ឥណ្ឌូណេស៊ីដែនដីបេសកកម្មថ្មីរបស់ពួកអង្គការរដ្ឋអ៊ីស្លាម ?
ប៉ូលិសឥណ្ឌូណេស៊ី កំពុងស្ថិតក្នុងស្ថានភាពត្រៀមអាសន្នខ្ពស់បំផុត នៅថ្ងៃសុក្រទី ១៥មករានេះ មួយថ្ងៃក្រោយការវាយប្រហារភេរវកម្មជីហាតនៅកណ្តាលក្រុងហ្សាការតា។ ជាមួយនឹងការអង្កេតវែករកអត្តសញ្ញាណភេរវជន ឥណ្ឌូណេស៊ីបានប្រកាសពង្រឹងគ្រប់មធ្យោបាយ បង្កើនកិច្ចសហការជាមួយប្រទេសជិតខាង ដើម្បីប្រយុទ្ធប្រឆាំងនឹងការគំរាមកំហែងរបស់ពួកអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០៧:០៨
នៅក្នុងចំណោមជនប្រដាប់អាវុធ ទាំង៥នាក់ ប៉ូលិសឥណ្ឌូណេស៊ីបានកំណត់អត្តសញ្ញាណបួននាក់ហើយ។ ក្រុមនេះពិតជាមានពាក់ព័ន្ធ នឹងអង្គការរដ្ឋអ៊ីស្លាមមែន ព្រោះនៅពេលធ្វើការឆែកឆេរក្នុងផ្ទះជនជីហាតម្នាក់ គេបានរកឃើញ ជាអាទិ៍ទង់ជាតិខ្មៅរបស់អង្គការជីហាត។ ជនសង្ស័យបីនាក់ផ្សេងទៀត ត្រូវចាប់ខ្លួនបាននៅថ្ងៃនេះ។
ប៉ូលិសសង្ស័យទៀតថា ការវាយប្រហារភេរវកម្មថ្ងៃទី ១៤មករា បានបញ្ជាដោយជនអ៊ីស្លាមជ្រុលនិយមឥណ្ឌូណេស៊ី Bahrun Naim ដែលជាសមាជិកស្ថាបនិកម្នាក់របស់ក្រុមយុទ្ធជននៅអាស៊ីអាគ្នេយ៍នៅស៊ីរី។ ក្រុមនេះជាបណ្តុំសកម្មជនជីហាតបរទេស មានម៉ាឡេស៊ី និងប្រទេសផ្សេងទៀត ក្នុងតំបន់ ដែលគំរាមតាំងពីមួយឆ្នាំមកហើយ ថានឹងធ្វើការវាយប្រហារភេរវកម្មនៅផ្ទះឯង។
ឯចំណែកវិធីសាស្ត្រវាយប្រហារវិញ គឺក្រុមភេរវជននៅឥណ្ឌូណេស៊ីបានចម្លងតាមសកម្មភាពវាយប្រហារភេរវកម្មនៅប៉ារីស កាលពីខែវិច្ឆិកា។ ក្រោយពីបានចុចបំផ្ទុះគ្រាប់បែកហើយ ភេរវជនបានបាញ់រះ បង្កការភ័យស្លន់ស្លោ មុននឹងចាប់មនុស្សជាចំណាប់ខ្មាំងទៀត។ ភេរវជនបីនាក់បានស្លាប់ក្នុងបំផ្ទុះអត្តឃាត និងពីរនាក់ទៀតត្រូវកម្ចាត់បានដោយប៉ូលិស។ ក្នុងចំណោមជនរងគ្រោះបាត់បង់ជីវិតពីរនាក់ មានម្នាក់ជាជនជាតិកាណាដា។ អ្នករងរបួស បានកើនឡើងដល់២៤នាក់ បីនាក់ជាជនបរទេស និង៦នាក់ជាប៉ូលិស។
ប៉ូលិសត្រៀមអាសន្នខ្ពស់ ទាហានពង្រាយក្នុងក្រុង
ឥណ្ឌូណេស៊ី ប្រទេសអ៊ីស្លាមធំជាងគេនៅពិភពលោក ពិតជាអាចមិនអាចធ្វើប្រហែសបានឡើយ ! នៅថ្ងៃនេះប៉ូលិសឥណ្ឌូណេស៊ី នៅពេញផ្ទៃប្រទេស កំពុងស្ថិតក្នុងស្ថានការណ៍ត្រៀមអាសន្នខ្ពស់បំផុត ដោយមានជំនួយពីក្រុមយោធាផង ជាពិសេសនៅតាមតំបន់ដែលអាចជាទិសដៅវាយប្រហារភេរវកម្ម ដូចជាទីស្នាក់ការប៉ូលិស អាគាររដ្ឋ អាគារសាធារណៈ ស្ថានទូត ...
ក្បួនឡានជាច្រើន ផ្ទុកដោយទាហានពេញឡាន បំពាក់ដោយអាវុធធុនធ្ងន់ផង បានមកដល់ក្រុងហ្សាការតា តាំងពីព្រឹកមិញ ប៉ុន្តែភ្នាក់ងារប៉ូលិសមិនបានបញ្ជាក់អំពីតួនាទី និងភារកិច្ចរបស់ទាហានទាំងនោះ មកកាន់អ្នកសារព័ត៌មានយើងទេ។
ចំហាយអង្គការរដ្ឋអ៊ីស្លាមនៅឥណ្ឌូណេស៊ី
បើតាមសាររបស់អង្គការរដ្ឋអ៊ីស្លាម ដែលប្រកាសទទួលស្គាល់ស្នាដៃធ្វើភេរវកម្មនៅទីក្រុងហ្សាការតាម្សិលមិញ គឺពួកគេចង់វាយប្រហារ សំដៅលើប្រជាពលរដ្ឋនៃប្រទេសជាសមាជិកសម្ព័ន្ធអន្តរជាតិ ដឹកនាំដោយសហរដ្ឋអាមេរិក ដែលកំពុងធ្វើប្រតិបត្តិការផ្លូវអាកាសប្រឆាំងពួកជីហាតរដ្ឋអ៊ីស្លាមនៅស៊ីរីនិងអ៊ីរ៉ាក់។ ឥណ្ឌូណេស៊ី មិនចូលរួមក្នុងប្រតិបត្តិការនេះមែន ប៉ុន្តែវាអាចបេសកកម្មថ្មី ជាការរុករានរកដែនអំណាចថ្មី !
ឥណ្ឌូណេស៊ីជាប្រទេសអ៊ីស្លាមធំជាងគេនៅពិភពលោក មានពលរដ្ឋ២៥០លាននាក់ ក្នុងនោះ ៨៧% ជាអ្នកកាន់សាសនាអ៊ីស្លាមនិកាយស៊ុននីត និង១០%ជានិកាយឈីអ៊ីត ព្រមទាំងតិចតួចកាន់សាសនាគ្រិស្ត ហិណ្ឌូ ឬពុទ្ធសាសនា។
ថ្វីដ្បិតឥណ្ឌូណេស៊ី ជាមហាអំណាចសេដ្ឋកិច្ចលំដាប់លេខមួយប្រចាំតំបន់អាស៊ីអាគ្នេយ៍ ប៉ុន្តែឥណ្ឌូណេស៊ីជាចំណីនៃការប្រេះឆាផ្ទៃក្នុង ប្រឈមនឹងសង្គ្រាមចង់ផ្តាច់ទឹកដី និងភាពតានតឹងអន្តរសាសនាយ៉ាងខ្លាំង រវាងក្រុមអ្នកកាន់សាសនាអ៊ីស្លាមដូចគ្នាតែខុសនិកាយ និងជាមួយសាសនាផ្សេង និងពិសេសប្រទេសនេះត្រូវប្រឈមនឹងសង្គ្រាមប្រឆាំងភេរវនិយមក្នុងផ្ទៃប្រទេសខ្លួនឯងដោយឥតឈប់ឈរ។
ដោយមើលឃើញអំពីភាពតានតឹងក្នុងសង្គមឥណ្ឌូណេស៊ី នៅឆ្នាំ២០១៤ តាំងពីបានស្វ័យប្រកាសជារដ្ឋកាលីហ្វាមក អង្គការរដ្ឋអ៊ីស្លាម បានប្រឹងឃោសនាទាក់ទាញយុវជនឥណ្ឌូណេស៊ី។ ក្រុមភេរវនិយម Jemaah islamiyah ដែលធ្លាប់បង្កភេរវកម្មកាលពីឆ្នាំ២០០២ -២០០៣ និង២០០៩ ក៏បានប្រកាសភ្ជាប់ខ្លួនទៅនឹងអង្គការរដ្ឋអ៊ីស្លាមភ្លាម។ វីដេអូអនាធិបតេយ្យមួយ បានបង្ហោះកាលពីខែកក្កដា ២០១៥ ផ្សាយចេញពីពន្ធនាគាររូបប្រមុខសាសនាជាទីសក្ការៈរបស់ក្រុម Jemaah islamiyah ឈ្មោះ Abu Bakar Bashir ដែលជាប់ទោស១៥ឆ្នាំ ពីបទបានជួយឧបត្ថម្ភពួកជីហាតនៅអាឆេ និងដែលទើបឡើងតុលាការកាលពីបីបួនថ្ងៃមុខសុំសេរីភាព ក៏បានស្បថចូលក្រុមជីហាតរដ្ឋអ៊ីស្លាមជាមួយអ្នកជាប់ទោស២៣នាក់ផ្សេងដែរ។
ប៉ុន្តែបើតាមអ្នកឯកទេស អង្គការរដ្ឋអ៊ីស្លាមមានសកម្មជនគាំទ្រនៅឥណ្ឌូណេស៊ីប្រមាណតែមួយឬពីរពាន់ប៉ុណ្ណោះ ក្នុងនោះយ៉ាងច្រើនបីរយនាក់បានចេញទៅហាត់ជីហាតនៅស៊ីរីរួចត្រលប់មកចូលមាតុប្រទេសវិញ។ គឺជាចំនួនដ៏តិចតួចណាស់បើប្រៀបធៀបទៅនឹងចំនួនពលរដ្ឋរបស់ប្រទេស។ ទាំងនេះគឺទំនងដោយសារគម្លាតភូមិសាស្ត្រ ទើបចំហាយអង្គការរដ្ឋអ៊ីស្លាម ហាក់ដូចជាមិនជះដល់ឥណ្ឌូណេស៊ីខ្លាំង។
ជាផ្លូវការ ដើម្បីប្រយុទ្ធប្រឆាំងនឹងការចូលធ្វើជីហាត រដ្ឋាភិបាលឥណ្ឌូណេស៊ី តែងប្រើនយោបាយស្រទន់ ផ្តល់សារសម្របសម្រួល ឃោសនាអំពីអ៊ីស្លាមដែលអត់អោន។ ប៉ុន្តែភេរវកម្មថ្ងៃទី១៤មករា ទំនងជាអាចនឹងធ្វើឱ្យដំឡើងសំឡេងតឹងជាងមុនហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ