អាជ្ញាធរថៃចាប់បានជនសង្ស័យដាក់បំផ្ទុះគ្រាប់បែក
នគរបាលថៃ ទើបបានផ្តល់ដំណឹង នៅរសៀលថ្ងៃសៅរ៍ ទី ២៩ សីហានេះថា គេបានធ្វើការឃាត់ខ្លួន ជនសង្ស័យម្នាក់ ដែលមានភិនភាគរូបរាង្គ ដូចជនសង្ស័យ ដែលត្រូវបានម៉ាស៊ីនថតសុវត្ថិភាព ថតរូបបាន នៅក្នុងហេតុការណ៍ ភេរវកម្មកណ្តាលក្រុងបាងកក កាលពី ថ្ងៃទី១៧សីហាកន្លងទៅ។ ក្រៅពីរូបរាង្គដូចគ្នា អាជ្ញាធរ ក៏បានរឹបអូសបានវត្ថុតាងមួយចំនួន ដែលអាចបញ្ជាក់បានថា ជននេះអាចជាជនដៃដល់ ដាក់គ្រាប់បែកបំផ្ទុះ។
ចុះផ្សាយនៅថ្ងៃ៖
ស្តាប់ - ០២:៣៩
លោក ចាក់ទីព ឆៃជិនដា អគ្គបញ្ជាការរង នគរបាលជាតិថៃ បានប្រកាសនៅថ្ងៃសៅរ៍ទី ២៩សីហានេះថា នគរបាលថៃ បានធ្វើការឃាត់ខ្លួនបុរសម្នាក់ ដែលមានរូបរាង្គភិនភាគ ស្រដៀងទាំងស្រុង ទៅនឹងជនដៃដល់ ដែលគេបានថតរូបបាន នៅកន្លែងកើតហេតុ។ ទោះបីជានៅក្នុងពេលនេះ គេនៅមិនទាន់ហ៊ានសន្និដ្ឋាន បាន ១០០% ក៏លោកមេប៉ូលីសថៃរូបនេះ បានអះអាងថា មានភស្តុតាងជាច្រើន ដែលបានដាក់បន្ទុក ទៅលើជនសង្ស័យ ដែលគេទើបចាប់ខ្លួនបាននេះ។ នៅក្នុងបន្ទប់ស្នាក់នៅរបស់ជននេះ ដែលមានទីតាំងនៅខាងជើងក្រុងបាងកក នគរបាលថៃបានរកឃើញ លិខិតឆ្លងដែន ជាង១០ច្បាប់ ព្រមទាំងបានរកឃើញឧបករណ៍ ដើម្បីផលិតគ្រាប់បែកច្នៃទៀតផង។
ទោះបីជាអ្នកនាំពាក្យនគរបាលថៃ មិនបានផ្តល់ព័ត៌មានលំអិត ស្តីពីអត្តសញ្ញាណរបស់ជនសង្ស័យ ដែលគេឃាត់ខ្លួន ប៉ុន្តែទូរទស្សន៍ថៃ បានចុះផ្សាយរូបភាពជាច្រើន ដូចជារូបភាពលិខិតឆ្លងដែនតួកគី ដែលគេអះអាងថា បានរកឃើញ នៅបន្ទប់ស្នាក់នៅ របស់ជនសង្ស័យ។ ហើយបើតាមលិខិតឆ្លងដែននេះ ជនសង្ស័យ កើតនៅឆ្នាំ១៩៨៧ ពោលគឺអាយុ២៨ឆ្នាំ ក្នុងវ័យស្របាលនឹង ជនសង្ស័យដាក់គ្រាប់បែក ដែលគេថតរូបបាន។ ទូរទស្សន៍ថៃ ក៏បានផ្សាយផងដែរ នូវរូបភាព ជនសង្ស័យ ដែលត្រូវគេឃាត់ខ្លួន ដោយដៃជាប់ខ្នោះ មានពុកមាត់ស្រមូម ក្បាលត្រងោល ទំនងជាជនបរទេស មានអាយុខ្ទង់ជាង២០ឆ្នាំ។
នេះ ជាជនសង្ស័យទីមួយហើយ ដែលតំរួតថៃ បានចាប់ឃាត់ខ្លួន បន្ទាប់ពីមានហេតុការណ៍ភេរវកម្មបំផ្ទុះគ្រាប់បែក កាលពី ១២ថ្ងៃមុន នៅកណ្តាលក្រុងបាងកក ដែលបណ្តាលឲ្យស្លាប់មនុស្ស២០នាក់ និងរបួសជាច្រើននាក់ផ្សេងទៀត។ នគរបាលថៃ បានដាក់ការសង្ស័យ ថានេះជាស្នាដៃរបស់ក្រុមជនជាតិអ៊ុយហ្គួរ ដែលមានបំណងសងសឹក ទៅលើរដ្ឋាភិបាលថៃ ដែលបានបញ្ជូនក្រុមគ្នាគេ ប្រគល់ទៅឲ្យរដ្ឋាភិបាលចិនវិញ។ កាលពីថ្ងៃសុក្រ ទី២៨សីហា នគរបាលស៊ើបអង្កេតថៃ បានធ្វើការសាកសួរចម្លើយ ជនជាតិអ៊ុយហ្គួរ៣នាក់ ប៉ុន្តែមិនបានបញ្ចេញឲ្យដឹង នូវការសន្និដ្ឋានអ្វីមួយ ជាក់លាក់នោះទេ។
សូមបញ្ជាក់ថា មានជនជាតិអ៊ុយហ្គួរ ចំនួនប្រមាណជា ៣៥០នាក់ ដែលបានរត់គេច ពីការធ្វើទុក្ខបុកម្នេញរបស់អាជ្ញាធរចិន ខេត្តស៊ិនជាំង បានចូលមករស់នៅ ដោយខុសច្បាប់ ក្នុងប្រទេសថៃ។ កាលពីខែកក្កដា មុននេះ អាជ្ញាធរថៃ បានសម្រេចបញ្ជូន ជនជាតិអ៊ុយហ្គួរ ១០៩នាក់ សុទ្ធសឹងជាមនុស្សប្រុស ឲ្យត្រឡប់ទៅចិនវិញ។ ចំណែកមនុស្សស្រី និងកូនក្មេង ត្រូវបានអាជ្ញាធរថៃ អនុញ្ញាតិឲ្យធ្វើដំណើរទៅប្រទេសតួកគី បើសិនជាពួកគេ មានបំណងចង់ទៅ។
ការសម្រេច ដោយអយុត្តិធម៍ របស់អាជ្ញាធរថៃ ត្រូវបានមតិសាធារណៈ រិះគន់ជាខ្លាំង ដោយសារតែវាបានបំបែកក្រុមគ្រួសារ ជនជាតិអ៊ុយហ្គួរ ប្តីព្រាត់ពីប្រពន្ធ ឪពុកព្រាត់ពីកូន។ ក្រោយដំណឹងនេះភ្លាម បាតុកម្មបានផ្ទុះឡើងនៅប្រទេសតួកគី ដោយក្រុមបាតុករ គាំទ្រជនជាតិអ៊ុយហ្គួរ បានចូលទៅដុតបំផ្លាញស្ថានទូតថៃ ប្រចាំនៅតួកគី។ មួយវិញទៀត ដោយសារតែមានជនរងគ្រោះ ជាជនជាតិចិន ក្នុងហេតុការណ៍ផ្ទុះគ្រាប់បែក ទើបនគរបាលថៃ បានកំណត់មុខសញ្ញាថា ភេរវកម្មនេះ ប្រាកដជាស្នាដៃរបស់បក្សពួក សហគមន៍ជនជាតិអ៊ុយហ្គួរ។ យ៉ាងណាមិញ អាជ្ញាធរថៃ ក៏បានរិតបន្តឹង ចរាចរណ៍ចេញចូល របស់ក្រុមអ្នកទេសចរ មកពីតួកគីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ