង់បានអបអរកិច្ចព្រមព្រៀង ដែលបើតាមលោក គឺប្រទេសលោកខាងលិចបានទទួលស្គាល់សិទ្ធិរបស់អ៊ីរ៉ង់មាននុយក្លេអ៊ែរ ពោលគឺអ៊ីរ៉ង់មានសិទ្ធិចម្រើនធាតុអ៊ុយរ៉ានីញ៉ូមដើម្បីកម្មវិធីនុយក្លេអ៊ែរស៊ីវិល។
អ៊ីស្រាអែលមានតែការខកចិត្ត និងមួម៉ៅមិនសប្បាយចិត្ត។
នៅក្រោយចុះកិច្ចព្រមព្រៀងជាមួយអ៊ីរ៉ង់ ប្រមុខការបរទេសអាមេរិកបានបញ្ជាក់ធានាទៅភាគីអ៊ីស្រាអែលថា កិច្ចព្រមព្រៀងលើកនេះសំដៅធានាសន្តិសុខរបស់អ៊ីស្រាអែល។ ប៉ុន្តែ ការបញ្ចុះបញ្ចូលរបស់អាមេរិកមិនអាចឲ្យធ្វើឲ្យអ៊ីស្រាអែលស្ងប់ចិត្តបាន។ អ៊ីស្រាអែល មិនសប្បាយចិត្តតាំងពីយូរមកហើយ ជាមួយអាមេរិក ដែលអ៊ីស្រាអែលវាយតម្លៃថា មានជំហរទន់ភ្លន់ពេកជាមួយអ៊ីរ៉ង់។ អស់សង្ឃឹមនឹងអាមេរិក អ៊ីស្រាអែលខំប្រឹងដើរនយោបាយការទូត នៅប៉ុន្មានថ្ងៃមុននេះ ដើម្បីបញ្ចុះបញ្ចូលប្រទេសមហាអំណាចផ្សេងទៀត ដើម្បីកុំឲ្យគេធ្វើកិច្ចព្រមព្រៀងជាមួយអ៊ីរ៉ង់ ដែលជាសត្រូវរបស់ខ្លួន និងដែលអ៊ីស្រាអែលវាយតម្លៃថា កំពុងលួចផលិតអាវុធនុយក្លេអ៊ែរដែលគំរាមសន្តិសុខរបស់អ៊ីស្រាអែល។
►សូមអាន៖ នុយក្លេអ៊ែរអ៊ីរ៉ង់៖ អាមេរិកកំពុងធ្វើឲ្យអ៊ីស្រាអែល និងអារ៉ាប៊ីសាអូឌីតក្តៅក្រហាយ
កាលពីព្រឹកមិញនេះ ការិយាល័យនាយករដ្ឋមន្រ្តីអ៊ីស្រាអែលដែលមិនបានលាក់កំហឹងជូរចត់របស់អ៊ីស្រាអែលបានចេញលិខិតមួយចាត់ទុកកិច្ចព្រមព្រៀងព្រឹកមិញថា ជាកិច្ចព្រមព្រៀងដ៏អាក្រក់មួយ និងជាជ័យជំនះរបស់ការទូតអ៊ីរ៉ង់។ សម្រាប់អ៊ីស្រាអែល ប្រទេសលោកខាងលិចបានចាញ់បោកអ៊ីរ៉ង់ ព្រោះ អ៊ីរ៉ង់បានទទួលអ្វីដែលខ្លួនគេបានទាមទារ ពោលគឺអ៊ីរ៉ង់នៅតែអាចចម្រើនធាតុអ៊ុយរ៉ានីញ៉ូម។
អ៊ីស្រាអែលបានបញ្ជាក់ផងដែរថា ខ្លួនគេមិនបានចងភ្ជាប់ខ្លួនគេទៅក្នុងកិច្ចព្រមព្រៀងនៅព្រឹកមិញនេះទេ។ លោកនាយករដ្ឋមន្រ្តីអ៊ីស្រាអែល ដែលប្រឆាំងដាច់ខាតរាល់ការសម្រាលទណ្ឌកម្មទៅលើអ៊ីរ៉ង់ ធ្លាប់បានព្រមាន ហើយថា អ៊ីស្រាអែលនឹងបើកការវាយប្រហារយោធាទៅលើទីតាំងនុយក្លេអ៊ែររបស់អ៊ីរ៉ង់ ដែលអ៊ីស្រាអែលចាត់ទុកថា កំពុងលួចផលិតអាវុធនុយក្លេអ៊ែរសម្រាប់គំរាមកំហែងអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ