ប្រទះឃើញបំណែកស្លាបយន្តហោះនៅកោះរ៉េអ៊ុយញ៉ុង អាចជារបស់យន្តហោះMH370
អស់រយៈពេលជាងមួយឆ្នាំមកហើយ ដែលយន្តហោះម៉ាឡេស៊ីអ៊ែរឡាញ MH370 ដែលផ្ទុកអ្នកដំណើរចំនួន២៣៩ នាក់ បានបាត់ ដំណឹងឈឹងសូន្យ។ ការរុករកនៅក្នុងសមុទ្រ មិនបានផ្តល់លទ្ធផលអ្វីទាំងអស់។ ទើបតែនៅល្ងាចថ្ងៃព្រហស្បតិ៍ទី ៣០ កក្កដា ក្រុមអ្នកសំអាតឆ្នេរនៅកោះរ៉េអ៊ុយញ៉ុង ដែលជាដែនដីរបស់បារាំង បានរកឃើញបំណែកស្លាបយន្តហោះ មួយផ្ទាំង មានប្រវែងប្រហែលជា ជាង២ម៉ែត្រ។ អាជ្ញាធរម៉ាឡេស៊ី ព្រមទាំងអូស្រ្តាលី បានប្រកាសព្រមៗគ្នា ថា បំណែកយន្តហោះដែលគេប្រទះឃើញនេះ អាចជាបំណែកយន្តហោះ MH370 ព្រោះវាមានភិនភាគដូចគ្នាស្ទើតែទាំងស្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៤
បំណែកយន្តហោះមួយផ្ទាំង ប្រវែងប្រហែល២ម៉ែត្រ ត្រូវបានប្រទះឃើញដោយក្រុមអ្នកសំអាតឆ្នេរ នៅផ្នែកខាងកើត កោះរ៉េអ៊ុយញ៉ុង ដែលជាដែនដីរបស់បារាំង។ កោះរ៉េអ៊ុយញ៉ុងនេះ ជាកោះនៅក្នុងមហាសមុទ្រ ឥណ្ឌា ក្បែរនឹងម៉ាដាហ្កាស្កា និងទ្វីបអាហ្វ្រិក។ បើយើងគិតទៅ វានៅចំងាយប្រមាណជា ជាង ៤០០០ គីឡូម៉ែត្រ ពីតំបន់ឆ្នេរខាងលិចអូស្ត្រាលី ដែលជាតំបន់រុករកកន្លែងរុករកយន្តហោះ MH370។ គិតមកត្រឹមពេលនេះ គេមិនទាន់មានការសន្និដ្ឋាន ១០០% ថា បំណែកយន្តហោះនេះ ជារបស់យន្តហោះ MH370 ដែលបានធ្លាក់កាលពីខែមីនា ឆ្នាំទៅទេ។
រូបរាង្គភិនភាគ ដូចនឹងស្លាបយន្តហោះប្រភេទ Boeing777៖
ប៉ុន្តែបើយោងតាមការវិភាគរបស់អ្នកជំនាញមួយចំនួន ដែលបានឃើញរូបភាព បំណែកដែលគេប្រទះឃើញនេះ គេបានសន្និដ្ឋានថា វាមានទ្រង់ទ្រាយ ដូចជាបំណែកស្លាបរបស់យន្តហោះប្រភេទ Boeing777។ លោករដ្ឋមន្ត្រីក្រសួងដឹកជញ្ជូនអូស្ត្រាលី ដែលជាអ្នកគ្រប់គ្រងការរុករកយន្តហោះ MH370 បានប្រកាសភ្លាមដែរថា ក្រុមការងារលោក មានការប្រាកដក្នុងចិត្តកាន់តែច្រើន ថាបំណែកដែលទើបតែប្រទះឃើញនេះ អាចជាបំណែករបស់យន្តហោះប្រភេទ Boeing777។ យន្តហោះ ជើងហោះហើរ លេខMH370 ដែលបានបាត់ គឺជាប្រភេទយន្តហោះ Boeing777 នេះឯង។
ក្រៅពីភិនភាគ រូបរាង្គ ដែលដូចសឹងតែតាំងស្រុង ទៅនឹងប្រភេទយន្តហោះ Boeing777 បើយោងតាមសារព័ត៌មាននៅកោះរ៉េអ៊ុយញ៉ុង បានបញ្ជាក់ថា បំណែកដែលគេរកឃើញនេះ មានលេខសរសេរនៅខាងលើ គឺ 657-BB។ ពោលគឺវា ត្រូវគ្នានឹងលេខ ដែលមានចុះក្នុង ឯកសារលេខសំគាល់ របស់ធាតុផ្សំយន្តហោះ MH370 ដែលធ្លាប់ត្រូវបានគេផ្សព្វផ្សាយ កន្លងមកដែរ។ មួយវិញទៀត នៅតំបន់កោះរ៉េអ៊ុយញ៉ុង ក្នុងរយៈពេល២០ឆ្នាំ កន្លងមកនេះ មានគ្រោះថ្នាក់ធ្លាក់យន្តហោះ ចំនួន៤ដងប៉ុណ្ណោះ ហើយម្តងៗ មិនមែនជាយន្តហោះប្រភេទ Boeing777 ដូចយន្តហោះ MH370 ទេ។ ដូច្នេះ បើសិនជាគេច្បាស់ថា បំណែកនេះជាស្លាបរបស់យន្តហោះប្រភេទ Boeing777 នោះមានន័យថា វាប្រាកដណាស់ ថាវាពិតជារបស់ យន្តហោះ MH370 នេះហើយ។
មិនត្រឹមតែប៉ុណ្ណោះ ក្រុមអ្នកដែលរកឃើញបំណែកនេះ ថែមទាំងបានប្រទះឃើញ ដបទឹកថ្នាំបាញ់សម្អាតមួយ ដែលមានផ្លាកសេរសេរថា ផលិតនៅឥណ្ឌូណេស៊ី ហើយនឹងដបទឹកសុទ្ធមួយ ដែលជាម៉ាកទឹកសុទ្ធរបស់ចិន។ របស់របរទាំងនេះ វារឹតតែបញ្ជាក់បន្ថែមទៀត ព្រោះថា អ្នកដំណើរទាំងអស់ មាន ១៥៣នាក់ជា ជនជាតិចិន និង១២នាក់ជាជនជាតិឥណ្ឌូណេស៊ី។
បារាំងនឹងចេញលទ្ធផលស៊ើបអង្កេត នៅសប្តាហ៍ក្រោយ៖
អាជ្ញាធរបារាំង បានទាមទារ យកបំណែកដែលគេរកឃើញនេះ ទៅធ្វើការសិក្សាស្រាវជ្រាវ នៅខាងគេ ព្រោះគេអះអាងថា គេបានប្រទះឃើញ នៅលើដែនដីគេ ហើយមួយវិញទៀត ក្នុងចំណោមជនរងគ្រោះ ក៏មានជនជាតិបារាំង ៤នាក់ផងដែរ។ ខាងអូស្ត្រាលី និងម៉ាឡេស៊ី ក៏មិនបានសម្តែងការជំទាស់ដែរ។ ដូច្នេះ បំណែកស្លាប ប្រវែងជាង២ម៉ែត្រនេះ នឹងត្រូវដឹកទៅកាន់មន្ទីរស្រាវជ្រាវរបស់ការិយាល័យអង្កេតការណ៍ គ្រោះថ្នាក់យន្តហោះ របស់បារាំង នៅក្រុងទូលូស។ អាជ្ញាធរបារាំងបានបញ្ជាក់ លទ្ធផលយ៉ាងណា នឹងត្រូវគេប្រកាសឲ្យដឹងនៅសប្តាហ៍ក្រោយ។
រកឃើញបំណែក មិនប្រាកដថា នឹងប្រទះឃើញ កន្លែងធ្លាក់ទេ៖
លោក Warren Truss រដ្ឋមន្ត្រីដឹកជញ្ជូនអូស្រ្តាលី បានបញ្ជាក់ថា បើសិនជាបំណែកដែលទើបប្រទះឃើញនេះ ជាបំណែករបស់យន្តហោះ MH370 ពិតមែនចុះ ក៏គេនៅតែមិនប្រាកដថា គេនឹងប្រទះឃើញកន្លែងដែលយន្តហោះនេះធ្លាក់ដែរ។ ប៉ុន្តែអូស្ត្រាលី នៅតែអះអាងដែរថា ទោះបីជាគេប្រទះឃើញ បំណែកនៅចំងាយជាង ៤០០០គីឡូម៉ែត្រ ពីតំបន់រុករកក៏ដោយ ក៏គេនៅតែយល់ថា តំបន់ដែលគេរុករកន្លងមកនេះ ជាតំបន់ដែលអាចជាកន្លែងធ្លាក់ របស់យន្តហោះ MH370 ហើយគេនឹងបន្តរុករកវា នៅកន្លែងនោះតទៅទៀត។
ប៉ុន្តែ បើតាមប្រសាសន៍ អ្នកជំនាញបារាំង ផ្នែកសមុទ្រម្នាក់ បានសន្និដ្ឋាន ថា ចរន្តទឹកសមុទ្រក្នុងមហាសមុទ្រឥណ្ឌា ភាគខាងត្បូងខ្សែអេក្វាទ័រ មានកំលាំងខ្លាំង អាចរុញច្រានសំណាត់ទាំងអស់ ក្នុងចំងាយជាង ៤០០០គីឡូម៉ែត្រ ក្នុងរយៈពេលពី ១២ ទៅ១៨ខែ។ លោកបន្តថា បើសិនជាគេរកឃើញបំណែក នៅកោះរ៉េអ៊ុយញ៉ុង នោះគេអាចពិនិត្យឡើងវិញ ទៅលើរូបភាពផ្កាយរណប ដែលបង្ហាញពីចរន្តទឹកសមុទ្រ ដែលរុញវាទៅដល់នោះ។ ដូច្នេះវានាំឲ្យគេដឹងបាន ពីកន្លែងដើមរបស់ បំណែកនេះ ពោលគឺកន្លែងដែលយន្តហោះនេះ ធ្លាក់តែម្តង។
គ្រួសារជនរងគ្រោះ នៅតែមិនទាន់អស់ចិត្ត៖
ដំណឹងនេះ វាបានគាស់រំលើងមន្ទិលសង្ស័យ នឹងក្តីទុក្ខសោក របស់ក្រុមគ្រួសារជនរងគ្រោះទាំងអស់ ឡើងវិញ។ អស់រយៈពេលជិតមួយឆ្នាំកន្លះមកហើយ ដែលក្រុមគ្រួសារជនរងគ្រោះ មិនបានទទួលការសន្និដា្ឋនមួយឲ្យពិតប្រាដក ពីក្រុមអ្នកស្រាវជ្រាវនោះទេ។ ដូច្នេះទាំងយើងទាំងគេ ម្នាក់ៗចេះតែនៅមានសង្ឃឹមអញ្ចឹង។ កន្លងមក មានដំណឹងលេចឮថា យន្តហោះនោះ ប្រហែលជាមិនធ្លាក់ទេ តែអាចជាការរៀបចំរបស់ក្រុមភេរវករ ហើយយកយន្តហោះទៅចុះចតនៅទីណាឆ្ងាយ។ យើងឃើញថា ភាពមិនប្រាកដប្រជាទាំងអស់នេះ បានធ្វើឲ្យក្រុមគ្រួសារជនរងគ្រោះ គ្នាមិនអាចស្ងប់ចិត្តបាន។
កាលពីដើមឆ្នាំនេះ អាជ្ញាធរម៉ាឡេស៊ី បានធ្វើរបាយការណ៍ផ្លូវការមួយ សន្និដ្ឋានថា យន្តហោះ MH370 បានជួបគ្រោះថ្នាក់ ហើយអ្នកដំណើរទាំងអស់ ត្រូវចាត់ទុកថាបានស្លាប់ទាំងអស់។ របាយការណ៍នេះ បានធ្វើឲ្យក្រុមគ្រួសារជនរងគ្រោះ ខឹងសម្បារជាខ្លាំង ដោយសារតែវាគ្មានភស្តុតាងអ្វីទាំងអស់ ដែលបញ្ជាក់ថាយន្តហោះជួបគ្រោះថ្នាក់។ ហើយបើគ្រោះថ្នាក់មែន គ្រោះថ្នាក់បណ្តាលមកពីអ្វី។ ទាំងនេះហើយដែលគេចង់ដឹង។ ព្រោះវាអាចជាអាច មកពីយន្តហោះខូច រឺ អ្នកបើកបរមានចេតនាអាក្រក់ រឺប្រការណាមួយ ដែលក្រុមហ៊ុនអាកាសចរណ៍ម៉ាឡេស៊ី ត្រូវតែទទួលខុសត្រូវ លើការស្លាប់របស់អ្នកដំណើរ មិនមែន ប្រកាសថាយន្តហោះជួបគ្រោះថ្នាក់ ហើយចប់នោះទេ។
បន្ទាប់ពីដំណឹងរកឃើញបំណែកយន្តហោះនេះ ក្រុមគ្រួសារជនរងគ្រោះ ម្នាក់ៗមើលតែទូរស័ព្ទ ដើម្បីតាមដានដំណឹងថ្មីៗទៀត។ ឪពុកជនរងគ្រោះម្នាក់ ជាជនជាតិម៉ាឡេស៊ី បាននិយាយថា លោកសង្ឃឹមថា បំណែកនេះ ជាបំណែករបស់យន្តហោះ MH370 ទៅចុះ ដើម្បីឲ្យលោកអស់ចិត្ត ឈប់គិតសង្ឃឹម ថាកូនគាត់នៅរស់តទៅទៀត។ ដូចគ្នាដែរ បុរសជនជាតិបារាំង ដែលមានប្រពន្ធ ជាជនរងគ្រោះដែរ បាននិយាយថា លោកចង់ដឹងឲ្យពិតប្រាកដ ដើម្បីធ្វើអហោសិកម្ម និងកាត់ចិត្តឈប់គិតតទៅទៀត។
ភាគច្រើននៃក្រុមគ្រួសារជនរងគ្រោះ នាំគ្នាសរសេរថា អ្វីដែលគេចង់បាន គឺភាពច្បាស់ប្រាដក១០០% មិនមែន ច្បាស់ ៩០%ដូចដែលក្រុមអ្នករុករក ធ្លាប់បានប្រកាសកន្លងមកនោះទេ។ ប៉ុន្តែទោះបីជាយ៉ាងណា ក្រុមគ្រួសារជនរងគ្រោះនៅចិន បានអំពាវនាវ ឲ្យរក្សាការស្ងៀមស្ងាត់ រងចាំលទ្ធផលនៃការស៊ើបអង្កេត។
បើតាមយោបល់របស់អ្នកជំនាញភាគច្រើន យន្តហោះប្រហែលជាមានបញ្ហា ចុះថយឧស្ម័នអុកស៊ីសែន ភ្លាមៗជាគំហុក ធ្វើឲ្យមនុស្សទាំងអស់នៅក្នុងយន្តហោះ ទាំងអ្នកដំណើរ ទាំងអ្នកបើកបរ បាត់បង់ស្មារតី ទាំងអស់គ្នា ហើយយន្តហោះ ចេះតែបន្តហោះ ដោយការបញ្ជាស្វ័យប្រវត្តិ រហូតទាល់តែអស់សាំង ហើយធ្លាក់ក្នុងសមុទ្រ តែម្តង។ តែនេះគ្រាន់តែជាការប៉ាន់ស្មាន តែប៉ុណ្ណោះ ការពិត១០០% គេមិនអាចដឹងបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ