អ្នកឯកទេសព្រមានពីភាព ងាយរងគ្រោះនឹងវីរ៉ុសហ្ស៊ីកានៅអាស៊ី
សម្បូរសង្កាត់ក្រីក្ររខេករខាក ភូមិចង្អៀតមនុស្សណែនណាន់ ខ្វះអនាម័យ សម្បូរជម្រកមូស ទ្វីបអាស៊ី ជាតំបន់ដែលងាយរងគ្រោះខ្លាំងជាងគេបំផុតពីការរាតត្បាតនៃវីរ៉ុសហ្ស៊ីកា។ នេះបើតាមការព្យាកររបស់អ្នកឯកទេស ដែលបានចាត់ទុកការប្រយុទ្ធប្រឆាំងនឹងហ្ស៊ីកា ជាវិញ្ញាសាដ៏លំបាកមួយរបស់អាជ្ញាធរពាក់ព័ន្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កាលពីថ្ងៃអង្គារ ថៃបានប្រកាសបញ្ជាក់ វត្តមានហ្ស៊ីកាលើកដំបូងក្នុងប្រទេស ! នៅថ្ងៃពុធនេះ ឥណ្ឌូណេស៊ីជិតខាងក៏បានជូនដំណឹងជាផ្លូវការថាក៏មានករណីហ្ស៊ីកាដែរ និងបានអំពាវនាវឱ្យពលរដ្ឋរក្សាភាពស្ងប់ស្ងាត់ និងសុទ្ធតែបានធានារ៉ាប់រងអំពីការត្រៀមខ្លួនជាស្រេចក្នុងការប្រយុទ្ធប្រឆាំងនឹងមេរោគ ចម្លងតាមមូសខ្លា ដែលអាចធ្វើឱ្យទារកស្លាប់ក្នុងផ្ទៃ ឬកើតមកមានក្បាលតូចខុសប្រក្រតី។
ឥណ្ឌាប្រទេសដ៏ក្រីក្រ និងមានប្រជាជនច្រើនជាងគេបំផុតបន្ទាប់ពីចិន ក៏ចាប់ផ្តើមបង្ហាញការព្រួយបារម្ភដែរ។ ទូរទស្សន៍ជាតិ បានផ្សព្វផ្សាយអំពីលទ្ធភាពរងគ្រោះហ្ស៊ីកា។ អាជ្ញាធរសុខាភិបាលឥណ្ឌា យល់ច្បាស់ថាមិនយូរមិនឆាប់ វីរ៉ុសហ្ស៊ីកានឹងមកដល់ ព្រោះឥណ្ឌាសម្បូរមូសណាស់ រាប់ទាំងពពួកមូសខ្លា Aedes Aegypti និងមានបរិស្ថានអំណោយផលខ្លាំងខាងរាតត្បាត ជាក់ស្តែងនៅក្រុងប៊ុមបៃ រដូវវស្សាភ្លៀងធ្លាក់ខ្លាំងរយៈពេលបួនខែ ទឹកជន់ទឹកដក់ ប្រជាជនរស់នៅជាប់គ្នារដឹក គ្មានអនាម័យ មូសកើតមួយសេរី ...
ថ្វីបើពេលនេះ ហ្ស៊ីកាមានកើតច្រើននៅប្រទេសប្រេស៊ីល ប៉ុន្តែមូសខ្លាមានផ្ទុកវីរ៉ុសហ្ស៊ីកា មាននៅគ្រប់ទិសទី ៖ នៅអាហ្វ្រិក អាមេរិកកណ្តាល-ខាងត្បូង អឺរ៉ុបខាងត្បូង និងពិសេសនៅតំបន់អាស៊ី។ ហេតុដូច្នេះហើយបានជាអ្នកឯកទេសរបស់អង្គការសុខភាពពិភពលោក បានដាស់អារម្មណ៍ថ្នាក់ដឹកនាំអាស៊ី ថាគ្មានហេតុផលអ្វីដែលការរាតត្បាតហ្ស៊ីកាបញ្ឈប់ត្រឹមអាមេរិកខាងត្បូងនោះឡើយ។ ផ្ទុយទៅអាស៊ីអាចនឹងងាយរងគ្រោះខ្លាំងផង ព្រោះតែអាចមានការភន្តច្រលំជាមួយនឹងជំងឺគ្រុនឈាម និងជំងឺចម្លងដោយមូសផ្សេងទៀត។
បើតាមអង្គការសុខភាពពិភពលោក ហ្ស៊ីកា មិនមែនជាវីរ៉ុសថ្មីថ្មោងទេសម្រាប់អាស៊ី ជំងឺនេះធ្លាប់កើតមាននៅកម្ពុជានៅឆ្នាំ២០១០ នៅហ្វីលីពីន និង ថៃនៅឆ្នាំ២០១២។ ដូច្នេះសូមកុំមើលស្រាលជំងឺ ត្រូវប្រយ័ត្នប្រហែងនិងចាត់វិធានការការពារ ប្រសើរជាងព្យាបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ