ម៉ាល់ឌីវភ័យពីប្រជាជនខ្លួនដែលរត់ទៅចូលរួមប្រយុទ្ធជាមួយពួកជីហាត
នៅថ្ងៃចន្ទ១៤មីនា រដ្ឋាភិបាល Maldives បានសម្តែងក្តីព្រួយបារម្ភជាពន់ពេក ប្រឈមមុខនឹងកំណើនចំនួនប្រជាជន Maldives ដែលបានរត់ទៅចូលរួមប្រយុទ្ធនៅក្នុងអង្គការរដ្ឋអ៊ីស្លាមជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោកAli Nasser Mohamed រដ្ឋលេខាធិការក្រសួងការបរទេសម៉ាល់ឌីវ បានថ្លែងថា “ប្រជាជនម៉ាល់ដីវ ប្រមាណជា៤០នាក់ បានរត់ទៅចូលរួមជាមួយក្រុមអង្គការរដ្ឋអ៊ីស្លាមជីហាត។ ម៉ាល់ឌីវ ដែលជាកោះតូចមួយ មានប្រជាជនរស់នៅចំនួនតែ៣៥ម៉ឺននាក់ប៉ុណ្ណោះ ហើយប្រជាជនភាគច្រើនគឺជាអ្នកកាន់សាសនាអ៊ីស្លាមនិកាយស៊ុយនីត។
នៅនាឱកាសសន្និសីទសារព័ត៌មានមួយនៅទីក្រុងញូវដែលី លោក Mohamed បានថ្លែងបញ្ជាក់ប្រាប់ដល់អ្នកកាសែតថា “រដ្ឋាភិបាលម៉ាល់ឌីវ មានក្តីព្រួយបារម្ភមែនទែនពីបញ្ហាសន្តិសុខនៅក្នុងប្រទេសពីព្រោះ ពលរដ្ឋម៉ាល់់ឌីវចំនួន៤០នាក់ហើយ បានរត់ទៅកាន់តំបន់ដើមបូព៌ាដើម្បីចូលរួមក្នុងសង្គ្រាមដ៏អាស្រូវមួយ។ ហើយម៉ាល់ឌីវក៏ដូចជាប្រទេសសំខាន់ៗផ្សេងៗទៀតដែរដែលមានការរីកលូតលាស់ តែបែរជាមានការលំបាកស្មុកស្មាញនៅក្នុងការដោះស្រាយនៅលើបញ្ហានេះទៅវិញ។
ចំណែក អតីតប្រធានាធិបតីម៉ាល់ឌីវ លោក Mohamed Nasheed ធ្លាប់បានព្រមានប្រាប់ឲ្យដឹងដែរថា មានពលរដ្ឋម៉ាល់ឌីវជិត២០០នាក់ ប្រហែលជាបានរត់ទៅចូលរួមប្រយុទ្ធជាមួយក្រុមអ៊ីស្លាមជីហាតនៅប្រទេសអ៊ីរ៉ាក់និងស៊ីរី។ប៉ុន្តែ រដ្ឋលេខាធិការនៃក្រសួងការបរទេសម៉ាល់ដីវ បានវាយតម្លៃថា “ចំនួនពិតប្រាកដ វាមានតិចជាងចំនួនខាងលើនេះ។
ក៏ប៉ុន្តែដោយសារ ប្រជាជនម៉ាល់ឌីវដែលភាគច្រើន ជាអ្នកក្រីក្រពុំសូវចេះដឹង ពួកគេក៏ជាផ្ទាំងស៊ីប ងាយស្រួលបំផុតសម្រាប់ពួកជីហាតនៅក្នុងយុទ្ធនាការឃោសនាអូសទាញប្រជាជនក្រីក្រខ្សត់ខ្សោយទាំងនោះដែរ។
សូមបញ្ជាក់ថា កាលពីឆ្នាំទៅមិញ ប្រទេសម៉ាល់ឌីវ បានដាក់ឲ្យប្រើច្បាប់ដ៏តឹងរឹងបំផុតមួយប្រឆាំងអំពើភេរវកម្ម ដែលសំដៅជាពិសេស ទៅលើក្រុមអ្នកដែលធ្វើការគាំទ្រក្រុមអង្គការរដ្ឋអ៊ីស្លាម។ ក៏ប៉ុន្តែ ក្រុមអ្នកប្រឆាំងម៉ាល់ឌីវ បានធ្វើការទិះតៀន ថាច្បាប់នេះ ទុកប្រើដើម្បីបំបិទសិទ្ធសំឡេងអ្នកជំទាស់នានានៅក្នុងប្រទេសមួយដែលកំពុងប្រឈមមុខនឹងវិបត្តិនយោបាយដ៏ពុះកញ្ជ្រោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ