អាហ្វហ្កានីស្ថាន អាចរំពឹងលើចិនបានប៉ុណ្ណា ក្នុងស្តារសន្តិភាព ?
ចុះផ្សាយនៅថ្ងៃ៖
ស្តាប់ - ០៤:០៩
ប្រមុខរដ្ឋាភិបាលអាហ្វហ្កានីស្ថាន លោក អាប់ឌូឡះ អាប់ឌូឡះ កំពុងបំពេញទស្សនកិច្ចនៅប្រទេសចិន ពីថ្ងៃអាទិត្យដល់ថ្ងៃពុធទី ១៨ឧសភា ស្របតាមការអញ្ជើញរបស់នាយករដ្ឋមន្ត្រីចិន លោក លី ខឺឈាំង។ នៅក្នុងជំនួប នាព្រឹកថ្ងៃអង្គារ លោកនាយករដ្ឋមន្ត្រីចិន បានប្រកាសអំពីភាពអន្ទះសារចង់ធ្វើឱ្យប្រសើរឡើងកិច្ចសហប្រតិបត្តិការរវាងអាហ្វហ្កានីស្ថាន និងចិន។ មិនតែប៉ុណ្ណោះ ចិនបានចាត់ទុកអាហ្វហ្កានីស្ថានថាជាអាទិភាពមួយផងក្នុងនយោបាយអោបក្រសោបអ្នកជិតខាង។ តើចិនកំពុងចង់ដើរតួនាទីមើលថែអាហ្វហ្កានីស្ថានជំនួសអាមេរិកឬ ?
កាលពីជាងមួយឆ្នាំមុន ក្រោយពីបានជាប់ឆ្នោតជាប្រធានាធិបតីអាហ្វហ្កានីស្ថានភ្លាម លោក អាស្ហ្រាហ្វ ហ្កានី បានរូតរះអញ្ជើញទៅបំពេញទស្សនកិច្ចផ្លូវរដ្ឋដំបូងគេនៅប្រទេសចិន។ នៅថ្ងៃនេះ ដល់វេនលោកប្រមុខរដ្ឋាភិបាល អាប់ឌូឡះ អាប់ឌូឡះ ជាម្តង ដែលត្រូវនាយករដ្ឋមន្ត្រីចិន ទទួលជួបស្វាគមន៍ដោយផ្ទាល់និងដោយផ្លូវការ នៅក្រុងប៉េកាំង។
ជំនួបដែលជាឱកាសមួយសម្រាប់ចិន បង្ហាញអំពីការគាំទ្រកាន់ខ្លាំងឡើងអាហ្វហ្កានីស្ថាន ក្នុងដំណើរការផ្សះផ្សានយោបាយ និងស្ថាបនាជាតិឡើងវិញ។ លោក លី ខឺឈាំង នាយករដ្ឋមន្ត្រីចិន បានថែមទាំងបញ្ជាក់ថា អាហ្វហ្កានីស្ថានគឺជាអាទិភាពមួយនៃនយោបាយគិតគូរដល់អ្នកជិតខាងរបស់ចិន ដែលត្រូវពង្រឹងនិងពង្រីកភាពជាដៃគូ កិច្ចសហប្រតិបត្តិការយុទ្ធសាស្ត្រទ្វេភាគី ជាពិសេសគាំទ្រអាហ្វហ្កានីស្ថានឱ្យរក្សាបានឯករាជភាព អធិប្បេតយភាព បូរណភាពដែនដី និងសន្តិសុខ។
បើតាមលោក លី ខឺឈាំង ចិនត្រៀមសហការជាមួយអាហ្វហ្កានីស្ថាន លើគ្រប់វិស័យដូចជានយោបាយ សេដ្ឋកិច្ច សន្តិសុខនិងវប្បធម៌ ព្រមតាំងកិច្ចការអន្តរជាតិ-តំបន់។ ចិនត្រៀមជួយអាហ្វហ្កានីស្ថាន និងគាំទ្ររដ្ឋាភិបាលថ្មីអាហ្វហ្កានីស្ថាន ដែលមានផែនការផ្សះផ្សានយោបាយ។ ចិននិងអាហ្វហ្កានីស្ថាន ក៏បានមូលមតិគ្នាខ្លាំងលើគម្រោងកិច្ចសហប្រតិបត្តិការវិនិយោគ និងសំណង់ហេដ្ឋារចនាសម្ព័ន្ធ។
ជាសរុប ត្រឹមតែដំណើរទស្សនកិច្ចពីរជើង ចិននិងអាហ្វហ្កានីស្ថាន បានយល់ចិត្តគ្នាច្រើននិងផ្តល់សារៈសំខាន់ដល់គ្នាទៅវិញទៅមកយ៉ាងខ្លាំង។ នេះដោយសារមូលហេតុអ្វី ?
ការដកខ្លួនចេញពីអាហ្វហ្កានីស្ថាន របស់អាមេរិកនិងអូតង់ នៅចុងឆ្នាំ គឺប្រៀបដូចជាបើកឱកាសឱ្យមានខ្យល់ថ្មី។ ខាងរដ្ឋាភិបាលកាប៊ូល របស់លោក អាស្ហ្រាហ្វ ហ្កានី អាហ្វហ្កានីស្ថាន កំពុងបំផ្លែងខ្លួន និងមើលឃើញថាចិនអាចដើរតួនាទី និងជាផ្តល់សំណាងច្រើន ដល់ការស្វែងរកសន្តិភាព ព្រោះចិនមានមធ្យោបាយដាក់សម្ពាធលើប៉ាគីស្ថាន ដែលជាជង្រុករបស់ពូកតាលីបង់។ ជាក់ស្តែង កាលពីខែវិច្ឆិកាកន្លងទៅ ប្រមុខតាលីបង់និរទេសខ្លួននៅកាតា បានទៅបំពេញទស្សនកិច្ចនៅប៉េកាំង ហើយបើគេជឿតាមសំដីអ្នកនាំពាក្យរបស់អតីតប្រធានាធិបតីអាហ្វហ្កានីស្ថាន លោក អាមីត កាហ្សៃ ទស្សនកិច្ចនោះ គឺរៀបចំឡើងដោយភ្នាក់ងារសម្ងាត់ប៉ាគីស្ថាន។
ចំណែកខាងភាគីចិនវិញ ក្រៅអំពីសំឡឹងឃើញប្រយោជន៍សេដ្ឋកិច្ច ដូចទម្លាប់ ចិនក៏ចង់បោះជំហានចូលក្នុងលំហនយោបាយ ដើរតួជាអ្នកនាំអាហ្វហ្កានីស្ថាន ឆ្លងអន្តរកាលដែរ។ ដំណើរដកកងទ័ពអាមេរិកនិងអូតង់ចេញពីអាហ្វហ្កានីស្ថាន គឺជាការដកមូលដ្ឋានទ័ពអាមេរិកចេញពីព្រំដែន គឺជាការដកបន្លាមួយចេញពីភ្នែកចិន និងចិនធ្វើឱ្យចិនស្គាល់រសជាតិស្ថិរភាព ទើបត្រូវប្រឹងលូកដៃខ្លាំងត្រូវការឃើញអាហ្វហ្កានីស្ថានមានស្ថិរភាព។ ចិននិងអាហ្វហ្កានីស្ថាន មានព្រំប្រទល់ជាប់គ្នាដល់២០០គីឡូម៉ែត្រ បើអាហ្វហ្កានីស្ថានវិលវល់ នោះចិនក៏មិនអាចនៅស្ងប់ស្ងាត់ស្រួលដែរ។ ចិនក៏កំពុងឈឺក្បាលខ្លាំងស្រាប់ផងនឹងពួកអ៊ីស្លាមជ្រុលនិយមអ៊ុយហ្គួរ នៅស៊ីនជាំង។ ហើយគឺពួកជីហាតនៅភាគខាងជើងប៉ាគីស្ថាននេះតែមួយដែលជាអ្នកឧបត្ថម្ភនិងផ្តល់ជម្រកដល់ពួកយុទ្ធជនអ៊ុយហ្គួរ។
គ្មានកងទ័ពនៅអាហ្វហ្កានីស្ថាន គ្មានរូបភាពជាអ្នកឈ្លានពានដូចអាមេរិកនិងអូតង់ ចិនអាចជ្រៀតចូលទៅ ចិនអាចចូលចាក់ឬសចាក់គល់ក្នុងប្រទេសនេះក្នុងវិស័យជាសេដ្ឋកិច្ច ក្តោបក្តាប់ធនធានរ៉ែមួយរបស់អាហ្វហ្កានីស្ថានទៅហើយមែន និងដើរតួនាទីល្អជាងសម្រាប់ក្រសែភ្នែកពលរដ្ឋនិងថ្នាក់ដឹកនាំអាហ្វហ្កានីស្ថាន។
ប៉ុន្តែទោះបីជាចិនមានហេតុផលច្បាស់លាស់ត្រូវអោបក្រសោបអាហ្វហ្កានីស្ថាន ត្រូវជួយរកសន្តិភាពប្រទេសនេះឱ្យរួចផុតពីកណ្តាប់ដៃពួកអ៊ីស្លាមជីហាតក៏មែនពិត តែចិនទំនងជាមិនអាចលូកដៃចូលជួយឱ្យកប់ជ្រៅឡើយ។ មូលហេតុមកពីចិនក៏ត្រូវការគោរពទំនាក់ទំនងល្អនិងជាយុទ្ធសាស្ត្រជាមួយប៉ាគីស្ថាន។ ចិនមិនអាចធ្វើឱ្យហួសហេតុចំពោះកាបូល រហូតខូចការជាមួយប៉ាគីស្ថានបានឡើយ។ សូមបញ្ជាក់ថាប៉ាគីស្ថាននិងចិន មានប្រវត្តិស៊ុំគ្រលំគ្នាស្អិតល្មួតខ្លាំងណាស់។ ជាការឃុបឃិតគ្នាដោយឈរលើប្រយោជន៍រួម ដើម្បីបន្ទន់សត្រូវរួមឥណ្ឌា។ ដូច្នេះចិនពិតជាមិនអាចបំពេញបំណងអាហ្វហ្កានីស្ថានគ្រប់យ៉ាងបានឡើយ។ អាហ្វហ្កានីស្ថាន ត្រូវចេះអត់ធ្មត់ និងធ្វើឆោតបន្តិចហើយនាពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ