ភូមាបើកសករាជថ្មី គណបក្សរបស់លោកស្រីអ៊ុងសានស៊ូជីឡើងកាច់ចង្កូតសភា
សភាភូមាបានបើកទំព័រប្រវត្តិសាស្ត្រថ្មី នៅថ្ងៃចន្ទនេះ ! បន្ទាប់ពីរង់ចាំអស់ពេលបីខែ គណបក្សសម្ព័ន្ធប្រជាធិបតេយ្យរបស់លោកស្រី អ៊ុងសានស៊ូជី ដែលធ្លាប់ជាបក្សប្រឆាំង និងដែលបានទទួលជោគជ័យ យ៉ាងត្រចះត្រចង់ ក្នុងការបោះឆ្នោតសភាកាលពីថ្ងៃទី ៨ វិច្ឆិកា បានក្លាយជាអ្នកដឹកនាំសភាវិញម្តង ក្នុងនាមជាអ្នកមានសំឡេងភាគច្រើននៅក្នុងសភា។ កាតព្វកិច្ចដ៏ចម្បងនិងដ៏លំបាក ដែលកំពុងរង់ចាំសភាថ្មីនេះ គឺការបង្កើតរដ្ឋាភិបាលថ្មី និងការជ្រើសរើសតាំងប្រធានាធិបតី តាមបែបលទ្ធិប្រជាធិបតេយ្យ បន្ទាប់ពីបានរស់ត្រាំត្រែងក្នុងរបបយោធាអស់ជាងកន្លះសតវត្សរ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥៣
ជាថ្ងៃប្រវត្តិសាស្ត្រសម្រាប់ជីវិតនយោបាយនៅភូមា ដោយគណបក្សប្រសូតចេញពីការបោះឆ្នោតដោយសេរីនិងយុត្តិធម៌ ជាលើកទីមួយ អាចចូលមកគ្រប់គ្រងសភា បានស្របតាមឆន្ទៈរបស់ប្រជាពលរដ្ឋ។
តំណាងសភាជាប់ឆ្នោត និងសមាជិកសភាយោធា ទាំង ៣៩០រូប ក្នុងនោះ ២២៤ជាបក្សសម្ព័ន្ធជាតិប្រជាធិបតេយ្យ NLD ក្នុងសម្លៀកបំពាក់ឯកសណ្ឋានពណ៌លឿងទុំ បានមកដល់សភា ក្រុងណៃពិដោ តាំងពីព្រលឹម ដើម្បីចុះហត្ថលេខាបង្ហាញវត្តមាន។
“នេះហើយជាលទ្ធផលនៃការតស៊ូរបស់យើងជាច្រើនឆ្នាំ ! ពេលវេលាបានមកដល់ហើយ ការងារដ៏លំបាកៗជាច្រើនក៏កំពុងរង់ចាំយើងដែរ ! នេះជាប្រសាសន៍របស់លោកស្រី អ៊ុង សានស៊ូជី មុននឹងបញ្ជាក់បន្ថែមទៅកាន់សមាជិកសភារួមបក្សថា បេសកកម្មដ៏ធ្ងន់ធ្ងរទាំងអម្បាលម៉ាន ត្រូវតែប្រឹងសម្រេចឱ្យបានឆាប់ តាមដែលអាចធ្វើទៅបាន។
សូមបញ្ជាក់ថា សមាជិកសភាថ្មីដែលមានសំឡេងភាគច្រើននៅក្នុងសភាភូមាថ្មីនេះ ភាគច្រើនជាគ្រូពេទ្យ គ្រូបង្រៀន កវីនិពន្ធ ... វិជ្ជាជីវៈនយោបាយ ជាឯកទេសថ្មី ដែលត្រូវរៀនសូត្រ ជារៀងរាល់ថ្ងៃ។ មានតែតំណាងរាស្ត្រជាង២០រូប ប៉ុណ្ណោះដែលមានបទពិសោធន៍នៅក្នុងសភា ក្នុងនោះគឺរូបលោកស្រី អ៊ុងសានស៊ូជី ផ្ទាល់ ដែលបានជាប់ជាសមាជិកសភា កាលពីឆ្នាំ២០១២ ក្នុងសម័យបោះឆ្នោតសភាមួយភាគ។ ពេលនេះ លោកស្រី បានប្តូរនាទី ពីប្រមុខបក្សប្រឆាំង មកជាប្រមុខបក្សដែលមានសំឡេងភាគច្រើននៅក្នុងសភាម្តង។
តើនរណានឹងត្រូវបានជ្រើសតាំងប្រធានាធិបតី ?
ភារកិច្ចដំបូងរបស់សភា គឺត្រូវបោះឆ្នោតជ្រើសរើសប្រធាននិងអនុប្រធានសភាជាន់ទាប សភាជាន់ខ្ពស់ និងពិសេស ប្រធានាធិបតីថ្មី បន្តពីប្រធានាធិបតីបច្ចុប្បន្នដែលកំពុងកាន់តំណែងរហូតដល់ថ្ងៃទី ១ មេសា ២០១៦។ តាមច្បាប់ដែលបន្សល់ទុកដោយរបបសឹកភូមា សភាទាំងពីរ និងសភាយោធា (ដែលមិនឆ្លងកាត់ការបោះឆ្នោត តំណាងឱ្យ២៥%នៃអាសនៈសភា) ត្រូវស្នើបេក្ខភាពម្នាក់មួយៗយកមកបោះឆ្នោត ដើម្បីក្លាយជាប្រធានាធិបតី។
បើមើលទៅលើស្ថានភាពបច្ចុប្បន្ននេះ លោកស្រី អ៊ុង សានស៊ូជី មិនអាចឈរឈ្មោះឱ្យសភាបោះឆ្នោតជាប្រធានាធិបតីបានឡើយ ព្រោះច្បាប់រដ្ឋធម្មនុញ្ញភូមាមិនអនុញ្ញាតឱ្យបរទេស ឬជនណាមានកូនសញ្ជាតិបរទេស អាចបំពេញតួនាទីជាប្រមុខដឹកនាំប្រទេសទេ។ ហើយលោកស្រី អ៊ុងសានស៊ូជី មានកូនពីរនាក់ជាជនជាតិអង់គ្លេស។ លោកស្រីបានព្យាយាមកែប្រែរដ្ឋធម្មនុញ្ញ តាំងពីមុនបោះឆ្នោតម្ល៉េះប៉ុន្តែមិនបានសម្រេច។ នៅលើកនេះ ដោយសារបក្សNLD មានសំឡេងភាគច្រើនដល់ទៅ៦០% លោកស្រីអាចមានសង្ឃឹមកែប្រែរដ្ឋធម្មនុញ្ញបាន ប្រសិនបើមានការគាំទ្រពីសមាជិកសភានៃក្រុមយោធា ។ ទោះជាយ៉ាងណាក៏ដោយ ក៏លោកស្រី អ៊ុងសានស៊ូជី ធ្លាប់បានបញ្ជាក់ថានឹងស្ថិតនៅពេលប្រធានាធិបតីទៅទៀត។
ឥស្សរជនលេចធ្លោខ្លាំង
គណបក្សសម្ព័ន្ធជាតិលទ្ធិប្រជាធិបតេយ្យ ក៏មិនបានបញ្ជាក់អំពីឈ្មោះបេក្ខជនប្រធានាធិបតីណាម្នាក់ដែររហូតមកទល់ពេលនេះ។ គឺហាក់ដូចជាស្ងាត់ចម្លែកបន្តិចមែន ត្រង់ចំណុចនេះ ! ប៉ុន្តែបើតាមអ្នកវិភាគ គេហាក់ដូចសំឡឹងឃើញឥស្សរជនមួយចំនួន ៖ លោក ទិន អូ អតីតឧត្តមសេនីយ៍ដែលបានចាប់ដៃតស៊ូប្រឆាំងជាមួយលោកស្រី ស៊ូជី តាំងពីដំបូងភ្លាម។ គេឃើញរូបលោក ទិន អូនេះ មាននៅជាប់លោកស្រី និងឪពុកលោកស្រី គ្រប់ផ្ទាំងឃោសនាទាំងអស់។ លោកមានអាយុ ៩០ឆ្នាំ និងធ្លាប់ទន្ទេញថាគ្មានចេតនាចង់ក្លាយជាប្រធានាធិបតីទេ។
លោក ទិន មីយូ វីន ជាគ្រូពេទ្យផ្ទាល់របស់លោកស្រីអ៊ុងសានស៊ូជី និងជាបុគ្គលតែម្នាក់គត់ដែលមានសិទ្ធិចេញចូលជួបលោកស្រីពេលជាប់ឃុំឃាំងក្នុងគេហដ្ឋាន។ មានអាយុ៦៤ឆ្នាំ វេជ្ជបណ្ឌិត កាន់ពុទ្ធសាសនាមិនជ្រុលនិយម ជួយសង្គ្រោះអ្នកអ៊ីស្លាមមិនរើងមុខ ព្រមទាំងមានសំណើនយោបាយច្រើនឱ្យលោកស្រីស៊ូជី និងគ្មានប្រវត្តិយោធាសោះ ដែលជាចំណុចវិជ្ជមានខ្លាំងសម្រាប់តួនាទីជាប្រធានាធិបតី។
នៅមានឈ្មោះជាច្រើនបានរសាត់ក្រៅផ្លូវការដែរ និងគួរឱ្យចាប់អារម្មណ៍មួយទៀត គឺរូបប្រធានសភាទើបផុតអាណត្តិ លោក ស្វេ ម៉ាន់ ដែលបង្កើនស្វាគមន៍លោកស្រីអ៊ុងសានស៊ូជី តាំងពីមិនទាន់ប្រកាសលទ្ធផល។
និយាយជារួម ដំណើរការជ្រើសរើសប្រធានាធិបតី វែងឆ្ងាយនិងស្មុគស្មាញណាស់ នៅពេលសភាបោះឆ្នោតជ្រើសរើសបានហើយ ប្រធានាធិបតីថ្មី នឹងចូលកាន់តួនាទី នៅពីរខែទៀតខាងមុខ។
អន្តរកាលនយោបាយស្រទន់ ប្រជាធិបតេយ្យចង្អៀត
លោកស្រីអ៊ុងសានស៊ូជី ប្រធានគណបក្ស មិនបានពន្យល់ឱ្យស៊ីជម្រៅអំពីចេតនា ឬអំពីវិធីសាស្ត្រដឹកនាំប្រទេស និងក៏មិនបានធ្វើសុន្ទរកថាទៅកាន់សារព័ត៌មានអ្វីទាំងអស់នៅថ្ងៃចន្ទ ថ្ងៃបើកសភាដំបូងនេះ។ កម្មវិធីដឹកនាំរបស់រដ្ឋាភិបាល មិនត្រូវបានលម្អិតជាសាធារណៈទេ ! មន្ទីរចាត់ការបក្សសម្ព័ន្ធប្រជាធិបតេយ្យនេះ ហាក់ដូចជាដឹកនាំការងារដោយសម្ងាត់និងផ្តាច់ការណាគួរសម។
គេគ្រាន់តែដឹងថា អំពីបន្ទាត់នយោបាយធំៗ របស់រដ្ឋាភិបាលថ្មីថា ចង់នាំសន្តិភាព ស្តារលទ្ធិប្រជាធិបតេយ្យ ប្រយុទ្ធប្រឆាំងនឹងអំពើពុករលួយ អភិវឌ្ឍន៍សេដ្ឋកិច្ច ... ក្រសួងសំខាន់ៗ ដូចជាការពារជាតិ និងមហាផ្ទៃ ត្រូវស្ថិតនៅក្រាមការកណ្តាប់ដៃយោធា ! មានតែក្រសួងសុខាភិបាល អប់រំ ដែលខ្ទេចខ្ទីស្ទើរដល់បាតទេដែលបក្សជាប់ឆ្នោតត្រូវទទួលបន្ទុកស្តារឡើងវិញ។ ភូមាជាប្រទេសក្រីក្រក្នុងតំបន់មួយ មានប្រជាជនរស់នៅ ៥១លាននាក់ ក្នុង៣០%មានអគ្គីសនីប្រើប្រាស់។
ភាពស្ងប់ស្ងាត់ គ្មានដំណឹងនេះ បានធ្វើឱ្យអ្នកវិនិយោគបរទេស ស្ថាប័នហិរញ្ញវត្ថុអន្តរជាតិ មានការព្រួយបារម្ភយ៉ាងខ្លាំង។ ប៉ុន្តែបើតាមអ្នកនាំពាក្យបក្ស អន្តរកាលនយោបាយផុយស្រួយណាស់ និងដោយធ្លាប់ទទួលបទពិសោធន៍នៅឆ្នាំ១៩៩០ ឈ្នះឆ្នោតហើយមិនបានដឹកនាំប្រទេស ទើបបក្សសម្ព័ន្ធប្រជាធិបតេយ្យ ផ្តល់សារនយោបាយយ៉ាងតិចតួចបំផុត ដើម្បីកុំឱ្យក្រុមយោធា និងអតីតយោធាស្លន់ស្លោ បើចង់បានការផ្ទេរអំណាចដោយស្រទន់បាន។ នៅក្នុងរង្វង់បក្ស ការតស៊ូមតិបែបប្រជាធិបតេយ្យ ក៏មានតិចដែរ គឺមានត្រឹមការផ្តល់សំណើផ្សេងៗទៅជូនលោកស្រីប្រធានបក្សដើម្បីសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ