សករាជថ្មី នៃសហប្រតិបត្តិការយុទ្ធសាស្ត្រ រវាង រុស្ស៊ី និង ឥណ្ឌា
ចុះផ្សាយនៅថ្ងៃ៖
ស្តាប់ - ០៥:៤៦
តាមសេចក្តីអញ្ជើញនៃលោកប្រធានាធិបតីរុស្ស៊ី វ៉្លាឌីមៀរ ពូទីន លោកនាយករដ្ឋមន្ត្រីឥណ្ឌា ណារិន្ត្រ ម៉ូឌី បានបំពេញទស្សនកិច្ចផ្លូវការ រយៈពេលពីរថ្ងៃនៅរុស្ស៊ី គឺថ្ងៃទី២៣ និង ២៤ ធ្នូកន្លងទៅ។ ជាលទ្ធផលនៃកិច្ចចរចា នៅវិមានក្រេមឡាំងក្រុងម៉ូស្គូ យប់មិញ មានចុះបានកិច្ចព្រមព្រៀង ក្នុងទឹកប្រាក់រាប់ម៉ឺនលានដុល្លារ ប៉ះលើវិស័យថាមពលបរមាណូ វិស័យ ប្រេងនិងឧស្ម័ន និងផ្នែកលក់គ្រឿងបច្ចេកទេសយោធារុស្ស៊ី ទៅឥណ្ឌា។
ក្នុង១៥ឆ្នាំចុងក្រោយ ជំនួបកំពូលឥណ្ឌា-រុស្ស៊ី តែងប្រព្រឹត្តទៅរៀងរាល់ឆ្នាំ មិនដែលអាក់ខានទេ សម្រាប់សម្គាល់ទំនាក់ទំនងរវាងមហាប្រទេសទាំងពីរ ដែលត្រូវគូភាគី សន្និដ្ឋាន ថាជា ដៃគូយុទ្ធសាស្ត្រនឹងគ្នាតាមគ្រប់មុខព្រួញ។
នាយករដ្ឋមន្ត្រីឥណ្ឌាបច្ចុប្បន្ន លោក ណារិន្ត្រ ម៉ូឌី ធ្លាប់បានជួបសន្ទនា ជាមួយលោកប្រធានាធិបតីរុស្ស៊ី ពូទីន តែក្នុងបរិវេណនៃកិច្ចប្រជុំកំពូលអន្តរជាតិនានា ប៉ុន្តែមិនធ្លាប់បានអញ្ជើញ មកធ្វើទស្សនកិច្ចនៅប្រទេសរុស្ស៊ីទេ ហើយទស្សនកិច្ចនេះត្រូវប្រព័ន្ធផ្សព្វផ្សាយនៅម៉ូស្គូ ចង្អុលឲ្យឃើញថាជាទស្សនកិច្ច “ផ្លូវការ” និងដែលអមដំណើរ ដោយពួកថៅកែគ្រាក់ៗនៃប្រទេសឥណ្ឌា ដើម្បីចូលខ្លួនមកទទួលយកកន្លែងណា ដែលនៅទំនេរ ក្រោយពីពួកធុរជនជាតិតួកគី និង បណ្តាប្រទេសសហភាពអឺរ៉ុប បានដកខ្លួនចេញពីរុស្ស៊ីទៅ។
ដោយស្វាគម ប្រមុខរដ្ឋាភិបាលឥណ្ឌា នៅវិមានក្រេមឡាំង លោកពូទីន ចាត់ទុកសហប្រតិបត្តិការ រវាងរុស្ស៊ីនិងឥណ្ឌា មិនគ្រាន់តែជាភាពជាដៃគូយុទ្ធសាស្ត្រ នឹងគ្នាប៉ុណ្ណោះទេ តែគឺផ្តិតជាប់ដោយអាទិភាព។ តាមលោកពូទីន ទំនាក់ទំនងរុស្ស៊ី-ឥណ្ឌា ចេះតែលូតលាស់ទៅ តាមគ្រប់មុខព្រួញ គឺទាំងវិស័យនយោបាយ ទាំងផ្នែកសេដ្ឋកិច្ច ទាំងការសម្របសម្រួលសកម្មភាពគ្នា លើឆាកអន្តរជាតិ។
លោកណារិនដ្រា ម៉ូឌី ពីចំណែកគាត់ បានថ្លែងទៅលោកពូទីនថា ឥណ្ឌា ក្នុងការដោះស្រាយបញ្ហាអន្តរជាតិ សព្វថ្ងៃមានប្រទេសរុស្ស៊ី ជាមិត្តដ៏ជំនិត និងយ៉ាងកក់ក្តៅ។ ក្នុងគ្រាដ៏លំបាក ប្រទេសទាំងពីរ តែងស្ថិតនៅជាមួយគ្នា។ ទំនាក់ទំនងយើងក្លាយជាយុទ្ធសាស្ត្រមែនពិត។ ជំនួបកំពូលមួយឆ្នាំម្តងៗ ហុចលទ្ធភាពដល់យើងឲ្យបំផុសបំផុលទំនាក់ទំនងទ្វេភាគី បានយ៉ាងលឿន ឲ្យអនុម័តសេចក្តីសម្រេចដ៏សំខាន់ៗ បានទាន់ពេលវេលា ដូចដែលធ្លាប់បានប្រព្រឹត្តទៅ ពេលដែលឯកឧត្តមបានបំពេញទស្សនកិច្ច នៅឥណ្ឌាក្នុងឆ្នាំមុន។
បើនិយាយពី វិស័យពាណិជ្ជកម្ម-សេដ្ឋកិច្ច ក្នុងឆ្នាំ២០១៤កន្លងទៅ នោះទំហំផ្តោះប្តូរពាណិជ្ជកម្ម រវាងរុស្ស៊ីនិងឥណ្ឌា បានមានទឹកប្រាក់ ៩.៥០០លានដុល្លារ ដែលពីក្នុងនោះរុស្ស៊ីបានលក់ ទៅឥណ្ឌា គឺក្នុងទឹកប្រាក់ ៦.៣០០លានដុល្លារ ហើយទិញពីឥណ្ឌាមកវិញ គឺ៣.២០០លានដុល្លារ។
គូភាគីដាក់ទិសបង្កើនទំហំនេះ លុះទាល់តែសមស្របនឹងសក្តានុពលមហាប្រទេសទាំងពីរ។
ហំហួនជាង គឺវិស័យថាមពលបរមាណូ ៖ នៅឯខេត្ត Tamilnad ប៉ែកខាងត្បូងឥណ្ឌា មានដាក់ឲ្យដំណើរការទៅហើយស្ថានីយអគ្គីសនីឈ្មោះ Kudankulam ដើរដោយរ៉េអាក់ទ័រនុយក្លេអ៊ែរ កម្លាំង ១.០០០ Megawatt។ កាលពីខែមេសាឆ្នាំមុន ភាគីឥណ្ឌា បានចុះជាមួយទីភ្នាក់ងារបរមាណូរដ្ឋរុស្ស៊ី RosAtom ដើម្បីសង់ឡើងជារ៉េអាក់ទ័រនុយក្លេអ៊ែរ បន្ថែមទៀត រ៉េអាក់ទ័រទី២ ជិតដំណើរការទៅដែរ និងទី៣ កំពុងសង់ឡើងមានកម្លាំងសុទ្ធតែ១.០០០ Megawatt ក្នុងតម្លៃ ៦.៤០០លានដុល្លារ ដែលពីក្នុងនោះ ៣.៤០០លានដុល្លារ ជាឥណទានផ្តល់ឲ្យខ្ចីដោយរុស្ស៊ី។
ឥឡូវ បន្តប្រព្រឹត្តទៅ កិច្ចចរចាដើម្បីសង់ឡើងជារ៉េអាក់ទ័រនុយក្លេអ៊ែរទី៤ និង ទី៥។ អស់ទាំងនេះ គឺក្នុងក្របខ័ណ្ឌនៃពិធីសារ ដែលមានចុះក្នុងដំណើរទស្សកិច្ចលោកប្រធានាធិបតីរុស្ស៊ី ពូទីន នៅឥណ្ឌា កាលពីថ្ងៃ១១ធ្នូឆ្នាំ២០១៤។ ពីធីសារនោះ ប្រមើលសង់ឲ្យបានសរុបទៅ រ៉េអាក់ទ័រនុយក្លេអ៊ែរ ចំនួនដល់ទៅ១២ ក្នុង២០ឆ្នាំទៅមុខ សម្រាប់បំពេញដល់តម្រូវការនៃបណ្តាជនឥណ្ឌា ដែលឡើងដល់ ១.២០០លាននាក់ទៅហើយ។
ខាងផ្នែកយោធា-បច្ចេកទេស តាមដែលប្រព័ន្ធផ្សព្វផ្សាយនៅទីនេះ បង្ហើបឲ្យដឹង តាំងពីក្នុងឆ្នាំ២០០២ម៉្លេះ មានចុះបានកុងត្រាសម្រាប់លក់ទៅឲ្យឥណ្ឌា គឺយន្តហោះប្រដេញរុស្ស៊ី ធុន Sukhoi -30ហៅកាត់ថា Su-30 ចំនួន ២៧២ គ្រឿង តាមវិធីបញ្ជូនទៅនូវគ្រឿងផ្សំវាពីរុស្ស៊ី យកទៅផ្គុំដំឡើងនៅតាមរោងចក្រឥណ្ឌា Hindustan Aeronautics Limited។ គិតមកទល់ឥឡូវ តាមប្រសាសន៍លោកពូទីន មានផ្គុំដំឡើងបានជាង២០០គ្រឿងហើយ ហើយសល់ប្រមាណ ៦០គ្រឿង ឥណ្ឌា នឹងទទួលបាន សព្វគ្រប់ ក្នុងឆ្នាំ២០១៨។ ជាការកត់សម្គាល់ ក្នុងឆ្នាំ ២០១៤ ពេលធ្វើលំហាត់ប្រយុទ្ធ ជាមួយយន្តហោះអង់គ្លេស ធុនEurofighter ពីឡុតឥណ្ឌា ដែលបើកយន្តហោះរុស្ស៊ី Su-30 បានប្រជែងឈ្នះយន្តហោះអង់គ្លេសនោះ ដោយពិន្ទុ ១២ ទល់នឹងសូន្យ។
ក្នុងទឹកប្រាក់ រាប់ម៉ឺនលានដុល្លារ នៃកិច្ចព្រមព្រៀងចុះយប់មិញ តាមប្រសាសន៍លោក ពូទីន គឺមានការលក់ទៅឲ្យឥណ្ឌា ដោយរុស្ស៊ីនូវប្រេងឆៅបរិមាណ ១០លានតោន ក្នុង១ឆ្នាំៗ សម្រាប់អំឡុងពេល ១០ឆ្នាំទៅមុខ។
ចំណែកកុងត្រាក្នុងតម្លៃ ៤ពាន់៥រយលានដុល្លារ នៃប្រព័ន្ធមីស៊ីលការពារដែនអាកាសទំនើបបំផុត របស់រុស្ស៊ីធុន S-400 ចំនួន៥ ប្រព័ន្ធដែលឥណ្ឌាតែងលេបទឹកមាត់ចង់បាន ក្រោយពីឃើញរុស្ស៊ីបានលក់វាទៅឲ្យចិនប៉េកាំងទៅហើយ គឺនៅមិនទាន់ចុះទេ។
គួរនិយាយថា ឥណ្ឌាបានចាប់ផ្តើមទិញអាវុធរុស្ស៊ី គឺតាំងពីជាងកន្លះសតវត្សមុនម៉្លេះ ពោលគឺ ពីឆ្នាំ ១៩៦១ មកលុះទាល់តែបច្ចុប្បន្ន សព្វាវុធឥណ្ឌាក្នុងទំហំដល់ទៅ៨០% ជាផលិតផលសូវៀត និងរុស្ស៊ី។
ក្នុងជំនួបជាមួយពួកអ្នកតំណាងមជ្ឍដ្ឋាន Business ឥណ្ឌា លោកពូទីន អំពាវនាវឲ្យពង្រីកផលិតផលនៅក្នុងប្រទេសរុស្ស៊ីផ្ទាល់ ដោយសន្យាសម្រួលសម្រាប់គេ នូវរបបទទួលទិដ្ឋាការ។
លោកនាយករដ្ឋមន្ត្រីឥណ្ឌា ណារិន្ត្រ ម៉ូឌី បានថ្លែងយប់មិញថា ទស្សនកិច្ចរបស់គាត់នៅរុស្ស៊ី បានចប់ទៅប្រកបដោយផ្លែផ្កាគួរឲ្យសោមនស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ