ម៉ាឡេស៊ី ធ្វើបាតុកម្មទ្រង់ទ្រាយធំពីរថ្ងៃជាប់គ្នាបណ្តេញនាយករដ្ឋមន្ត្រីឱ្យចុះចេញពីតំណែង
ទោះបីជាគ្មានការអនុញ្ញាតពីប៉ូលិស ក៏បាតុករម៉ាឡេស៊ីអាវលឿនជាច្រើនពាន់នាក់ បានជំនះនាំគ្នាប្រមូលធ្វើបាតុកម្មតាំងពីថ្ងៃសៅរ៍ម្សិលមិញមក និងបន្តធ្វើទៀតនៅថ្ងៃអាទិត្យនេះ នៅក្រុងកូឡាឡាំពួរ ស្រែកទាមទារឱ្យនាយករដ្ឋមន្ត្រី លោក ណាជីព រ៉ាហ្សាក់ ជាប់សង្ស័យពុករលួយ ចុះចេញពីតំណែង និងទាមទារឱ្យមានការធ្វើកំណែទម្រង់ស៊ីជម្រៅ។ ជាបាតុកម្មទ្រង់ទ្រាយធំមិនធ្លាប់មានឡើងនៅឆ្នាំ២០១៥នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៣
ប្រមូលផ្តុំគ្នាជាច្រើនពាន់នាក់ នៅក្រុងកូឡាឡាំពួរ ម្សិលមិញ និងថ្ងៃនេះ និងជាក្រុមតូចៗ នៅតាមខេត្តក្រុងផ្សេងៗទៀត បាតុករអាវយឺតពណ៌លឿង ជាចលនាសង្គមស៊ីវិលBersish “ស្អាតស្អំ” សម្ព័ន្ធមិត្តរបស់ក្រុមអង្គការក្រៅរដ្ឋាភិបាល ជាអ្នកកំណែទម្រង់និយម និងជាសកម្មភាពសិទ្ធិមនុស្ស។
ដោយភ័យខ្លាចគ្រប់គ្រងមិនបានដូចកាលឆ្នាំ២០១២ ប៉ូលិសមិនបានអនុញ្ញាតឱ្យមានការប្រមូលផ្តុំគ្នាទេនៅថ្ងៃនេះ តែបាតុកម្មនៅតែអាចប្រព្រឹត្តទៅបាន ដោយស្ងប់ស្ងាត់រហូតដល់ល្ងាចមិញ ទើបគេឃើញមានប៉ះទង្គិចបន្តិចបន្តួច រវាងប៉ូលិស និងបាតុករ ដែលចង់បោះទីតាំង ដេកយប់នៅទីលានឯករាជ្យកណ្តាលក្រុង។
បាតុកម្មផ្តើមមានពណ៌សម្បុរនយោបាយ
ក្រុមបាតុករដែលអាចប្រមូលគ្នាបានច្រើន មិនធ្លាប់មានកម្លាំងបាតុកម្មណាធំដូច សម្រាប់ឆ្នាំ២០១៥ បានទទួលការគាំទ្រជាលើកទីមួយ នៅថ្ងៃសៅរ៍ម្សិលមិញ ពីសំណាក់លោក មហាធា មហាម៉ាត់ ដែលធ្លាប់ជានាយករដ្ឋមន្ត្រីម៉ាឡេស៊ី ពីឆ្នាំ ១៩៨១ ដល់ឆ្នាំ ២០០៣ និងធ្លាប់ជាអ្នកការពារលោក នាយករដ្ឋមន្ត្រីបច្ចុប្បន្ន ណាជីព រ៉ាហ្សាក់ មុននឹងក្លាយទៅជាគូប្រជែងវិញ។
ដូច្នេះហើយបានជាកម្លាំងបាតុកម្មថ្ងៃនេះ ហាក់ដូចជាមានសន្ទុះចិត្តខ្លាំងជាពិសេស នាំគ្នាស្រែកជ័យឃោស ច្រៀង សូត្រធម៌ សម្តែងការមិនពេញចិត្តចំពោះរដ្ឋាភិបាល ទាមទារឱ្យលោកនាយករដ្ឋមន្ត្រីណាជីពរ៉ាហ្សាក់ ចាកចេញពីតំណែង ព្រោះមានពាក់ព័ន្ធនឹងរឿងអាស្រូវ អំពើពុករលួយ ផង និង ចោទប្រកាន់លោកនាយករដ្ឋមន្ត្រី ថាមានចំណាត់ការមិនល្អ លើផ្នែកសេដ្ឋកិច្ច និងបានធ្វើកំណែទម្រង់ច្បាប់បោះឆ្នោតដើម្បីសម្រួលឱ្យគណបក្សរបស់ខ្លួន ដែលជាអ្នកកាន់អំណាចបច្ចុប្បន្ន ឱ្យងាយឈ្នះឆ្នោតទៀតផង។ គណបក្សនេះបានដឹកនាំប្រទេស តាំងពីឆ្នាំ១៩៥៧ ឆ្នាំម៉ាឡេស៊ីបានឯករាជ្យ មកទល់ពេលសព្វថ្ងៃ។
រឿងអាស្រូវពុករលួយហិរញ្ញវត្ថុ និងទិដ្ឋភាពសេដ្ឋកិច្ចអាប់អួរ
រឿងអាស្រូវពុករលួយ ខ្នាតធំ សឹងថាមិនធ្លាប់មាននៅតំបន់អាស៊ីអាគ្នេយ៍ នេះបានផ្ទុះឡើងតាំងពីខែកក្កដាមែន ក្រោយពីកាសែតWall Street Journal របស់អាមេរិកបានបង្ហើបឱ្យដឹងថាមានលុយប្រមាណ៧០០លានដុល្លារ គ្មានប្រភពហូរចូលទៅក្នុងគណនីរបស់ក្រុមហ៊ុនរដ្ឋ 1Malaysia Development Berhard មុននឹងផ្ទេរបន្តទៅក្នុងគណនីផ្ទាល់ខ្លួនរបស់លោកនាយករដ្ឋមន្ត្រី។ ក្រុមរដ្ឋមន្ត្រីរបស់រដ្ឋាភិបាលលោក ណាជីព រ៉ាហ្សាក់ បានអះអាងថា ជាប្រាក់ជំនួយនយោបាយបានមកពីតំបន់ដើមបូព៌ា។
ក្រុមហ៊ុនរដ្ឋដែលបង្កើតឡើងកាលពីឆ្នាំ២០០៩ ដោយលោកនាយករដ្ឋមន្ត្រីណាជីពផ្ទាល់ ពេលឡើងកាន់តំណែងភ្លាម កំពុងប្រឈមនឹងបំណុលវន្តក ដល់ទៅជាង១១០០លានដុល្លារ ហើយការអង្កេតឯករាជ្យរបស់ភ្នាក់ងារម៉ាឡេស៊ីបានបញ្ជាក់ថាមានការបង្វែរលុយចូលក្នុងគណនីដែលទំនងជារបស់បុគ្គលនាយករដ្ឋមន្ត្រីផ្ទាល់ទៀត ហេតុដូច្នេះហើយបានជាមានការមន្ទិលសង្ស័យកាន់ច្រើនឡើងៗ ដោយចៀសមិនរួច។ តាំងពីដើមខែសីហា ប្រាក់Ringgit របស់ម៉ាឡេស៊ី បានធ្លាក់ថ្លៃមិនធ្លាប់មាន ក្នុងរយៈពេល១៧ឆ្នាំចុងក្រោយនេះ ដោយហេតុតែការនាំប្រេងធ្លាក់ចុះ និងការមិនទុកចិត្តលើរដ្ឋាភិបាល ក្រោយរឿងអាស្រូវហិរញ្ញវត្ថុ។ ឥលូវថែមវិបត្តិនៅចិនមួយទៀត ទស្សនវិស័យសេដ្ឋកិច្ចម៉ាឡេស៊ី ត្រូវរងឥទ្ធិពលមិនល្អនេះ ឱ្យមើលឃើញតែភាពស្រអាប់ និង ហាក់ដូចជាជួយបន្ថែមនិងជំរុញឱ្យប្រជាពលរដ្ឋដែលមានក្តីព្រួយបារម្ភស្រាប់ កាន់តែងាយផ្ទុះជាកំហឹងឡើង។
លោកណាជីព រ៉ាហ្សាក់ រឹងម៉ាំនិងអំណាចពេញដៃ
ថ្វីបើពេលនេះ ចលនាបានទទួលការគាំទ្រ ដោយចំហ និងច្បាស់លាស់ពីលោកមហាធា មហាម៉ាត់ អតីតនាយករដ្ឋមន្ត្រី ជាអ្នកនយោបាយមានឈ្មោះល្បី និងគោរពរាប់អានពីសំណាក់អ្នកនយោបាយម៉ាឡេស៊ីទូទៅ ដែលអាចចាត់ទុករង្វាន់លើកទឹកចិត្តសន្ទុះប្រឆាំងនឹងរដ្ឋាភិបាលក៏ពិតមែន តែ ចលនាបាតុកម្មនេះ នៅខ្វះភាពជាអ្នកដឹកនាំ ជាមេកើយ ប្រកបដោយទំនុកចិត្តនៅឡើយ។ ចលនាអាវលឿង នេះ ប្រសូតចេញពីក្រុមពលរដ្ឋជនជាតិភាគតិច ចិន និងសហគមន៍ឥណ្ឌា នៅក្នុងសង្គមមួយដែលពលរដ្ឋភាគច្រើនជាអ្នកកាន់សាសនាអ៊ីស្លាម។ ហើយម្យ៉ាងទៀត ក្នុងបរិបទដែល បក្សប្រឆាំង នៅម៉ាឡេស៊ី បែងខ្ញែកគ្នាខ្លាំងនិងមិនសូវស៊ីចង្វាក់គ្នា ចលនាសង្គមស៊ីវិលស្អាតស្អំ មិនបានទទួលការគាំទ្រ ឬភ្ជាប់ខ្លួនទៅនឹងបក្សនយោបាយណាមួយនៅក្នុងប្រទេសឱ្យបានច្បាស់លាស់សោះ។
លើសពីនេះទៅទៀត លោក ណាជីព រ៉ាហ្សាក់ ជានាយករដ្ឋមន្ត្រី មានអំណាចគ្រប់គ្រងស្ថាប័នសំខាន់ៗពេញដៃ ដូចជាផ្នែកប៉ូលិស តុលាការ និងសភា។ កាលពីចុងកក្កដា ក្រោយផ្ទុះធ្លាយរឿងអាស្រូវពុករលួយមានជាប់ពាក់ព័ន្ធនឹងលោកភ្លាម លោកណាជីពបានដកឧបនាយករដ្ឋមន្ត្រីរបស់លោកចោល ដែលជជីកចង់ដឹងតម្លាភាពក្នុងក្រុមហ៊ុនរដ្ឋ1Malaysia Development Berhad ហើយរដ្ឋអាជ្ញាទទួលបន្ទុកស៊ើបអង្កេតសំណុំរឿងដ៏រសើបនេះ ក៏ទំនងជាត្រូវបានដកចេញពីតំណែងបាត់ ទៅហើយដែរ។ សារព័ត៌មានណាហ៊ានរិះគន់ ឬសរសេរបើកកកាយ នឹងត្រូវពិន័យ ជាក់ស្តែង កាសែតក្នុងស្រុកបីត្រូវបានអាជ្ញាធរម៉ាឡេស៊ីបិទទ្វាររយៈពេលបីខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ