ក្រុមប្រទេសងាយរងគ្រោះធម្មជាតិ ចង់ផ្តុំកម្លាំង ដាក់សម្ពាធលើសន្និសីទក្រុងប៉ារីស
ក្រុមប្រទេសជាង២០ ដែលប្រឈមជាងគេនឹងការប្រែប្រួលអាកាសធាតុ បាននិងកំពុងជួបប្រជុំគ្នានៅទីក្រុងម៉ានីលប្រទេសហ្វីលីពីន ដើម្បីរួមកម្លាំងគ្នាជាធ្លុងមួយ ឱ្យកាន់តែមានទម្ងន់ខ្លាំងក្នុងការចរចា នៅសន្និសីទស្តីអំពីអាកាសធាតុ COP២១ក្រុងប៉ារីស នាពេលខាងមុខ។ ក្រុមប្រទេសជាង២០នេះ តំណាងឱ្យប្រជាពលរដ្ឋជាង ៧០០លាននាក់។
ចុះផ្សាយនៅថ្ងៃ៖
ស្តាប់ - ០១:៤៣
ពិភពលោកបានស្គាល់រួចមកហើយក្រុមប្រទេសអ្នកមានមហាឧស្សាហកម្ម ហៅកាត់ថា G២០។ ចាប់ពីថ្ងៃនេះទៅ យើងមានក្រុមV២០ មួយក្រុមទៀត ដែលជាក្រុមប្រទេសងាយរងគ្រោះជាងពីការប្រែប្រួលអាកាសធាតុ។ V២០ ត្រូវបានបង្កើតឡើង ពីរខែមុនការបើកសន្និសីទCOP២១នៅក្រុងប៉ារីស និងមានសមាជិក ជាប្រទេសក្រីក្រកំពុងអភិវឌ្ឍន៍ (ប្រទេសខាងត្បូង) ជាង២០ប្រទេស តំណាងឱ្យពលរដ្ឋជាង៧០០លាននាក់ មានជាអាទិ៍ វ៉ាណាទូ ហ្វីលីពីន អាហ្វហ្កានីស្ថាន បង់ក្លាដែស បារប៉ាដ ប៊ូតង់ កូស្តារីកា ទីម័រខាងកើត អេត្យូពី ហ្កាណា កេនយ៉ា គីរីបាទី ម៉ាដាហ្កាស្កា ម៉ាល់ឌីវ នេប៉ាល់ រវ៉ាន់ដា សាំងលុយស៊ី តាន់ហ្សានី ទូវ៉ាលូ និងវៀតណាម។
ការសម្រេចមកជួបប្រជុំ និងយកហ្វីលីពីនជាទីស្នាក់ការធំ ក៏ព្រោះតែហ្វីលីពីន ជាប្រទេសទីពីរ ដែលប្រឈមនឹងការរងគ្រោះធម្មជាតិខ្យល់ព្យុះសង្ឃរាខ្លាំង និងញយដងជាងគេ ដោយហេតុតែការប្រែប្រួលអាកាសធាតុ។ កាលពីដើមឆ្នាំ២០១៥ គឺពីប្រទេសហ្វីលីពីន តែម្តងដែលប្រធានាធិបតីបារាំង លោកហ្វ្រង់ស័រហូឡង់ បានចាប់ផ្តើមយុទ្ធនាការពិភពលោកដើម្បីអាកាសធាតុ។ ហេតុដូច្នេះហើយបានជាក្រុមប្រទេសV២០ មានគំនិតត្រូវជួបប្រជុំគ្នា ដើម្បីប្រមូលសំឡេងតូចៗ ឱ្យឡើងជាធំសម្រាប់យកទៅបញ្ចេញទន្ទឹមគេឯងឱ្យបានឮច្បាស់នាឱកាសសន្និសីទក្រុងប៉ារីសខាងមុខ។
កម្មវត្ថុសំខាន់នៃជំនួបនេះ គឺដើម្បីដាក់សម្ពាធលើក្រុមប្រទេសអភិវឌ្ឍន៍ឱ្យគិតគូរបន្ថែមទៀត ដល់បញ្ហាអាកាសធាតុ។ ក្នុងន័យនេះ ក្រុមប្រទេសងាយរងគ្រោះពីអាកាសធាតុ កំពុងខិតខំស្វែងរកយន្តការហិរញ្ញវត្ថុសម្រាប់បំផ្លែងហានិភ័យ ព្រោះ ជាកូនសោនៃជោគជ័យនៅប៉ារីស។ សម្រាប់ក្រុងម៉ានីល បើតាមហ្វីលីពីន ដែលជាប្រធានក្រុមV២០បើរកមិនឃើញយន្តការនេះទេ នោះគឺV២០ជាអ្នកបាត់បង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ