កូរ៉េខាងជើងកោះហៅជាបន្ទាន់ ពាណិជ្ជកររបស់ខ្លួនពីប្រទេសចិន
អ្នកជំនួញកូរ៉េខាងជើង នៅប្រទេសចិន ត្រូវបានគេបញ្ជាឲ្យត្រលប់ចូលស្រុកវិញយ៉ាងឆាប់ ប្រថុចញ៉ុក នៅក្នុងសប្តាហ៍នេះ។ តាមទីភ្នាក់ងារព័ត៌មានកូរ៉េខាងត្បូង យុនហាប់ ព្រឹត្តិការណ៍នេះអាចជាប់ទាក់ទងនឹងការបោសសម្អាតមន្រ្តីដែលជាប់ពាក់ព័ន្ធនឹង លោកចាង សុងថេក អតីតមេដឹកនាំទីពីររបស់កូរ៉េខាងជើង ដែលត្រូវតុលាការយោធាកាត់ទោសប្រហារជីវិត កាលពីថ្ងៃព្រហស្បតិ៍កន្លងទៅ។
ចុះផ្សាយនៅថ្ងៃ៖
ស្តាប់ - ០១:៥៤
តាមការចុះផ្សាយរបស់ទីភ្នាក់ងារព័ត៌មានកូរ៉េខាងត្បូង យុនហាប់ អ្នកដែលត្រូវថ្នាក់ដឹកនាំកូរ៉េខាងជើងកោះហៅឲ្យត្រលប់ចូលស្រុក ជាបន្ទាន់ នោះ ភាគច្រើន ជាអ្នកជំនួញកូរ៉េខាងជើង ដែលកំពុងធ្វើការនៅទីក្រុងShenyang និងDandong ក្នុងប្រទេសចិន។ ពួកគេទាំងនោះ ធ្វើការខាងសម្របសម្រួលពាណិជ្ជកម្មទ្វេភាគីចិន និងកូរ៉េខាងជើង និងទាក់ទាញពាណិជ្ជករចិនឲ្យបោះទុនវិនិយោគនៅកូរ៉េខាងជើង។
តាមទីភ្នាក់ងារព័ត៌មាន យុនហាប់ គេជឿថា លោកចាង សុងថេក ដែលជាមាថ្លៃរបស់មេដឹកនាំវ័យក្មេង គីម ជុងអ៊ុន ជាមន្រ្តីជាន់ខ្ពស់របស់កូរ៉េខាងជើង ដែលទទួលបន្ទុកពង្រឹងចំណងសេដ្ឋកិច្ចជាមួយសម្ព័ន្ធចិន។ ដំណឹងផ្លូវការពីកូរ៉េខាងជើង បង្ហាញថា លោកចាង សុងថេក ត្រូវគេប្រហារជីវិត កាលពីថ្ងៃព្រហស្បតិ៍ ដោយសារលោកបានប្រព្រឹត្តអំពើពុករលួយ និងប៉ុនប៉ង មានគម្រោងផ្តួលរំលំអំណាចរបស់លោកគីម ជុងអ៊ុន។ ប៉ុន្តែ តាមអ្នកវិភាគខ្លះ លោកចាង សុងថេកត្រូវគេប្រហារជីវិត ដោយសារលោកគាំទ្រកោតសរសើរកំណែទម្រង់សេដ្ឋកិច្ចប្រទេសចិន។
ការកោះហៅមន្រ្តី និងអ្នកជំនួញកូរ៉េខាងជើង ពីប្រទេសចិន យ៉ាងប្រញាប់ បន្ទាន់បែបនេះ ត្រូវគេមើលឃើញថា ជាប្រតិបត្តិការពង្រឹងអំណាចរបស់លោកគីម ជុងអ៊ុន ដែលចង់បោសសម្អាតអ្នកដែលជាប់ពាក់ព័ន្ធនឹងលោកចាង សុងថេក។ តាមមន្រ្តីស៊ើបការណ៍សម្ងាត់កូរ៉េខាងត្បូង មនុស្សជំនិតពីរនាក់របស់លោកចាង សុងថេក ត្រូវបានគេប្រហារជីវិតកាលពីខែវិច្ឆិកាមុន។
ទីភ្នាក់ងារព័ត៌មានផ្លូវរដ្ឋកូរ៉េខាងជើងវិញ បានបញ្ចេញព័ត៌មានដែលផ្ទុយនឹងពាក្យចចាម អារ៉ាមស្តីពីការបន្តបោសសម្អាតផ្ទៃក្នុងរបស់បក្ស។ ជាក់ស្តែង ទីភ្នាក់ងារព័ត៌មានបានបង្ហាញវត្តមានរបស់គីម ឃ្យុង ហ៊ុយ ដែលជាម្តាយមីងរបស់លោកគីម ជុងអ៊ុន និងជាភរិយារបស់លោកចាង សុងថេក ដែលត្រូវគេប្រហារជីវិត កាលពីថ្ងៃព្រហស្បតិ៍។
តាមអ្នកជំនាញ នយោបាយ អាស៊ី លោកគីម ជុងអ៊ុនមិនអាចប្រហារជីវិតប្អូនស្រីរបស់ឪពុក ដែលជាសែស្រឡាយរបស់ខ្លួននោះទេ។ ការធ្វើផ្ទុយពីនោះ គឺដូចជាការដកកាំបិតសម្លាប់ខ្លួនឯង នៅទីបញ្ចប់យ៉ាងដូច្នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ