អន្តោប្រវេសន៍អឺរ៉ុប ៖ អូស្ត្រាលីមិនប្តូរកូតា តែនឹងទទួលជនភៀសខ្លួនស៊ីរីច្រើនជាងមុន
នាយករដ្ឋមន្ត្រីអូស្ត្រាលី លោក ថូនី អ៊ែបត បានប្រកាសនៅថ្ងៃអាទិត្យនេះ ថាអូស្ត្រាលីនឹងទទួលយកជនភៀសខ្លួនស៊ីរី ដែលកំពុងសម្រុករត់ចូលអឺរ៉ុបយ៉ាងគំហុក ក្នុងបរិមាណច្រើនជាងមុន។ ប៉ុន្តែបើទោះបីជាគណបក្សនយោបាយនិងអ្នកបរិស្ថានអូស្ត្រាលីបានធ្វើសេចក្តីអំពាវនាវយ៉ាងណាក៏ដោយ ក៏អូស្រ្តាលីនឹងមិនប៉ះពាល់សើរើមើលកូតាអន្តោប្រវេសន៍ប្រចាំឆ្នាំរបស់ខ្លួន ដែលបានកំណត់រួចជាស្រេចហើយនោះទេ។
ចុះផ្សាយនៅថ្ងៃ៖
ស្តាប់ - ០២:១៦
អឺរ៉ុបកំពុងប្រឈមនឹងវិបត្តិអន្តោប្រវេសន៍យ៉ាងធ្ងន់ធ្ងរមិនធ្លាប់មាន គិតចាប់ពីសង្គ្រាមលោកលើកទីពីរមក ដោយជនភៀសខ្លួនអស់សង្ឃឹមទាំងឡាយភាគច្រើនជាជនជាតិស៊ីរី បានជំនះឧបសគ្គគ្រប់បែបយ៉ាងធ្វើយ៉ាងណាឱ្យតែបានឆ្លងដល់ត្រើយអឺរ៉ុប។
កាលពីថ្ងៃសុក្រទៀត ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបានអំពាវនាវឱ្យសហភាពអឺរ៉ុបបែងចែកគ្នាទទួលជនអន្តោប្រវេសន៍ម្នាក់ៗប្រមាណពីរសែននាក់។ ក្រៅអំពីភាពមិនដឹងមិនឮរបស់ប៉ូឡូញ នៅថ្ងៃនេះអូស្ត្រាលីដែលល្បីជាប្រទេសមាននយោបាយតឹងតែងខ្លាំងផ្នែកអន្តោប្រវេសន៍ បានបញ្ជាក់ជាថ្មីអំពីជំហររបស់ខ្លួន។ បើតាមលោកនាយករដ្ឋមន្ត្រី ការស្លាប់របស់កុមារស៊ីរីលើឆ្នេរផ្កាប់មុខ បានតឹ្រមតែពង្រឹងជំហរច្បាស់លាស់របស់អូស្ត្រាលី ! កូតាទទួលជនភៀសខ្លួននឹងស្ថិតនៅដដែល គ្មានការប្តូរផ្លាស់ឡើយ ពោលគឺ ១៣៧៥០នាក់ សម្រាប់កូតាឆ្នាំ២០១៥-២០១៦។
ប៉ុន្តែរដ្ឋាភិបាលអូស្ត្រាលី ត្រៀមខ្លួននឹងទទួលជនភៀសខ្លួនមកពីតំបន់មានវិបត្តិច្រើនជាងមុន និងក្នុងក្របខ័ណ្ឌកម្មវិធីមនុស្សធម៌ ព្រមទាំងត្រៀមខ្លួនបង្កើនជំនួយហិរញ្ញវត្ថុដល់អង្គការHCR។ នេះជាការគូសបញ្ជាក់បន្ថែមរបស់លោកនាយករដ្ឋមន្ត្រី ដោយបដិសេធមិនផ្តល់ជាតួលេខឡើយ។ កាលពីឆ្នាំទៅអូស្ត្រាលីបានទទួលជនភៀសខ្លួនអ៊ីរ៉ាក់និងស៊ីរី ប្រមាណ៤៥០០នាក់ ហើយដោយយោលទៅ លើទំហំនៃវិបត្តិបច្ចុប្បន្នអូស្ត្រាលីនឹងទទួលឱ្យច្រើនជាងមុន នៅឆ្នាំនេះ។
អូស្រា្តលីបានបង្កើនចំនួនទទួលជនភៀសខ្លួនបន្តិចម្តងៗ ១៦២៥០នាក់នៅ២០១៧ និង១៨៧៥០នៅឆ្នាំបន្ទាប់។ នយោបាយប្រយុទ្ធប្រឆាំងនឹងអន្តោប្រវេសន៍របស់អូស្ត្រាលីមានពីរច្រក ៖ ទីមួយ ទាហានជើងទឹក ចាំស្ទាក់ចាំទូកដឹកជនភៀសខ្លួន កណ្តាលផ្លូវរួចបញ្ជូនត្រលប់ទៅកន្លែងដើមវិញ(ភាគច្រើនមកតាមឥណ្ឌូណេស៊ី) និងទីពីរ ចំពោះជនអន្តោប្រវេសន៍ដែលឆ្លងបានដល់ទឹកដីអូស្ត្រាលីហើយ នឹងត្រូវបញ្ជូនទៅដាក់ក្នុងមន្ទីរឃុំឃាំងអន្តោប្រវេសន៍ តាមកោះតូចៗក្នុងមហាសមុទ្ទប៉ាស៊ីហ្វិក។ បើទោះបីជាបានដាក់ពាក្យសុំសិទ្ធិជ្រកកោន និងស្របច្បាប់ក្តី ក៏ជនភៀសខ្លួនទាំងអស់នោះគ្មានសិទ្ធិតាំងទីនៅអូស្រ្តាលីដែរ គឺមានលទ្ធភាពត្រលប់ទៅប្រទេសកំណើតវិញ ឬទៅជំរំឃុំឃាំង ឬទៅប្រទេសខ្មែរដែលអូស្ត្រាលីមានកិច្ចព្រមព្រៀងជាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ