សភាអាហ្វហ្កានីស្ថាន រងការវាយប្រហារតាលីបង់
សំឡេងផ្ទុះ សំឡេងគ្រាប់បាញ់តគ្នា បានលាន់ឮឡើងនៅសភាអាហ្វហ្កានីស្ថាន កណ្តាលក្រុងកាប៊ូល នាព្រឹកថ្ងៃចន្ទទី ២២ មិថុនា២០១៥នេះ ដោយក្រុមប្រដាប់អាវុធតាលីបង់។ បន្ទាប់ពីចូលកាន់កាប់សភាអស់ពីរម៉ោង និងមានការបាញ់រះតគ្នា ពួកឧទ្ទាមតាលីបង់ទាំង៧នាក់បានស្លាប់ និងមានជនស៊ីវិលរបួសជាច្រើននាក់។ នេះបើតាមប្រភពក្រសួងមហាផ្ទៃអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ជនតាលីបង់ម្នាក់បានបើកឡានបុកចូលទៅបំផ្ទុះនៅមុខសភា ៦នាក់ផ្សេងទៀត បានសម្រុកវាយលុកចូលកាន់កាប់ក្នុងអាគារសភា ទើបប៉ូលិសបើកប្រតិបត្តិការកម្ចាត់ ដោយមានការបាញ់កាំភ្លើងតបតគ្នារហូតទាល់តែកម្ចាត់ជីវិតពួកឧទ្ទាមតាលីបង់អស់។ សភាជាតិត្រូវបានរំដោះ នៅពេលរសៀល ប៉ុន្តែបើក្រសួងសុខាភិបាលសាធារណៈ មានជនស៊ីវិលប្រមាណ២៥នាក់រងរបួស ក្នុងនោះ៥នាក់ជាស្រ្តី និងបីនាក់ជាកុមារ។
ការវាយប្រហារពីសំណាក់ពួកតាលីបង់ បានកើតឡើងក្នុងខណៈពេលដែលសភាអាហ្វហ្កានីស្ថាន កំពុងរៀបចំស្គាល់មុខបេក្ខជនរដ្ឋមន្ត្រីក្រសួងការពារជាតិ ដែលលោកប្រធានាធិបតីបានជ្រើសតាំង។ ទូរទស្សន៍ជាតិដែលផ្សាយបន្តផ្ទាល់សកម្មភាពនយោបាយនៅសភា បែរជាត្រូវបង្ហាញអំពីហេតុការណ៍បាញ់រះ និងផ្សែងខ្មៅបង្កឡើងដោយគ្រាប់ផ្ទុះ ព្រមទាំងសកម្មភាពជម្លៀសសមាជិកសភាចេញពីកន្លែងគ្រោះថ្នាក់។ សម្រាប់ពេលនេះ គ្មានរបាយការណ៍ណាមួយបញ្ជាក់អំពីគ្រោះថ្នាក់ ប៉ះពាល់ដល់តំណាងរាស្ត្រទេ។
ក្នុងរយៈពេលពីរខែចុងក្រោយនេះ រដ្ឋធានីកាប៊ូលបានរងការវាយប្រហារតាលីបង់ និងភេវកម្ម កាន់តែខ្លាំងឡើងៗ។ ប្រតិបត្តិការរដូវក្តៅរបស់ពួកតាលីបង់ ចាប់ពីខែមេសាមក ហាក់មានសន្ទុះខ្លាំង និងមរណៈបំផុត គិតចាប់តាំងពីរបបតាលីបង់ ដួលរលំនៅឆ្នាំ២០០១មក។ ពួកឧទ្ទាមបានប្រើយុទ្ធសាស្ត្រថ្មី ដៅការវាយប្រហារខ្លាំងលើ ប៉ូលិស យោធា និងទីតាំងមានទេសចរបរទេសច្រើន។
កាលពីថ្ងៃអាទិត្យ ពួកតាលីបង់ ក៏បានវាយប្រហារយកស្រុកមួយនៅភាគខាងជើងប្រទេស ជាប់ព្រំដែនជាមួយតាដជីគីស្ថាន។ តំបន់ដែលជាផ្លូវពាណិជ្ជកម្មដ៏សំខាន់មួយ របស់អាហ្វហ្កានីស្ថាន។ នេះជារដូវវាយប្រហារទីមួយ ដែលអាហ្វហ្កានីស្ថានត្រូវប្រឈមមុខតទល់តែម្នាក់ឯងដោយគ្មានវត្តមានទ័ពបរទេសយ៉ាងសន្ធឹកសន្ធាប់ដូចមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ