អាជ្ញាធរថៃដើររឹបអូសចានក្រហមមានសារប្រឆាំង
អាជ្ញាធរសឹកថៃមិនបន្ធូរដៃ និងមិនអនុញ្ញាតឱ្យសំឡេងប្រឆាំងអាចលូតលាស់បានឡើយ ! របបយោធាថៃបានប្រើវិធានការថ្មីមួយទៀត ដើម្បីបង្ក្រាបក្រុមបក្សប្រឆាំង។ នៅថ្ងៃនេះ បើតាមប្រភពព័ត៌មានប៉ូលិស អាជ្ញាធរថៃបានរឹបអូស ចានគោមក្រហមជិត៦ពាន់ចាន ព្រោះចានក្រហមនេះ មានសរសេរលម្អរដោយ-សាររបស់អតីតនាយករដ្ឋមន្ត្រីត្រកូលស៊ីណាវ៉ាត់ ដែលធ្លាក់ពីតំណែងដោយហេតុតែរដ្ឋប្រហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
កាលពីដើមសប្តាហ៍មុន ស្ត្រីថៃម្នាក់ត្រូវបានតុលាការធ្វើការចោទប្រកាន់ពីបទ “បះបោរ” បន្ទាប់ពីបានថតរូបខ្លួនឯងជាមួយ “ចានគោមក្រហម” នេះ។
គេនៅចងចាំបានថា ក្រហមជាពណ៌តំណាងក្រុម អាវក្រហម ដែលជាចលនាប្រជាជន និងសកម្មជនគាំទ្រអតីតនាយករដ្ឋមន្ត្រី ត្រកូល ស៊ីណាវ៉ាត់ គឺលោកថាក់ស៊ីន និងប្អូនស្រី យីងឡាក់ និងដែលទាំងពីរនាក់បងប្អូន ត្រូវបានបណ្តេញចេញពីអំណាច (២០០៤ និង២០១៤) ដោយពួកយោធា។
ចុះតើចានគោម នេះមានពាក់ព័ន្ធអ្វីដែរ ទើបត្រូវអាជ្ញាធររឹបអូសដូច្នេះ ? នៅប្រទេសថៃ ចានគោមក្រហមនេះត្រូវបានប្រើនៅតាមវត្តអារាម ដើម្បីដាក់ទឹក ក្នុងគ្រប់ពិធីតាមបែបពុទ្ធសាសនា នាឱកាសបុណ្យចូលឆ្នាំថ្មីជាប្រពៃណី។ ប៉ុន្តែចោនគោមក្រហមទាំងនោះ មានចារសាររបស់លោកថាក់ស៊ីន ស៊ីណាវ៉ាត់ ជាអាទិ៍ថា “ស្ថានភាពទំនងជាអាចក្តៅ ប៉ុន្តែទឹកក្នុងចាននេះអាចព្រោះឱ្យបងប្រុស បងស្រី ប្អូនប្រុសប្អូនស្រី ត្រជាក់បាន”។
ចានទាំងនេះ ត្រូវបានចែកចាយជាលើកទីមួយ នៅក្នុងពិព័រណ៍មួយក្នុងខេត្តឈៀងម៉ៃ កាលពីសប្តាហ៍មុន។ ចំណែកប៉ូលិសនិងយោធាថៃ ក៏បានចាប់ផ្តើមដើរប្រមូលនិងរឹបអូសយកចានទាំងនោះមកវិញ ដល់ផ្ទះប្រជាជន និងអតីតតំណាងសភាម្នាក់ជាសមាជិកបក្សប្រឆាំង ដែលមានចាននោះដល់ទៅ៥៨០០ចាន។ សម្រាប់ប៉ូលិស ការចែកចាយចាន គឺជាផ្តល់ផលចំណេញដល់បក្សនយោបាយមួយ និងបំផ្លាញបក្សមួយផ្សេងទៀត។
ថ្វីបើមានការគំរាមកំហែង និងព្រមានពីសំណាក់អាជ្ញាធរសឹកយ៉ាងណាក៏ដោយ ក៏ក្រុមបក្សប្រឆាំងថៃ ខិតខំរិះរកគ្រប់មធ្យោបាយដើម្បីងើបឡើងវិញ ជាពិសេសក្នុងខណៈដែលការបោះឆ្នោតប្រជាមតិ លើគម្រោងសំណើរដ្ឋមន្ត្រីថ្មី ថ្ងៃទី ៧សីហា កាន់តែខិតមកដល់។ ប៉ុន្តែរបបសឹក ដែលសន្យារៀបចំបោះឆ្នោតនៅឆ្នាំ២០១៧ និងដែលជាប់ចោទដឹកនាំផ្តាច់ការ បំបិទសេរីភាពនយោបាយ មិនអនុគ្រោះឡើយ សូម្បីតែចានជ័រក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ