Wikileaks ចេញឯកសារសម្ងាត់ បង្ហាញថាអាមេរិក លួចស៊ើបការណ៍លើជប៉ុន
គេហទំព័រ Wikileaks ដែលមានបណ្តាញផ្សព្វផ្សាយឯកសារសម្ងាត់ របស់សហរដ្ឋអាមេរិក ទើបតែបានចេញផ្សាយ ឯកសារថ្មីបន្ថែមទៀត ដែលបង្ហាញថា កន្លងមក សហរដ្ឋអាមេរិក បានលួចស៊ើបការណ៍សម្ងាត់ ទៅលើប្រទេសជប៉ុន ស្ទើរតែគ្រប់វិស័យ។ ព័ត៌មានដ៏អាស្រូវនេះ នឹងធ្វើឲ្យសហរដ្ឋអាមេរិក រឹតតែអាម៉ាសមុខ នៅលើឆាកអន្តរជាតិ បន្ទាប់ពីត្រូវបានគេដឹង ជាបន្តបន្តាប់ ថារដ្ឋាភិបាលអាមេរិក បានលបស្តាប់ទូរស័ព្ទ គេឯង សឹងតែគ្រប់គ្នា ដោយឥតរើសមុខ មិនថាប្រទេសនោះ ជាដៃគូរសម្ព័ន្ធមិត្ត រឺក៏សត្រូវ របស់ខ្លួននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៦
អាមេរិកលបស៊ើបការណ៍លើជប៉ុន តាំងពីឆ្នាំ២០០៦៖
អាមេរិកលួចស៊ើប សឹងតែគ្រប់មុខ គ្រប់វិស័យទាំងអស់ របស់ជប៉ុន ទាំងកិច្ចការផ្ទៃក្នុង ទាំងកិច្ចការអន្តរជាតិ ឲ្យតែមានប្រយោជន៍ ដល់រដ្ឋាភិបាលអាមេរិក។ បើយោងតាមការផ្សាយរបស់ គេហទំព័រ Wikileaks បានឲ្យដឹងថា ភ្នាក់ងារសន្តិសុខជាតិអាមេរិក ដែលជាភ្នាក់ងារស៊ើបការណ៍សម្ងាត់ បានធ្វើតារាងបញ្ជីរឈ្មោះ គោលដៅចំនួន៣៥ ដែលអាមេរិកធ្វើការស៊ើបការណ៍ ទៅលើជប៉ុន។
ក្នុងនោះរួមមានទាំង មន្ត្រីរដ្ឋាភិបាលធំៗរបស់ជប៉ុន ព្រមទាំងថ្នាក់ដឹកនាំក្រុមហ៊ុន និងសហគ្រាសធំៗ របស់ជប៉ុនផងដែរ ដូចជាក្រុមហ៊ុន Mitsubishi ក្រុមហ៊ុន Mizuyi និងធនាគារជាតិជប៉ុនជាដើម។ លោក Haruhiko Kuroda អគ្គទេសាភិបាលរបស់ធនាគារជាតិជប៉ុន ក៏មានឈ្មោះក្នុងនោះដែរ។ សូម្បីតែបុគ្គលិក របស់ធនាគាជាតិជប៉ុន ក៏ត្រូវគេលបស្តាប់ទូរស័ព្ទលើតុ នៅផ្ទះដែរ។
ក្នុងចំណោម មន្ត្រីរដ្ឋាភិបាលជប៉ុន គេមិនបានបញ្ជាក់ឈ្មោះ លោកនាយករដ្ឋមន្រ្តីជប៉ុន ស៊ីនហ្សូ អាបេ ដោយផ្ទាល់ទេ ប៉ុន្តែមានឈ្មោះរដ្ឋមន្ត្រីសំខាន់ៗ ដូចជា លោក Yoichi Miyazawa រដ្ឋមន្ត្រីក្រសួងពាណិជ្ជកម្មជប៉ុន ដែលត្រូវគេលបស្តាប់ទូរស័ព្ទ។ បើតាមគេហទំព័ររបស់ Wikileaksបានបញ្ជាក់ថា ការលបស្តាប់ការសន្ទនា តាមទូរស័ព្ទ រឺក៏ការឆ្លងឆ្លើយឯកសាររបស់ជប៉ុននេះ គឺអាមេរិក បានធ្វើ តាំងពីឆ្នាំ២០០៦ ម្លេះ។
ក្នុងកិច្ចការផ្ទៃក្នុងជប៉ុន ទាក់ទិនទៅនឹងការសម្រេចគម្រោងធំៗផ្សេងៗ ដូចជាវិសយ័ពាណិជ្ជកម្ម វិស័យកសិកម្ម ការនាំចេញនាំចូល និងជាពិសេសគម្រោងអភិវឌ្ឍន៍វិស័យបច្ចេកវិទ្យាទំនើបរបស់ជប៉ុន គឺត្រូវបានអាមេរិក លបស្តាប់ដឹងទាំងអស់។ ក្រៅពីកិច្ចការផ្ទៃក្នុងទាំងអស់នេះ Wikileaks បានបង្ហាញទៀតថា ភ្នាក់ងារ NSA អាមេរិក បានទាំងលួចយកការឆ្លងឆ្លើយឯកសារសំខាន់ៗ រវាងជប៉ុននិង អង្គការអន្តរជាតិធំៗមួយចំនួន ដូចជាអង្គការពាណិជ្ជកម្មពិភពលោក រឺភ្នាក់ងារបរមាណូអន្តរជាតិជាដើម។ ការសន្ទនាតាមទូរស័ព្ទ ការពិភាក្សាគ្នាពេលប្រជុំ រួមទាំងឯកសារយោងសំខាន់ៗ ត្រូវបានអាមេរិកប្រមូលទុក និងយកទៅធ្វើការវិភាគទាំងអស់។
ជប៉ុននៅក្រោមឃ្លៀកអាមេរិក៖
ជាការពិតណាស់ ការដែល អាមេរិក ធ្វើបែបនេះ ហេតុផលដ៏ចំបងបំផុត គឺកេងចំណេញ ទាំងផ្នែកនយោបាយការបរទេស និងលើវិស័យសេដ្ឋកិច្ច។ ដោយបានលបស្តាប់ដឹងពីគោលជំហរ រឺការសម្រេចផ្សេងៗរបស់ជប៉ុន អាមេរិកឈាន មួយជំហានលើសជប៉ុនជានិច្ច ពោលគឺ មានប្រៀបលើជប៉ុន។ មានប្រៀបយ៉ាងម៉េច គឺងាយយល់បំផុត ព្រោះថាពេលចូលតុចរចាគ្នា ជាមួយជប៉ុន អាមេរិកដឹងទាំងអស់រលីងទៅហើយថា ជប៉ុនគិតអី ចង់បានអី មានគោលជំហរបៀបណា។ ដូច្នេះ វាជាការងាយស្រួលណាស់ សម្រាប់អាមេរិក ក្នុងការដាក់យុទ្ធសាស្ត្រសេដ្ឋកិច្ច និងការទូតជាមួយជប៉ុន។ បើនិយាយភាសាសាមញ្ញគឺថា ជប៉ុន នៅក្រោមឃ្លៀកអាមេរិករហូត។
ជាឧទារហរណ៍ ដូចជាក្នុងវិស័យនាំចូលផលិតផលកសិកម្ម ទៅក្នុងប្រទេសជប៉ុន។ បើយោងតាមឯកសាររបស់គេហទំព័រ Wikileaks ដែលទើបតែចុះផ្សាយនេះ គឺអាមេរិកមានព័ត៌មាន យ៉ាងល្អិតល្អន់ ជុំវិញចំនួននាំចូល ក៏ដូចជាប្រភេទផលិតផលទាំងអស់។ ផលិតផលកសិកម្ម ជប៉ុននាំចូលពីគេច្រើនណាស់ សឹងតែ៦០% នៃតម្រូវការសរុប។ ដូច្នេះ ព័ត៌មានទាំងនេះ វានឹងផ្តល់ឱកាសឲ្យអាមេរិក ប្រគួតប្រជែង ក្នុងទីផ្សារជប៉ុន បានយ៉ាងងាយស្រួល ជាទីបំផុត។
យើងមានអ្វីពិសេស និងសំខាន់ ទើបបានគេ ចង់ដឹងចង់ឮពីយើង៖
រឿងអាមេរិក ស៊ើបការណ៍ លបស្តាប់ជប៉ុននេះ យើងអាចថា អាមេរិកធ្វើដោយសារហេតុផលសេដ្ឋកិច្ចក៏បានដែរ។ ក៏ប៉ុន្តែបើយើងពិនិត្យមួយជ្រុងទៀត វាអាចមានន័យថា អាមេរិកចាប់អារម្មណ៍លើសេដ្ឋកិច្ចជប៉ុន។ ធម្មតាទេ គេលបស្តាប់តាមដានយើង វាមានន័យថាយើង មានអ្វីមួយពិសេស មានចំណុចដែលគួរឲ្យទាក់ទាញ។ ដូច្នេះវាជាមោទនភាពមួយដែរ របស់ជប៉ុន។
វិស័យសេដ្ឋកិច្ចរបស់ជប៉ុន ដែលមានសរសរទ្រូងសំខាន់ ខាងផ្នែកបច្ចេកវិទ្យាទំនើប ជាការស្ញប់ស្ញែង របស់គេសឹងតែគ្រប់គ្នា មិនថាតែអាមេរិកទេ។ នរណាក៏ឆ្ងល់ចង់ដឹង ចង់យល់ ថាជប៉ុនធ្វើយ៉ាងម៉េច បានជាពូកែខ្លាំងម្លេះ។ ក៏ប៉ុន្តែ និយាយវិលចុះវិលឡើង វានៅតែជុំវិញ បញ្ហាសេដ្ឋកិច្ចដដែល ព្រោះអាមេរិកស្ញប់ស្ញែង សេដ្ឋកិច្ចជប៉ុន ចង់លួចយកបទពិសោធន៍ជប៉ុន ដើម្បីទៅអភិវឌ្ឍន៍ខ្លួន មកប្រកួតប្រជែងជាមួយ ជប៉ុនវិញដដែល។
លួចស៊ើបការណ៍សម្ងាត់គ្នាទៅវិញទៅមក វាជារឿងធម្មតាទៅហើយ៖
បើនិយាយទៅ ការបែកធ្លាយឯកសារសម្ងាត់នេះ ប្រហែលជាមិនជះឥទ្ធិពលធំដុំ ទៅលើទំនាក់ទំនងការទូតប្រទេសទាំងពីរនេះទេ។ ដូចកន្លងមកយើងឃើញហើយ អំពីរឿងអាស្រូវ ដែលអាមេរិក លបស្តាប់ទូរស័ព្ទរបស់ លោកស្រីអធិការបតីអាល្លឺម៉ង់ និងប្រធានាធិបតីបារាំង ជាច្រើនរូបទៀត។ គ្រាន់តែថា ជាគោលការណ៍ ថ្នាក់ដឹកនាំប្រទេសដែលរងគ្រោះ ដោយទង្វើមិនសមរម្យរបស់អាមេរិក ត្រូវតែមានប្រតិកម្ម ហើយសុំការពន្យល់បកស្រាយ ពីររដ្ឋាភិបាលអាមេរិក ថាហេតុអ្វី ធ្វើរឿងអញ្ចឹង។
ប៉ុន្តែបើយើងនិយាយទៅ ក្នុងសម័យនេះទៅហើយ ហើយឆ្លងកាត់ការបែកធ្លាយឯកសារសម្ងាត់ តាមរយៈ Wikileaks រឺក៏ អេដវ៉ា ស្នូឌែន ជាច្រើនលើកកន្លងមកនេះ វាទៅជារឿងធម្មតាទៅហើយដែល ម្នាក់ៗ លួចស្តាប់គ្នា លួចស៊ើបការណ៍គ្នា ទៅវិញទៅមក។ ជប៉ុនប្រហែលជាដឹងខ្លួនមុនយូរហើយ ថា បើអាមេរិកលបស្តាប់បារាំង និងអាល្លឺម៉ង់ អញ្ចឹងមានរឿងអី ដែលអាមេរិក មិនលបស្តាប់ខ្លួនដែរ? ជប៉ុនខ្លួនឯង ក៏មានបណ្តាញស៊ើបការណ៍ ស្រង់ទិន្ន័យសេដ្ឋកិច្ច ពីគេពីឯងដែរ។
រដ្ឋាភិបាលជប៉ុន នឹងត្រូវព្រនូង របស់ក្រុមអ្នកប្រឆាំង៖
ការបែកធ្លាយព័ត៌មាននេះ អាចវិលមកត្បកក្បាលរដ្ឋាភិបាលជប៉ុនវិញក៏ថាបាន។ មូលហេតុអ្វី គឺក្នុងកាលៈទេសៈនេះ រដ្ឋាភិបាលរបស់លោកស៊ិនហ្សូ អាបេ កំពុងតែព្យាយាមបញ្ចុះបញ្ចូលសភាជប៉ុន ឲ្យបោះឆ្នោតគាំទ្រ ការបង្កើតកម្លាំងទ័ព ការពារជាតិជប៉ុន ព្រមទាំងលទ្ធភាពធ្វើអន្តរាគមន៍យោធា នៅបរទេស ដើម្បីជួយសម្ព័ន្ធមិត្តខ្លួន។ សម្ព័ន្ធមិត្ត ជាអ្នកណា ? គឺ អាមេរិកនឹងឯង។ ឥឡូវសម្ព័ន្ធមិត្តនេះឯង ដែលលបស្តាប់ លួចស៊ើបការណ៍សម្ងាត់ លើជប៉ុន។
គម្រោងច្បាប់នេះ មានអ្នកប្រឆាំងច្រើនណាស់ នៅជប៉ុន។ ដូច្នេះក្រុមអ្នកប្រឆាំងនឹងរដ្ឋាភិបាលលោកស៊ិនហ្សូ អាបេ នឹងយកបញ្ហានេះ ទៅដាក់បន្ទុកបន្ថែមទៀត ហើយចោទរដ្ឋាភិបាលជប៉ុនថា ចង់យកទាហានជប៉ុនទៅស្លាប់ដើម្បីជួយគេ តែទីបំផុត គេសងគុណវិញ ដោយការលួចស៊ើបការណ៍សំងាត់។ មួយវិញទៀត ការចរចាលើកិច្ចព្រមព្រៀងពាណិជ្ជកម្ម តំបន់ប៉ាស៊ិហ្វិកដែលទើបតែជួបបរាជ័យនេះ ក៏គេអាចយកវាជាហេតុផលដែរ ដើម្បីរិះគន់ ពីភាពទន់ជ្រាយ និងការចាញ់ប្រៀបអាមេរិក របស់រដ្ឋាភិបាលជប៉ុន។
ដូច្នេះហើយ បានជាមកត្រឹមពេលនេះ រដ្ឋាភិបាលជប៉ុន នៅស្ងៀម មិនទាន់ចេញប្រតិកម្ម អ្វីទាំងអស់ រងចាំឲ្យរលកស្ងប់បន្តិច ព្រោះត្រូវថ្លឹងថ្លែង ណាមួយត្រូវថែទំនាក់ទំនងជាមួយអាមេរិក ណាមួយត្រូវបង្ហាញប្រាប់ប្រជាជនជប៉ុន ក៏ដូចជាក្រុមប្រឆាំង ថា ខ្លួនមិនមែននៅក្រោមឃ្លៀកអាមេរិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ