ចិនកោះហៅទូតឥណ្ឌាមកតវ៉ារឿងលោកណារិនដ្រា ម៉ូឌីធ្វើដំណើរទៅតំបន់ព្រំដែនជាប់ជម្លោះ
រដ្ឋាភិបាលចិនបានបញ្ចេញប្រតិកម្មដោយកំហឹងចំពោះឥណ្ឌា ក្រោយពីលោកណារិនដ្រា ម៉ូឌីបានធ្វើដំណើរទៅបំពេញទស្សនកិច្ចនៅក្នុងតំបន់ព្រំដែន ដែលកំពុងជាប់ជម្លោះជាមួយចិន។ យោងតាមសេចក្តីរាយការណ៍របស់បណ្តាញផ្សព្វផ្សាយរដ្ឋចិន ឯកអគ្គរដ្ឋទូតឥណ្ឌាប្រចាំទីក្រុងប៉េកាំងត្រូវបានក្រសួងការបរទេសចិនកោះហៅឲ្យមកជួប កាលពីថ្ងៃសៅរ៍ម្សិលមិញ ដើម្បីធ្វើការតវ៉ាជាផ្លូវការជុំវិញរឿងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ដំណើរទស្សនកិច្ចរបស់លោកណារិនដ្រា ម៉ូឌី ទៅកាន់រដ្ឋ Arunachal Pradesh ត្រូវបានធ្វើឡើង កាលពីថ្ងៃសុក្រ ដើម្បីទៅសម្ពោធហេដ្ឋារចនាសម្ព័ន្ធមួយចំនួនក្នុងវិស័យផ្លូវដែក និងថាមពល។ ទស្សនកិច្ចដែលមិនរំលងពីក្រសែភ្នែករបស់រដ្ឋាភិបាលចិន ដែលបានបញ្ចេញប្រតិកម្មតបភ្លាមៗ ដោយចាត់ទុកទង្វើរបស់លោកនាយករដ្ឋមន្រ្តីឥណ្ឌាថាជាការរំលោភបំពានទៅលើអធិបតេយ្យដែនដី រំលោភទៅលើសិទ្ធិនិងផលប្រយោជន៍របស់ចិន ហើយថា ដំណើរទស្សនកិច្ចនេះកំពុងតែធ្វើឲ្យជម្លោះព្រំដែន រវាងចិន និងឥណ្ឌាត្រូវជួបនឹងភាពតានតឹងឡើងវិញ ដែលផ្ទុយពីអ្វីដែលបានព្រមព្រៀងគ្នា រវាងប្រមុខដឹកនាំប្រទេសទាំងពីរ នាពេលកន្លងមក។
ទីភ្នាក់ងារព័ត៌មានចិនស៊ីនហួបានចុះផ្សាយឲ្យដឹងថា នៅក្នុងជំនួបជាមួយឯកអគ្គរដ្ឋទូតឥណ្ឌា កាលពីថ្ងៃសៅរ៍ អនុរដ្ឋមន្រ្តីការបរទេសចិនបានរំឭកឡើងវិញថា រដ្ឋ Arunachal Pradesh នេះត្រូវបានបង្កើតឡើងជាឯកតោគីដោយឥណ្ឌា ហើយថា តាំងពីដើមរៀងមក ចិនមិនដែលទទួលស្គាល់អធិបតេយ្យភាពរបស់ឥណ្ឌានៅក្នុងតំបន់នេះនោះទេ។
គួរបញ្ជាក់ថា ចិន និងឥណ្ឌា មានជម្លោះព្រំដែននៅក្នុងតំបន់ធំៗចំនួនពីរ គឺតំបន់ Aksai Chin ដែលស្ថិតនៅក្រោមការគ្រប់គ្រងរបស់ចិន តែទាមទារដោយឥណ្ឌា និងតំបន់ Arunachal Pradesh ដែលស្ថិតក្រោមការគ្រប់គ្រងរបស់ឥណ្ឌា តែទាមទារដោយចិន។ ជម្លោះព្រំដែននេះធ្លាប់បានបង្កឲ្យមានសង្រ្គាមម្តងរួចមកហើយ រវាងប្រទេសទាំងពីរ កាលពីឆ្នាំ១៩៦២។
បច្ចុប្បន្ននេះ ជម្លោះព្រំដែននៅតែជាបញ្ហាចោទដ៏ធំមួយ នៅក្នុងទំនាក់ទំនង រវាងមហាអំណាចអាស៊ីទាំងពីរ ដែលតែងតែចោទប្រកាន់គ្នាទៅវិញទៅមកថាបានរំលោភលើព្រំដែន នៅក្នុងតំបន់ជាប់ជម្លោះ។
កាលពីថ្ងៃសៅរ៍ម្សិលមិញ ចិនបានអំពាវនាវដល់ឥណ្ឌាឲ្យបញ្ឈប់រាល់សកម្មភាពដែលអាចបង្កឲ្យមានភាពតានតឹងនៅតាមព្រំដែន ហើយដែលអាចបង្កជាបញ្ហានៅក្នុងទំនាក់ទំនងទ្វេភាគី រវាងចិន និងឥណ្ឌា ដែលសុទ្ធជាមហាអំណាចសេដ្ឋកិច្ច និងជាប្រទេសក្នុងក្រុមប្រទេស BRICS៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ