ឥណ្ឌារបស់លោក ម៉ូឌី ផ្តើមចរចាបញ្ហាព្រំដែនជាលើកដំបូងជាមួយចិន
នៅសប្តាហ៍នេះ ប្រមុខដឹកនាំជាន់ខ្ពស់ចិននិងឥណ្ឌានឹងជួបពិភាក្សាគ្នា ដើម្បីដោះស្រាយវិបត្តិព្រំដែនដែលប្រទេសទាំងពីរមានជម្លោះនឹងគ្នា។ នេះជាកិច្ចចរចាព្រំដែនលើកទីមួយហើយ គិតចាប់តាំងពីនាយករដ្ឋមន្ត្រីឥណ្ឌា លោក ណារិនដ្រា ម៉ូឌី ឡើងកាន់អំណាចមក។
ចុះផ្សាយនៅថ្ងៃ៖
ស្តាប់ - ០១:៣៩
តំណាងពិសេសរបស់ចិន លោក យ៉ាង ជៀឈី (អតីតរដ្ឋមន្ត្រីការបរទេសចិន ២០០៧-២០១៣) ត្រូវបំពេញទស្សនកិច្ចនៅប្រទេសឥណ្ឌាពីថ្ងៃអាទិត្យទី ២២មីនា ដល់ថ្ងៃអង្គារទី២៤មីនា ដើម្បីជួបចរចាជាមួយតំណាងសន្តិសុខជាតិឥណ្ឌា លោក អាជីត ដូវ៉ាល់។ នេះបើតាមក្រសួងការបរទេសឥណ្ឌា។
កិច្ចពិភាក្សាដែលជាផ្លូវការត្រូវចាប់ផ្តើមនៅចន្ទ គឺជាជំនួបចរចាព្រំដែនលើកទី ១៨ តែជាលើកដំបូងសម្រាប់រដ្ឋាភិបាល លោក ណារិនដ្រា ម៉ូឌី។ ជំនួបប្រជុំនេះ ជាការរៀបចំ ដែលប្រទេសមហាអំណាចក្នុងតំបន់ទាំងពីរ សាកល្បងជំរុញស្ថានការណ៍ឱ្យបានប្រសើរឡើង មុននឹងឈានដល់ដំណើរទស្សនកិច្ចរបស់នាយករដ្ឋមន្ត្រីឥណ្ឌានៅប្រទេសចិន នាខែឧសភាខាងមុខ។
ដោយសារបញ្ហាព្រំដែន មហាយក្សចិននិងឥណ្ឌា ធ្លាប់មានសង្គ្រាមបង្ហូរឈាមនឹងគ្នាមួយប្រាវ កាលពីឆ្នាំ១៩៦២។ ហើយបញ្ហាព្រំដែននេះ នៅមិនដោះស្រាយគ្នាចប់ទេ ប្រទេសជិតខាងទាំងពីរ តែងចោទប្រកាន់គ្នាទៅវិញទៅមក អំពីសកម្មភាពរំលោភបំពានព្រំដែនក្នុងតំបន់ជាប់ជម្លោះ។ កាលពីខែកញ្ញាកន្លងទៅថ្មីៗនេះ ភាពតានតឹងតាមព្រំដែនបានកើនឡើងដល់កំរិតកំពូល បន្ទាប់ពីទាហានចិនរាប់រយនាក់បានចូលតំបន់ហិម៉ាឡាយ៉ាដែលទាមទារដោយឥណ្ឌា។ ភាពតានតឹងយោធានៅតាមព្រំដែន ដែលបានផ្ទុចជើងលោកស៊ីជីនពីង ឱ្យមិននិយាយអំពីទំនាក់ទំនងការទូត រវាងចិននិងរដ្ឋាភិបាលថ្មីថ្មោងឥណ្ឌារបស់លោក ណារិនដ្រា ម៉ូឌី នាឱកាសទស្សនកិច្ចនៅឥណ្ឌា កាលពីចុងខែកញ្ញា ឆ្នាំ២០១៤។
លោក អាជីត ដូវ៉ាល់ បានឱ្យដឹងកាលពីខែតុលាថា ឥណ្ឌាមានឆន្ទៈដោះស្រាយបញ្ហាព្រំដែនជាមួយចិន ប៉ុន្តែមិនចង់ឱ្យប៉ះពាល់ដល់សន្តិសុខនិងទឹកដីរបស់ខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ