អ.ស.ប.៖ អាស៊ីប៉ាស៊ីហ្វិកអាចលែងជាក្បាលម៉ាស៊ីនអូសទាញសេដ្ឋកិច្ចពិភពលោក
កំណើនសេដ្ឋកិច្ចរបស់តំបន់អាស៊ីប៉ាស៊ីហ្វិក បានឡើងដល់គន្លាក់របស់វាហើយ ! ដូច្នេះបណ្តាប្រទេសកំពុងលូតលាស់ និងលូតលាស់ខ្លាំង នៅក្នុងតំបន់ ទំនងជាលែងអាចចាត់ទុកបានជាក្បាលម៉ាស៊ីនអូសទាញកំណើនសេដ្ឋកិច្ចពិភពលោក ដូចមុនទៀតដែរ។ នេះបើតាមសេចក្តីពន្យល់របស់អង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០៥
តំបន់អាស៊ីប៉ាស៊ីហ្វិកទាំងមូល លើកលែងតែជប៉ុន នូវែលហ្សេឡង់ និងអូស្ត្រាលី បានស្គាល់កំណើនសេដ្ឋកិច្ចប្រចាំឆ្នាំ២០១៥ ត្រឹមប្រមាណ៤,៥%ប៉ុណ្ណោះ។ ជាអត្រាដែលទាបបំផុតមិនធ្លាប់ គិតចាប់ពីឆ្នាំ២០០៩មក។ ហើយនៅឆ្នាំ២០១៦ កំណើនសេដ្ឋកិច្ចទំនងជាអាចនឹងកំរើកឡើងបន្តិចដល់៥%។ នេះបើតាមរបាយការណ៍របស់គណៈកម្មការសេដ្ឋកិច្ចនិងសង្គមរបស់អង្គការសហប្រជាជាតិប្រចាំតំបន់អាស៊ីប៉ាស៊ីហ្វិក ចេញផ្សាយនៅថ្ងៃព្រហស្បតិ៍ទី១៤មករានេះ។
ជាមួយនឹងកំណើនសេដ្ឋកិច្ចបន្ថយល្បឿនយ៉ាងដូច្នេះ គេសង្ស័យថាតំបន់អាស៊ីប៉ាស៊ីហ្វិកមិនអាចបន្តធ្វើជាអ្នកចង្អុលផ្លូវនាំសេដ្ឋកិច្ចពិភពលោកឱ្យមានកំណើនឡើងវិញបានឡើយ។ នេះបើតាមប្រសាសន៍លោក Shamshad Akhtarលេខាប្រតិបត្តិរបស់គណៈកម្មការសេដ្ឋកិច្ចនិងសង្គមអង្គការសប្រជាជាតិប្រចាំអាស៊ីប៉ាស៊ីហ្វ្រិក។
សូមបញ្ជាក់ថា មុនវិបត្តិសេដ្ឋកិច្ចពិភពលោកឆ្នាំ២០០៨ តំបន់អាស៊ីមានកំណើនសេដ្ឋកិច្ចជាង៩% និងជាម៉ាស៊ីនអូសទាញសេដ្ឋកិច្ចពិភពលោក នៅឆ្នាំបន្តបន្ទាប់។ ប៉ុន្តែពេលវេលាមាសរបស់អាស៊ីបានកន្លងផុតហើយ ! ព្រោះបើតាមសេដ្ឋវិទូ មានមូលហេតុធំៗពីរយ៉ាង។ ទីមួយគឺសេដ្ឋកិច្ចចិនបន្ថយល្បឿន និងម្យ៉ាងទៀតបណ្តាលមកពីរចនាសម្ព័ន្ធរបស់អាស៊ី បំណុលឡើងខ្ពស់ អ្នកចាយវាយគ្មានទំនុកចិត្ត ឯការវិនិយោគក៏ទន់ខ្សោយ។ ថៃនិងម៉ាឡេស៊ី កូនខ្លាពីរនៅអាស៊ីអាគ្នេយ៍ ជាឧទាហរណ៍ មានបំណុលឡើងខ្ពស់ ដល់ទៅ៥០%នៃផលិតផលសរុបក្នុងស្រុក។
ហេតុដូច្នេះហើយបានជាគ្រាន់តែចិនមានកំណើនសេដ្ឋកិច្ចមិនត្រចះត្រចង់បន្តិច ផលវិបាកត្រូវប៉ះទង្គិចពេញមួយតំបន់ដោយចៀសមិនរូចភ្លាម។ នេះបើរបាយការណ៍ដដែល ដែលព្យាករទៀតថា ចិននឹងមានកំណើនសេដ្ឋកិច្ចឆ្នាំ២០១៦ តែ៦,៥% ទល់នឹងការប៉ាន់ស្មាន៦,៨% ឥណ្ឌាចុះពី៨,២%មក៧,៥%។ ប្រទេសដែលនៅរក្សាកំណើនសេដ្ឋកិច្ចខ្ពស់ខ្លាំងជាង គេ គឺតួកម៉េនីស្ថាន (៨,៩%) ឡាវ(៨%) និងភូមា (៨,៤%)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ