ជប៉ុនអនុម័តច្បាប់បំបាត់ការប្រើភាសាស្អប់ខ្ពើមប្រកាន់ពូជសាសន៍
សភាជប៉ុនបានអនុម័តច្បាប់មួយ នៅថ្ងៃអង្គារនេះ ដែលគ្រោងនឹងបំបាត់នូវរាល់ការសរសេរ ការប្រើភាសា នៅតាមដងផ្លូវឬបង្ហោះផ្សាយក្នុងប្រព័ន្ធអ៊ីនធ័រនែត ក្នុងទម្រង់ជាស្អប់ខ្ពើម និងញុះញង់ឱ្យមានការរើសអើងសហគមន៍ ឬពូជសាសន៍។ ភាសាការរើសអើង និងស្អប់ខ្ពើម ដែលគេសង្កេតមានកាន់ច្រើនឡើងៗ នៅក្នុងសង្គមជប៉ុន នាពេលបច្ចុប្បន្ន និងដែលអង្គការសហប្រជាជាតិមានការព្រួយបារម្ភតាំងពីយូរមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
សមាជិកបក្សកាន់អំណាច ក៏ដូចសមាជិកបក្សប្រឆាំងមួយភាគធំផ្សេងទៀតដែរ ដែលបានចូលរួមប្រជុំសភានៅថ្ងៃអង្គារម្សិលមិញ បានបោះឆ្នោតអនុម័តច្បាប់មួយ ដើម្បីលុបបំបាត់ចោលការប្រើសំដីភាសា អសុរស និងមានលក្ខណៈស្អប់ខ្ពើមគ្នា។
ប៉ុន្តែដើម្បីគោរពសិទ្ធសេរីភាពនៃការបញ្ចេញមតិ ច្បាប់ថ្មីនេះមិនចេញជាបម្រាម ហាមឃាត់ ឬដាក់ទណ្ឌកម្មលើជនណាដែលប្រើឃ្លារើសអើងឡើយ។ ច្បាប់នេះបានស្នើនិងសម្រួលឱ្យអាជ្ញាធរព្រមទាំងសង្គមស៊ីវិលជួយប្រយុទ្ធប្រឆាំងនឹងទម្រង់ញុះញង់ការស្អប់ខ្ពើប ដែលគេឃើញមានប្រើច្រើន និងបង្ហោះយ៉ាងទូលំទូលាយក្នុងប្រព័ន្ធសង្គម ដោយយកការអប់រំជាបង្គោល បង្រៀនមនុស្សទូទៅ ឱ្យស្គាល់អំពីតម្លៃមនុស្ស។
ជនរងគ្រោះមានច្បាប់ជាបង្អែក សម្រាប់ពឹងពាក់ក្នុងករណីរងការវាយប្រហារ ព្រោះក្នុងច្បាប់មានកំណត់និយមន័យ “ភាសាបែបស្អប់ខ្ពើមគ្នា”។ ឃ្លាឃ្លោងជាសាធារណៈណាដែលពោលទៅប៉ះពាល់ខ្លួនប្រាណ បុគ្គលមនុស្ស ឬដល់អចលនទ្រព្យ ដល់សេរីភាពនៃបុគ្គលម្នាក់ទៀត ត្រូវចាត់ទុកជាការរើសអើងនិង មិនអនុញ្ញាតឱ្យមានប្រើក្នុងសហគមន៍ជប៉ុនទៀតទេ។
ភាសាដែលមានលក្ខណៈស្អប់ខ្ពើមគ្នា និងប្រកាន់ពូជសាសន៍ ប៉ះពាល់ដល់កិត្តិយស និងសមភាពមនុស្ស មានការកើនឡើងជាលំដាប់នៅក្នុងប្រទេសជប៉ុន សំដៅវាយប្រហារកុមារ និងមនុស្សពេញវ័យ ដែលអាចធ្វើឱ្យពួកគេឈឺចាប់អស់មួយជីវិត។ នេះបើតាមការសម្គាល់របស់សមាជិកសភា នៃបក្សឆ្វេងកណ្តាលនិយម អ្នកផ្តួចផ្តើមបង្កើតច្បាប់បំបាត់ការប្រើភាសារើសអើង។
តាមរយៈច្បាប់ថ្មីនេះ គេនឹងអាចលុបបំបាត់ចោលនៅរាលផ្លាកហាមឃាត់ ក្នុងហាងមួយចំនួន ក្លឹបខារាអូខេ ស្តាត ឬកន្លែងផ្សេងៗទៀត ដែលពេលខ្លះប្រកាន់ជំហរជាតិនិយមជ្រុលដល់ថ្នាក់ដាក់ផ្លាកនៅខាងក្រៅ “សម្រាប់តែភ្ញៀវជប៉ុន”។
សូមបញ្ជាក់ថានារយៈពេលប៉ុន្មានឆ្នាំចុងក្រោយនេះ ក្រុមស្តាំនិយមជ្រុលមួយក្តាប់តូច បានឃោសនាញុះញង់ឱ្យស្អប់ខ្ពើមសហគមន៍បរទេស ជាពិសេសសហគមន៍កូរ៉េខាងត្បូងនៅជប៉ុន។ គណៈកម្មាធិការនៃឧត្តមស្នងការសិទ្ធិមនុស្សអង្គការសហប្រជាជាតិបានធ្លាប់បានលើកឡើងអំពីក្តីព្រួយបារម្ភខ្លាំងចំពោះភាសារើងអើសនៅក្នុងប្រទេសនេះដែរ កាលពីឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ