អ៊ូហ្កង់ដាសន្យាបញ្ចប់កិច្ចសហប្រតិបត្តិការយោធា និងប៉ូលិសជាមួយកូរ៉េខាងជើង
នៅថ្ងៃចន្ទ ទី៣០ ឧសភានេះជាថ្ងៃចុងក្រោយនៃដំណើរទស្សនកិច្ចរយៈពេល ៣ថ្ងៃរបស់លោកស្រីប្រធានាធិបតីកូរ៉េខាងត្បូងប៉ាក់ គុនហេនៅក្នុងប្រទេសអ៊ូហ្កង់ដា។ អ៊ូហ្កង់ដាដែលបានសន្យាថា នឹងបញ្ចប់កិច្ចសហប្រតិបត្តិការយោធា និងប៉ូលិសជាមួយកូរ៉េរខាងជើង ព្រមទាំងយល់ព្រមសម្របតាមទ័ណ្ឌកម្មអន្តរជាតិប្រឆាំងនឹងរបបក្រុងព្យុងយ៉ាងទាក់ទងនឹងកម្មវិធីនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ជាផ្លូវការ ទស្សនកិច្ចរយៈពេល ៣ថ្ងៃរបស់លោកស្រីប្រធានាធិបតីកូរ៉េខាងត្បូងប៉ាក់ គុនហេក្នុងប្រទេសអ៊ូហ្កង់ដា គឺដើម្បីពង្រឹងកិច្ចសហប្រតិបត្តិការនៅក្នុងវិស័យវេជ្ជសាស្រ្ត កសិកម្ម និងបច្ចេកវិជ្ជាថ្មីរវាងក្រុងសេអ៊ូល និងក្រុងកំប៉ាឡា។ តែបើនិយាយក្រៅផ្លូវការវិញ លោកស្រីប៉ាក់ គុនហេបាននិងកំពុងបន្តយុទ្ធនាការស្វែងរកការគាំទ្រពីក្រុមប្រទេសសម្ព័ន្ធមិត្តរបស់កូរ៉េខាងជើងឲ្យប្រឆាំងកូរ៉េខាងជើងក្នុងសំណុំរឿងនុយក្លេអ៊ែរ។ ពីប្រទេសអ៊ីរ៉ង់ក្នុងតំបន់ដើមបូព៌ាឆ្លងចូលទ្វីបអាហ្រ្វិកក្នុងប្រទេសអេត្យូពី និងប្រទេសអ៊ូហ្កង់ដាពេលនេះ លោកស្រីប៉ាក់ គុនហេបាននិយាយបញ្ចុះបញ្ចូលក្រុមប្រទេសមិត្តរបស់កូរ៉េខាងជើងឲ្យបញ្ចប់កិច្ចសហប្រតិបត្តិការជាមួយក្រុងព្យុងយ៉ាងដោយសម្របតាមទ័ណ្ឌកម្មរបស់សហគមន៍អន្តរជាតិ។
ជាលទ្ធផលជាក់ស្តែង លោកស្រីប៉ាក់ គុនហេទទួលបានការគាំទ្រយ៉ាងពេញទំហឹងពីសមភាគីអ៊ូហ្កង់ដាលោកយ៉ូវឺរី មូសឺវឺនី។ នៅក្នុងសេចក្តីប្រកាសព័ត៌មានមួយផ្សព្វផ្សាយក្នុងយប់ថ្ងៃអាទិត្យ ទី២៩ ឧសភា វិមានប្រធានាធិបតីអ៊ូហ្កង់ដាបានប្រកាសឲ្យដឹងពីការបិទបញ្ចប់កិច្ចសហប្រតិបត្តិការយោធា និងប៉ូលិសរវាងអ៊ូហ្កង់ដា និងកូរ៉េខាងជើង និងថា រដ្ឋាភិបាលកំប៉ាឡាយល់ព្រមអនុវត្តន៍តាមសេចក្តីសម្រេចចិត្តរបស់អង្គការសហប្រជាជាតិក្នុងការដាក់ទ័ណ្ឌកម្មប្រឆាំងកម្មវិធីនុយក្លេអ៊ែររបស់កូរ៉េខាងជើង។
សូមជម្រាបជូនថា អ៊ូហ្កង់ដាជាប្រទេសអាហ្រ្វិកដែលស្និទ្ធិនឹងកូរ៉េខាងជើងខ្លាំងជាងគេ។ ប្រទេសទាំងពីរបានរក្សាទំនាក់ទំនងការទូតក្នុងកម្រិតខ្ពស់ តាំងពីអូហ្កង់ដាទទួលបានឯករាជ្យក្នុងឆ្នាំ ១៩៦២ ហើយតាំងពីឆ្នាំ ២០០៧ មកដល់សព្វថ្ងៃ កូរ៉េខាងជើងជាអ្នកជួយបង្ហាត់បង្រៀនកម្លាំងយោធា និងកម្លាំងប៉ូលិសអ៊ូហ្កង់ដា។ លោកប្រធានាធិបតីអ៊ូហ្កង់ដាយ៉ូវឺរី មូសឺវឺនីដែលបានកាន់អំណាចតាំងពីឆ្នាំ ១៩៨៦ និងទើបជាប់ឆ្នោតអាណត្តិទី៥ នាខែកុម្ភៈកន្លងទៅធ្លាប់បានទៅបំពេញទស្សនកិច្ចចំនួន ៥ដងនៅកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ