អត្តឃាតកម្មដុតខ្លួននៅទីបេនិងការប៉ុនប៉ងដុតខ្លួននៅក្រៅប្រទេសចិន
ព្រះសង្ឃទីបេមួយអង្គនៅប្រទេសចិននិងក្មេងជំទង់ម្នាក់នៅឥណ្ឌា បានដុតខ្លួននៅថ្ងៃចន្ទមុននេះជាសញ្ញាដើម្បីប្រឆាំងទល់នឹងទីក្រុងប៉េកាំង នៅក្នុងការក្តោបក្តាប់ទឹកដីទីបេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
យោងតាមប្រភពអង្គការក្រៅរដ្ឋាភិបាលទីបេមួយឈ្មោះ Free Tibet ដែលមានទីស្នាក់ការនៅទីក្រុងLondres ប្រទេសអង់គ្លេស បានឲ្យដឹងថា”ព្រះសង្ឃ Kalsang Wangdu បានពលីជីវិតដោយដុតខ្លួននៅពីមុខវត្តអារ៉ាមមួយដែលស្ថិតនៅតំបន់ទីបេមួយក្នុងខេត្តស៊ីជាន់។
កាយវិការយ៉ាងអស់សង្ឃឹមរបស់ព្រះសង្ឃទីបេបែបនេះ ក៏ជាលើកទីមួយដែរនៅក្នុងប្រទេសចិនក្នុងឆ្នាំ ២០១៦ នេះ។ ហើយចំនួនសរុបនៃប្រជាជនទីបេដែលបានប៉ុនប៉ងធ្វើអត្តឃាតនិងបានសំរេចក្នុងការដុតសម្លាប់ខ្លួនឯងនេះ មានចំនួន១៤៤រូប -នេះបើយោងតាមប្រភពវិទ្យុអាមេរិក Radio Free Asia។
ម្យ៉ាងទៀត នៅខណៈពេលដែលសង្ឃទីបេអង្គនេះបានដុតខ្លួន សង្ឃទីបេ Kalsang Wangdu បានស្រែកអំពាវនាវសុំឲ្យទីបេ មានឯករាជ្យពេញលេញ-នេះបើយោងតាមប្រភពអានាមិកមួយដែលដកស្រង់ដោយវិទ្យុ Radio Free Asia។ មកទល់ពេលនេះនៅលើអត្តឃាតកម្មរបស់សង្ឃទីបេ រហូងមកទល់នៅថ្ងៃពុធនេះ គេនៅតែមិនទាន់អាចទាក់ទងប៉ូលិសចិនបានទេ ដើម្បីការពន្យល់បំភ្លឺ អំពីហេតុការណ៍ដុតសម្លាប់ខ្លួនរបស់សង្ឃទីបេខាងលើនេះ។
នៅថ្ងៃចន្ទដដែលនោះ ក្មេងប្រុសជំទង់ទីបេម្នាក់ អាយុ១៦ឆ្នាំ ក៏បានប៉ុនប៉ងដុតខ្លួនឯងដែរនៅ Dehradun ក្រុង ឥណ្ឌាមួយនៅភាគខាងជើងប្រទេស។ ទោះបីជារាងកាយរបស់ក្មេងនោះ ត្រូវរងរបួសរលាករលួយដោយសារភ្លើងឆេះយ៉ាងសម្បីមពេកក្តី ប្រមាណជា៩៥% ក៏ជីវិតក្មេងទីបេនេះ ត្រូវបានគេជួយស្រោចស្រង់ទាន់ពេលវេលាដោយសារការដឹកបញ្ជូនទៅព្យាបាលជាបន្ទាន់នៅឯមន្ទីរពេទ្យមួយនាក្រុង Delhi ។
គឺជាជនទីបេទី៨ហើយ ដែលបានធ្វើសកម្មភាពប៉ុនប៉ងដុតខ្លួនបែបនេះនៅក្រៅប្រទេសចិន-នេះបើយោងតាមប្រភពអង្គការ Free Tibet ។ នៅក្នុងមន្ទីពេទ្យ ក្មេងរងគ្រោះទីបេនេះ- បាននិយាយប្រាប់ថា “តាំងតែពីវ័យកុមារម្ល៉េះ គេបានបេ្តជ្ញាចិត្តរូចស្រេចទៅហើយថានឹងត្រូវធ្វើអ្វីមួយដើម្បីបុព្វហេតុទឹកដីទីបេ។ ហើយជំរើសដ៏ប្រសើរជាងគេសំរាប់រូបខ្លួន គឹគ្មានអ្វីក្រៅពីការដុតខ្លួនឯងនោះទេ ពីព្រោះការដុតខ្លួននេះ វាធ្វើឲ្យមនុស្សលោកតក់ស្លុត”។
គួររំលឹកថា ចាប់តាំងពីដើមឆ្នាំ ២០០៩ មក ជនជាតិទីបេយ៉ាងហោចជាង១២២នាក់ បានដុតសម្លាប់ខ្លួនដើម្បីប្រឆាំងទល់នឹងការត្រួតត្រា ការបំបាត់សេរីភាពសាសនាដែលចិនបានធ្វើមកលើទឹកដីបេ។ ក៏ប៉ុន្តែ រដ្ឋាភិបាលចិន តែងតែបដិសេធទាត់ចោលការជានិច្ចរាល់ការចោទប្រកាន់ទាំងនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ