ប៉េកាំងប្រដូចអ្នកបង្កហិង្សានៅហុងកុង ទៅនឹងអ្នកផ្តាច់ទឹកដីនិយមជ្រុល
គេត្រូវរង់ចាំជិតមួយសប្តាហ៍ទើបឮប្រតិកម្មរបស់ក្រុងប៉េកាំង ចំពោះអំពើហិង្សានៅហុងកុង កាលពីថ្ងៃអង្គារ ទី ៩កុម្ភៈ ដែលបានបង្កឱ្យមានមនុស្សរងរបួសជាងមួយរយនាក់។ តំណាងជាន់ខ្ពស់ចិន បានចាត់ទុកការបង្កអំពើហិង្សានោះ ថាជាសកម្មភាពបះបោរផ្តាច់ទឹកនិយម ដែលមាននិន្នាការបែបភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ជាការកម្រណាស់ដែលអ្នកទទួលខុសត្រូវរបស់ប៉េកាំងធ្វើអត្ថាធិប្បាយដោយផ្ទាល់ទាក់ទងនឹងបច្ចុប្បន្នភាពនៅហុងកុងនោះ។ ប៉ុន្តែបើមានពិតជាធ្ងន់ធ្ងរហើយ ! នៅថ្ងៃអាទិត្យនេះ តំណាងក្រុងប៉េកាំងប្រចាំតំបន់ស្វ័យតហុងកុង លោក Zhang Xiaoming បានសម្តែងក្តីរន្ធត់ ចំពោះព្រឹត្តិការណ៍ហិង្សា ដែលបានធ្វើមនុស្សជាង១រយនាក់រងរបួស ក្នុងនោះ ៩០នាក់ជាប៉ូលិស។
កាលពីថ្ងៃអង្គារទី៩កុម្ភៈ ប៉ូលិសហុងកុងបានធ្វើការបំបែកហ្វូងអ្នកលក់ម្ហូបអាហារអនាធិបតេយ្យ តាមដងផ្លូវ នាឱកាសបុណ្យចូលឆ្នាំថ្មី តែដោយមានជំនួយពីចលនាបាតុកម្ម ប្រតិបត្តិការនោះក៏បានក្លាយជាប៉ះទង្គិចហិង្សា រហូតទាល់តែប៉ូលិសបាញ់រះឡើងលើបង្ហើល។
បើតាមនាយកការិយាល័យទំនាក់ទំនងជាមួយចិន មានសមាជិកចលនាបះបោរមូលដ្ឋាន ប្រឆាំងនឹងឥទ្ធិពលចិននៅហុងកុង និងដែលចង់ទាមទារផ្តាច់ទឹកដីដែនកោះហុងកុងនេះផង បានបង្កប់ខ្លួនចំណោមហ្វូងបាតុករ។ “យើងសូមថ្កោលទោសក្រុមផ្តាច់ខ្លួនជ្រុលនិយមនេះ ដែលបញ្ចេញសកម្មភាពកាន់តែហិង្សាឡើងៗ និងដែលមាននិន្នាការកាន់តែដូចពួកភេរវនិយម”។
ចំណែកនាយកប្រតិបត្តិក្រុងហុងកុង Leung Chun-ying បានអះអាងនៅថ្ងៃអាទិត្យនេះដែរ ថា អំពើហិង្សាកាលពីថ្ងៃអង្គារ មិនមែនជាតំណាងមតិសាធារណៈរបស់ហុងកុងទេ។ ពួកនេះភាគច្រើនជាងអ្នកអត់ការងារធ្វើ មួយចំនួនធំជាសកម្មជនរបស់ក្រុមជ្រុលនិយម ការទាមទារនយោបាយរបស់ពួកគេ មិនមែនកញ្ចក់ឆ្លុះបញ្ចាំងសង្គមហុងកុងឡើយ។
ហេតុការណ៍ហិង្សាបានផ្ទុះឡើង ក្នុងខណៈដែលពលរដ្ឋហុងកុងហាក់មានអារម្មណ៍បាត់បង់សេរីភាពជាលំដាប់។ ហុងកុង អតីតដែនដីក្រោមអាណានិគមអង់គ្លេស ទើបបានស្គាល់វិបត្តិនយោបាយដ៏ធ្ងន់ធ្ងរកាលពីឆ្នាំ២០១៤ ការបះបោរធ្វើបាតុកម្មបិទខ្ទប់ក្រុង ដើម្បីទាមទារឱ្យមានការរៀបចំបោះឆ្នោតជ្រើសរើសប្រមុខដឹកនាំកោះ ឆ្នាំ២០១៧ ដោយសេរីនិងជាសកល គ្មានការជ្រៀតជ្រែកពីប៉េកាំង។ ប៉ុន្តែបាតុកម្មនោះមិនបានធ្វើឱ្យរង្គើដល់អន្តរជាតិទេ ហើយចិនប៉េកាំងក៏មិនបានផ្តល់សម្បទានអ្វីសូម្បីតែបន្តិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ