អាហ្វហ្កានីស្ថាន ៖គ្រូពេទ្យគ្មានព្រំដែនរងការវាយប្រហារផ្លូវអាកាស
មន្ទីរពេទ្យរបស់អង្គការគ្រូពេទ្យគ្មានព្រំដែន នៅគូនឌូស្ស ដែលជាតំបន់យុទ្ធសាស្ត្រប្រចាំភាគខាងជើងអាហ្វហ្កានីស្ថាន បានរងការខូចខាតយ៉ាងដំណំ ពីការវាយប្រហារ នៅយប់មិញ ៖ សមាជិក៩នាក់របស់អង្គការបានស្លាប់ និងជាង៣០នាក់រងរបួសធ្ងន់។ ការវាយប្រហារ ទៅលើក្រុងដែលទាហានអាហ្វហ្កានីស្ថានទើបដណ្តើមបានមកវិញពីកណ្តាប់ដៃពួកតាលីបង់ ទំនងជាស្នាដៃរបស់កងទ័ពអាកាសអាមេរិក។ បើតាមអង្គការគ្រូពេទ្យគ្មានព្រំដែន ការវាយប្រហារមានរយៈពេល៣០នាទី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២១
ការវាយប្រហារលើមន្ទីរពេទ្យរបស់អង្គការគ្រូពេទ្យគ្មានព្រំដែននៅ យប់មិញ អាចចាត់ទុកថាជាកំហុសថ្មីមួយទៀតរបស់ក្រុមកងទ័ពសម្ព័ន្ធអាត្លង់ទិក ឬ អូតង់ ដែលកំពុងឈរជើងចាំជួយកងទ័ពជាតិអាហ្វហ្កានីស្ថាននៅគូនឌូស្សនេះ។ អ្នកនាំពាក្យរបស់អូតង់ម្នាក់ បានបញ្ជាក់នៅព្រឹកថ្ងៃសៅរ៍នេះ ថាទាហានអាមេរិកពិតជាបានធ្វើប្រតិបត្តិការវាយប្រហារផ្លូវអាកាសមែន នៅយប់មិញលើក្រុងគូនឌូស្ស ហើយការវាយប្រហារនេះអាចនឹងធ្វើឱ្យខូចខាតនិងប៉ះពាល់ដល់មន្ទីរពេទ្យ ជាតំបន់ជិតខាង ដោយអចេតនា។
ហើយបើគេជឿតាមបុគ្គលិកនៅនឹងកន្លែងកើតហេតុ ការវាយប្រហារនេះកាន់តែពិតជាស្នាដៃរបស់កងទ័ពអាមេរិកច្រើនជាង ព្រោះជាការទម្លាក់គ្រាប់បែកតាមយន្តហោះ ពួកតាលីបង់គ្មានសម្ភារៈទំនើបបែបនេះទេ។
បើនិយាយអំពីជនរងគ្រោះវិញ ពុំទាន់មានដំណឹងអ្វីទាក់ទងនឹងអត្តសញ្ញាណអ្នកស្លាប់ទេ ព្រោះអង្គការគ្រូពេទ្យគ្មានព្រំដែន គ្មានសេចក្តីថ្លែងការណ៍។ គេគ្រាន់តែដឹងថា អង្គការប្រើបុគ្គលិកជាពលរដ្ឋនៅក្នុងតំបន់ផ្ទាល់ ដូច្នេះជនរងគ្រោះភាគច្រើនទំនងជាជនជាតិអាហ្វហ្កានីស្ថានហើយ។
គ្រប់គ្រងដោយអង្គការគ្រូពេទ្យគ្មានព្រំដែន និងដែលស្ថិតមិនឆ្ងាយប៉ុន្មានពីទីប្រជុំជនក្រុងគូនឌូស្ស មន្ទីរពេទ្យនេះ ជាមជ្ឈមណ្ឌលសុខភាពធំតែមួយគត់នៅភាគខាងជើងអាហ្វហ្កានីស្ថាន ដែលអាចមានសមត្ថភាពព្យាបាលជំងឺនិងរបួសធ្ងន់ៗបាន និងមានបុគ្គលិកបរទេសនិងអាហ្វហ្កានីស្ថាន៨០នាក់កំពុងធ្វើការព្យាបាលអ្នកជំងឺជាង១០០នាក់ នៅយប់មិញ ក្នុងពេលមានការវាយប្រហារតាមផ្លូវអាកាស។
ក្រុងយុទ្ធសាស្ត្រធ្លាក់ក្នុងកណ្តាប់ដៃតាលីបង់
ទិដ្ឋភាពនៅក្រុងគូនឌូស្ស គឺដូចសម័យឆ្នាំ២០០១ ! កងទ័ពសម្ព័ន្ធមិត្តអូតង់ កំពុងស្វះស្វែងកម្ចាត់ពួកតាលីបង់ ប៉ុន្តែនៅលើកនេះ ខុសពី១៤ឆ្នាំមុន ដោយមានទាហានជាតិអាហ្វហ្កានីស្ថាន ជាអ្នកនៅជួរមុខលើសមរភូមិជើងគោក។ គូនឌូស្សជាក្រុងយុទ្ធសាស្ត្រ មានទាហានសរុបប្រមាណជាពី៥ពាន់ទៅ៧ពាន់នាក់ កំពុងឈរជើងប្រយុទ្ធប្រឆាំងនឹងពួកតាលីបង់។ តែគ្នាច្រើនអន្សមខ្លោច កាលពីថ្ងៃចន្ទទី ២៨កញ្ញា ក្រុងគូនឌូស្សបានធ្លាក់ក្នុងកណ្តាប់ដៃពួកតាលីបង់ ដែលមានគ្នាប្រមាណតែពីបួនរយទៅពីរពាន់នាក់ប៉ុណ្ណោះ។
ក្រុងគូនឌូស្សស្ទើរតែទាំងមូលស្ថិតក្រោមការកាន់កាប់របស់ពួកតាលីបង់។ ស្ថិតក្នុងស្ថានភាពបែបនេះ កងទ័ពអាកាសអាមេរិកបានចេញធ្វើប្រតិបត្តិការវាយប្រហារផ្លូវអាកាស តាំងពីយប់ថ្ងៃអង្គារមក ដើម្បីជាជំនួយដល់កងទ័ពថ្មើរជើងជាតិអាហ្វហ្កានីស្ថាន។ នៅថ្ងៃព្រហស្បតិ៍ ទាហានរដ្ឋាភិបាលប្រកាសដណ្តើមយកក្រុងគូនឌូស្សមកវិញនិងបោសសម្អាតអស់ពួកភេរវនិយមតាលីបង់។ តែសង្គ្រាមពាក្យសំដីនៅតែបន្ត ពួកតាលីបង់បានស្រែកបកមកវិញ ថាកំពុងធ្វើការប្រយុទ្ធគ្នានៅឡើយ។
បរាជ័យទោះបីមធ្យោបាយធំ
នេះជាលើកទីមួយគិតចាប់ពីឆ្នាំ២០០១មក ដែលក្រុងគូនឌូស្សធ្លាក់ក្នុងកណ្តាប់ដៃពួកតាលីបង់យ៉ាងដូច្នេះ។ គឺជាបរាជ័យដ៏ចត់បំផុតសម្រាប់ប្រធានាធិបតីអាហ្វហ្កានីស្ថានដែលទើបជាប់ឆ្នោតទើបបានមួយឆ្នាំផង និងសម្រាប់កងកម្លាំងទ័ពជាតិអាហ្វហ្កានីស្ថានផង ព្រមទាំងសម្ព័ន្ធមិត្តលោកខាងលិច ឬនិយាយឱ្យចំគឺសហរដ្ឋអាមេរិកតែម្តង ដែលជាអ្នកគាំទ្រទាំងយោធានិងហិរញ្ញវត្ថុដល់រដ្ឋាភិបាលអាហ្វហ្កានីស្ថាន។
អាមេរិកបានចំណាយថវិកាអស់ជាង ៦៥ពាន់លានដុល្លារដើម្បីធ្វើជាទន្ទល់ និងផ្តល់វគ្គបំពាក់បំប៉នដល់កងកម្លាំងទាហានអាហ្វហា្កនីស្ថានរយៈពេល១៣ឆ្នាំកន្លងមកនេះ។ ឯលទ្ធផលបានមកវិញ គឺមានតែបរាជ័យ និងការព្រួយបារម្ភ ព្រោះតាមក្បួនទាហានអាហ្វហ្កានីស្ថានជាអ្នកទទួលខុសត្រូវការពារសុវត្ថិភាពនិងសន្តិសុខជាតិតែម្នាក់ឯង ដោយកងទ័ពអន្តរជាតិដកចេញបាត់អស់ទៅហើយ។
អូតង់ផ្តល់ការគាំទ្រអ្វីខ្លះដល់កងកម្លាំងជាតិអាហ្វហ្កានីស្ថាននៅគួនឌូស្ស ?
កងទ័ពអូតង់ បានដកចេញពីអាហ្វហ្កានីស្ថាន ជាផ្លូវការ ជិតមួយឆ្នាំហើយ ! ប៉ុន្តែ នៅតែមានទាហានបរទេសកំពុងធ្វើអន្តរាគមន៍ក្នុងប្រទេសនេះជានិច្ចនៅថ្ងៃនេះ។ ជាកងកម្លាំងទ័ពពិសេស គ្មានបេសកកម្មប្រយុទ្ធទេ មានត្រឹមតែជាអ្នកផ្តល់ដំបូន្មាន ផ្តល់ប្រឹក្សា។ និយាយដោយខ្លី កងទ័ពអាហ្វហ្កានីស្ថាន ត្រូវរក្សាការពារជាតិដោយខ្លួនឯង គ្រាន់តែមានជំនួយខ្លះពីអូតង់ប៉ុណ្ណោះ។ ក្នុងករណីនៅក្រុងគូនឌូស្សនេះ អ្នកនាំពាក្យអូតង់ បានបដិសេធមិនលម្អិតអំពីចំនួនទាហានដាក់ពង្រាយក្នុងតំបន់នេះ និងអំពីបេសកកម្មរបស់ពួកគេប្រាប់អ្នកយកព័ត៌មានយើងទេ។ តែបើតាមប្រភពយោធាបស្ចឹមលោក សុំមិនបញ្ចេញឈ្មោះបានបង្ហើបបញ្ជាក់ថា មានទាហានជើងឆើតអាមេរិក អង់គ្លេស និងអាល្លឺម៉ង់ កំពុងធ្វើសកម្មភាពនៅគូនឌូស្សនេះ។
បើទោះបីជាទាហានជាតិដណ្តើមបានក្រុងគូនឌូស្សជាផ្លូវការពីកណ្តាប់ដៃពួកតាលីបង់ហើយក៏ដោយក្តី ក៏ការប្រយុទ្ធនៅតែបន្ត ក្នុងក្រុងនិងតំបន់ជុំវិញក្រុង។ យន្តហោះចម្បាំងអាមេរិកបានចេញធ្វើប្រតិបត្តិការជាលើកទីមួយនៅ យប់ថ្ងៃអង្គារឆ្លងចូលមកថ្ងៃពុធ និងនៅយប់មិញ ដែលទំនងជាដើមហេតុបង្កឱ្យមានការខូចខាតនិងការបាត់បង់ជីវិតបុគ្គលិកក្រុមគ្រូពេទ្យគ្មានព្រំដែននេះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ